Masalomia ‘o se galuega fa’amamā na māfua ai le mū ‘i le maota gasegase ‘i Moto’otua

‘Ua lē tasi ‘ae ‘ua ātulasi fautuaga ma lapata’iga ‘e tu’uina atu ‘e le vāega ‘o le SFESA, ‘i le mamalu ‘o le atunu’u ‘i le so’ona faia lea ‘o tafuna’i po’o le susunuina ‘o so’o se lāpisi ‘e fa’amamā ai le fanua ‘ona ‘o le pā’a’ā ‘o le mutia ma lā’au ‘ua mamago ‘i le taimi nei, mai le mālosi ‘o mūgālā ‘e sosolo ma tūla’i mai ai mū.

‘O sē tasi ‘o fale ‘i totonu ‘o le lotoā ‘o le maota gasegase ‘i Moto’otua, ‘o se potu ‘e teuina ai fagu kesi ma nisi ‘o vāega, na fa’atāma’ia ‘e le afi. Na fa’ailoa ‘e le Komesina ‘o le ‘Ōfisa ‘o Tinei Mū, Tanuvasa Pētone Mauga, ‘o rīpoti na tu’uina atu ‘e le ‘aufaigaluega na taumafai ‘e tineia le afi, ‘e fōliga mai ‘o se galuega fa’amamā ‘i le fale lea sa fa’atino, ‘ona ‘o le tele ‘o fa’amoega pī ‘o lo’o iai ‘i totonu, ‘ua sosolo ai ma le mū.

Ma ‘o fagu kesi fo’i sa iai ‘i totonu na rīpotia ‘e le ‘aufaigaluega, ‘o fagu kesi ‘ua māe’a ‘ona fa’aaogā ‘o lo’o teuina ai, ‘ātoa ma nisi ‘o meafaigaluega. ‘O se potu fo’i sā fa’aaogāina muamua ‘a’o le’i fa’aaogāina le fale fou lea ‘ua fa’aaogā ‘i le taimi nei.

Ma ‘o le vaiaso fo’i lenei na tūla’i mai ai fo’i seisi mū, na susuina ai ‘e ni tupulaga talavou ‘o le āfio’aga ‘o Lauli’i se vāega ‘o le āfio’aga, pei ‘ona rīpotia ‘i luga ‘o ‘upega tafa’ilagi ‘e le ītūlau ‘a le LNS Live.

Tā’ua ‘e Tanuvasa, ‘ua lata atu ‘i le 10 mū ‘ua ālia’e mai ‘i totonu ‘o le piriota lenei ‘o mūgālā, ma ‘ua ia toe tu’ualalo atu ai ‘i le mamalu ‘o le atunu’u, “… ‘E toe ‘avatu ai le fautuaga, fa’amolemole ‘aua le fa’aaogāina ‘ia afi ‘i ni tūlaga fa’apea ‘e taumafai ‘e ‘ave’ese ai le lāpisi pē fa’amamā ai le fanua, ‘ona ‘o le tūlaga fa’alētonu ma le ma’ema’eā ‘o le mūgālā, ‘ia ‘aemaise ‘o le mālosi ‘o le savili ‘i le taimi nei.”

IMAGE/ATA: Tim685 Facebook Live