Momoli āloa’ia le tausala ‘o Sāmoa ‘iā Poumau Astes Ah Lam Tiufea Va’a ‘i le Pūlega ‘a le Tūrisi mo le ‘āmatalia ‘o ona tiute fa’atausala 2026-2027

‘Ua momoli āloa’ia atu nei ‘e le vāega ‘o le Onomea Production ma ana lagolagosua ‘autū, le tausala filifilia a lō tātou atunu’u na manumālō mai ‘i le tauvaga ‘i le fa’ai’uga ‘o le vaiaso, le tama’ita’i ‘iā Poumau Astes Ah Lam Tiufea Va’a mo le ‘āmatalia ‘o ona tiute fa’atausala ‘e fa’alauiloa lō tātou atunu’u ‘i atunu’u ‘o le lalolagi ‘e tauala atu ‘i le pūlega ‘o tagata tāfafao maimoa mai ‘i Sāmoa.

‘O le Afioga ‘i le Minisitā ‘o le Tūrisi ‘iā Fata Ryan Schuster, na fai ma sui ‘o le Kapeneta ma le mālō, ‘e talia āloa’iaina ai le tu’uina atu ‘o le Afioga ‘i le tausala ‘o Sāmoa ‘iā Poumau mo le ‘āmatalia ‘o lana tautua mo Sāmoa. Na mafai ‘ona fa’ataunu’u ai ‘i le taimi ‘e tasi le fa’amāvae atu ‘i le tausala sā tau’aveina le pale ‘o le atunu’u ‘ona ‘ua ia tu’ua Sāmoa ‘ae malaga mo atunu’u ‘i fafo.

IMAGE/ATA: Samoa Tourism Authority Facebook