Na tē’ena ‘e le Palemia ‘o Peretānia, Keir Starmer ni vala’au ‘i le Aso Lua ‘e fa’amāvae, ma sā ia saunoa ‘i minisitā, ‘e fa’aauau pea ‘ona ‘avea ia ma ta’ita’i ‘e ui sā fa’aopoopo pea le nūmera ‘o finagalo ‘ina ‘ia fa’atūlaga se taimi ‘e alu ‘ese ai talu ai le pa’ū po’o le faiā’ina ‘i le faigāpālota fa’alōtoifale.  ‘E to’afā minisitā na fa’ailoa lo lātou lagolagoina pea ‘o ia. 

‘E le’i ‘ātoa le lua tausaga talu ‘ona tūla’i mai Starmer ‘i le tofi ta’ita’i, ‘ae ‘o se tasi lea ‘o faiā’ina pito sili ‘ona fa’alētonu ‘a lana vāega fa’a’upufai ‘a le Labour.  A fai ‘ae ‘ave’esea Starmer pe fa’amālosia fo’i ‘ona fa’atūlaga se aso ‘e alu ‘ese ai, ‘e iai le manatu ‘o nisi, ‘e ono sē’ei ane le Minisitā ‘o le soifua mālōlōina Wes Streeting ‘e suitūlaga ‘i ai.

Link to RNZ (Article) translated: https://www.rnz.co.nz/news/world/594996/uk-s-starmer-defies-calls-to-quit-says-he-s-getting-on-with-governing

ATA: Keir Starmer / Facebook

‘E $3.41 tupe Niu Sila ‘e tutusa lea ma le $1.99US tupe Amerika, ‘ua mafai ona totogi ‘e tagata Kerisiano ‘i le minute, ‘e talanoa ma fa’asoa ai ma se kopi ‘o Iseu na fau e le poto fa’afōliga o masini po’o le AI.

‘O lea kopi na faia ‘e le Just like me, ‘e tele ina lātou faia chatbots mō le ‘au fa’atuatua. Sa latou fauina chatbots po’o ata fa’afōliga ‘i tupua mō isi fa’atuatuaga ‘e iai le faiga ‘o faifeau Buddist ma Hindu.

‘O le AI ua fau ai le ata fa’afōliga o le tatou ali’i fa’aola, ‘ua ‘amata aga’i iai tagata, ‘e talanoa ma fa’asoa ‘iai ‘i matā’upu o le fa’atuatua. 

Link to 1News (Article) translated: https://www.1news.co.nz/2026/04/13/from-buddhabot-to-ai-jesus-the-faith-based-tech-boom-is-here/

ATA: https://justlikeme.com/jesus

‘Ua fa’atonuina ‘e Trump le navy ‘a ‘Amerika ‘e poloka le vainu’u ‘o le Strait of Hormuz, ‘ina ‘ua lē maua se māliliega ‘i fa’atalanoaga mō se fīlēmū ma Iran. Na tali ane Iran ‘i le fa’asilasilaga ‘a Trump ‘e fa’apea, ‘o lo’o iai ā lātou mailei ‘i le vainu’u, ‘e mailei mai ai ō lātou fili, ma ‘e mafai ‘ona ono māliliu ai pe ‘ā taumafai ‘e lātou te lu’iina.

Saunoa Trump ‘o le ‘ā poloka ‘e le navy ‘a ‘Amerika itū ‘uma ‘o le vainu’u, ‘ina ‘ia ‘aua ne’i iai ni va’a ‘e ulufale ma tu’ua le vainu’u. Ma ‘o le ‘ā pomuina so’o se tagata Iran ‘e taumafai ‘e tafanaina ‘i lātou. ‘O le ‘ā su’esu’eina fo’i ‘e ‘autau ‘a Amerika va’a la’u uta ‘o lo’o totogiia atu tupe fa’asolitūlāfono ‘i Iran. ‘O le ‘ā fa’aleagaina fo’i maina ‘i le sami pei ‘ona saunoa Trump.

Link to RNZ (Article) translated by: https://www.rnz.co.nz/news/world/592167/trump-orders-us-navy-to-block-hormuz-strait-after-iran-talks-fail

ATA: Donald J. Trump / Facebook

‘E ui ‘ina tau maua sina mapusaga mai le fa’asilasilaga ‘a le Peresetene ‘a ‘Amerika Donald Trump ‘i le aso ‘ananafi, ‘ina ‘ua ia fa’asilasila le tāofia ‘o le pomuina ‘o Iran ‘i vaiaso ‘e lua ‘ae se’i faia fa’atalanoaga ‘i le vā o mālō e lua, ‘ae ‘ua fa’alauiloa ‘e Isaraelu se osofa’iga tele ‘i Lepanona. ‘O lo’o fuafua fo’i Iran ‘e osofa’i fale suāu’u ‘i nu’u tuā’oi.

Fa’ailoa ‘e le Minisitā o le Soifua Mālōlōina ‘a Lepanona, ‘e faitau selau ‘o tagata māliliu mai ‘i pomu ‘a Isaraelu, ‘e aunoa ma se lapata’iga i tagata ‘o le nu’u ‘e ō ‘ese mai. ‘O le asō o lo’o faia ai nisi fa’atalanoaga ‘a Peresetene ‘o Pakistan, Iran ma Amerika. ‘Ua tatala na’o sina vāega ‘o le vainu’u ‘o le Strait of Hormuz, ‘ae ‘o lo’o tāofia pea va’a se’i vaganā ‘ua avatu se fa’atagana ‘a Iran ‘e pāsia ai le vainu’u, a’o tālia ai fa’atalatlanoaga ‘ua fa’agāsolo ‘i le vā o mālō.

Link to RNZ (Article) translated by: https://www.rnz.co.nz/news/world/591810/relief-at-truce-gives-way-to-alarm-as-israel-pounds-lebanon-and-iran-hits-neighbours

ATA: Prime Minister Muhammad Shehbaz Sharif / Government of Pakistan
(Pakistan PM to lead talks between US & Iran)

‘Ua fa’atonuina ‘e se fa’amasinoga ‘i New Mexico le kamupanī ‘a le Meta ‘e totogi le $375 miliona ‘Amerika, ‘i se tagi na faia ‘e le lōia sili ‘a le setete, pei ‘ona ia tu’ua’ia ai le kamupanī ‘i le ta’ita’iina sesē ‘o tagata ‘e fa’aaogāina le Facebook, Instagram ma le WhatsApp ‘e fa’apea ‘e saogalēmū, fa’atasi ai ma le tatala ‘o avanoa ‘e mafai ‘ona sauāina ai tamaiti ‘i luga ‘o ia ‘upega ‘o feso’ota’iga.

Na māua ‘i iloiloga ‘a le ‘au fa’atonu ‘o le fa’amasinoga, le solia ‘e le Meta ‘o le tūlāfono ‘a New Mexico mō le puipuiga ma fa’atonuina ai loa le kamupanī ‘e totogi lea tupe tele pe tusa lea ma le 642 miliona tālā Niu Sila.  ‘Ae na fa’aalia ‘e se so’o’upu ‘a le Meta, ‘e tete’e ‘i lea fa’ai’uga mā ‘o le ‘ā o lātou ‘apiliina.

Link to RNZ (Article) translated by: https://www.rnz.co.nz/news/world/590574/meta-ordered-to-pay-us-375-million-in-new-mexico-trial-over-child-exploitation-user-safety-claims

ATA: Meta / Facebook.

‘Ua fa’amāvae fa’afuase’i le fa’atonu sili na tōfia ‘e Peresetene Donald Trump ‘o le Fa’alāpotopotoga ‘a le Iūnaite Setete ‘e iloiloina fa’amatalaga ‘i faiga fa’atelolisi ma fa’atūlaga le tali atu ‘i gāioiga fa’atupu fa’alavelave.  ‘Ua tutupu a’e ai ni lagona ma ni manatu ‘o nisi, ‘i le fa’alētonu ‘o ni fuafuaga ‘i le taua ‘e fa’asaga ‘i Iran.

Na fa’aalia ‘e Joe Kent ‘i luga ‘o le X ‘i le Aso Lua, ‘ua iai lana fa’ai’uga ‘e fa’amāvae ai, ma vave ‘āmata fa’amamaluina loa.  ‘E lē mafai ‘ona ia lagolagoina le fa’aauau pea ‘o le taua ‘i Iran.  ‘E lēai se fa’amata’u lata mai mō ‘Amerika mai iā Iran ma ‘ua manino lava, na ‘āmata ‘e le Iūnaite Setete le taua, ‘ona ‘o le ‘una’i mālosi mai ‘a ‘Isarā’elu ma fa’alāpotopotoga mālolosi ‘o lo’o ūna’iina mālosi le suiga ‘o pōlisi po’o tūlāfono ‘a ‘Amerika ‘ina ‘ia fetaui ma ‘i lātou pei ‘ona fa’aalia ‘e Kent.

‘O le fa’amāvaega ‘a Kent ‘o se tagata maualuga muamua lea ‘ua fa’amāvae mai le nofoa’iga lona lua ‘a Trump mai se pōlisi tele.  Na saunoa Trump, ‘o se mea lelei le fa’amāvae ‘o Kent ‘ona ‘o lona tete’e ‘i le taua ‘i Iran, ma ‘e lē mana’omia itū’āiga tagata fa’apea, ‘e lē popoto, ‘e vaivai tele mō le puipuiga ‘o le Iūnaite Setete. 

Na tu’ua’ia ‘e Kent sui ‘o le mālō ‘o ‘Isarā’elu fa’apea le ‘au tusitala ‘ona ‘o lo lātou ta’ita’iina sesē ‘o Trump ‘e uiga ‘i le fa’amata’uina ‘o ‘Amerika ‘e Iran.

Link to RNZ (Article) translated by: https://www.rnz.co.nz/news/world/589873/iran-posed-no-imminent-threat-to-our-nation-trump-appointed-intelligence-official-resigns-over-iran-war

ATA: Tom Williams/CQ-Roll Call, Inc./Getty Images/File via CNN Newsource

‘O le asō ‘ua ‘atoa iai le sefulu ‘o aso talu ‘ona faia osofa’iga ‘a ‘Amerika ma ‘Isarā’elu ‘e fa’asaga ‘i le atunu’u ‘o Iran, ma ‘amata ai le taua lea ‘ua vevela ai nei ‘i Sasa’e Tūtotonu.

‘O le Aso To’ona’i lea na faia ai se fa’asalalauga aloā’ia ‘a le Peresetene ‘o le mālō Iran ‘i luga ‘o le televise ma ia fa’ato’ese ane ai ‘i mālō latou te tuā’oi ‘i le Fagaloa ‘o Peresia, ‘ona ‘o osofa’iga ‘ua ‘uma ‘ona fai ane ‘i ia atunu’u ‘e le fitafita ‘a Iran.

Sa fa’aālia ai ‘e le ali’i peresetene ‘o Masoud Pezeshkian, ‘i lea fa’asalalauga, ‘e lē toe faia nisi osofa’iga ‘a Iran ‘i atunu’u ‘Alapi nei latou te tuā’oi, sē’ia vaganā, ‘ua fa’aaogāina ō latou laufanua ‘e faia ane ai ni osofa’iga āga’i atu ‘iā Iran.

Peita’i, ‘o nai itūlā mulimuli ane ai, ‘ae lipotia mai le pāpā ‘o ni meatau fa’atonutonu ma ni pomu ‘i totonu ‘o atunu’u ‘e āofia ai Bahrain, Qatar, ma le UAE -le United Arab Emirates.

‘O le Aso Sā lea na fa’ailoa mai ai ‘e le ali’i peresetene ‘Amerika ‘o Donald Trump, ‘i luga ‘o le Truth Social, ‘e fa’apea, ‘o le ‘a āga’i ‘ina mamafa osofa’iga fa’asaga ‘iā Iran, ma ‘ua iai le fuafuaga ‘e fa’alautele atu ‘i isi vāega ‘o lenei atunu’u ia osofa’iga ‘a ‘Amerika.

‘Ua ‘uma ‘ona folafola ‘e Donald Trump, ‘o le taua ‘ua faia nei ma Iran, ‘e fa’atō’a tāofi ma tu’u, pē ‘a si’ilima aloā’ia le Mālō ‘o Iran.

ATA: Getty Images / BBC.

‘O lo’o tālia e se ‘āiga Niu Sila Sāmoa ‘e nonofo ‘i Kuwait se tali atu ‘a le Mālō ‘i se aso ‘e mafai ai ‘ona toe taliu saogālēmū mai ai ‘i le atunu’u, ‘ona ‘o le tūlaga lē mautinoa ‘i le taua ‘i sasa’e tūtotonu ‘i le taimi nei. ‘I se fa’amatalaga mai le Minisitā ‘o le Vā ‘i fafo Vaovasamānaia Winston Peters, ‘e fa’apea ‘o le ‘ā ‘ave le fa’amuamua ‘a va’alele ma le ‘au tau ‘a Niu Sila ‘e ‘ave’ese mai tagata Niu Sila ‘o lo’o nonofo latalata ‘i pitonu’u ‘o lo’o lamatia ai ō latou soifua.

‘O Sinsemillia Magele ma lona to’alua ‘o Sage fa’apea le lā fānau to’alua iā Koulton ma Malia-Lavalea na malaga i Kuwait iā Mē 2021. ‘O le ulugāli’i ‘e faiā’oga ‘uma, ma ‘o lo’o iai fo’i ma le aunty ‘o tamaiti iā Pauline Toleafoa. ‘O lo’o iai se fuafuaga ‘a le ‘āiga ‘e toe malaga ‘ese mai ma Kuwait. Na maua le avanoa ‘e talanoa ai le ‘āiga ma le Leitiō Niu Sila ‘i le taeao ‘ananafi ‘i luga ‘o le telefoni, ma na saunoa Sage, ‘o le tele ‘o taimi ‘e le’o momoe, ‘ona ‘o le fa’alogoina ‘o leo ‘o sailini ‘a leoleo ma ta’avale falema’i, fa’apea ma leo ‘o pomu.

‘I se līpoti mai le Soifua Mālōlōina a Kuwait na fa’aalia ai se teienetiti 11 tausaga le matua, na maliu mai ‘i pomu pa’ū’ū mai luga.

‘O le ‘āiga nei ‘o tagatanu’u Niu Sila, a’o Māori fo’i ma Sāmoa.

Link to RNZ (Article) translated: https://www.rnz.co.nz/news/world/588732/new-zealand-family-in-kuwait-waits-to-hear-if-they-can-return-home

ATA: Supplied to RNZ.

‘Ua fa’aleo se lapata’iga ‘a le Peresetene ‘o le Iūnaite Setete, Donald Trump, ‘e fa’apea ‘e pei ‘o se galu tele ‘ia osofa’iga ‘e fa’asaga ‘iā Iran ia ‘e foufou mai.  Na ia tā’ua ‘i luga ‘o le CNN, ‘e le’i ‘āmata osofa’iga mamafa ‘a le Iūnaite Setete ‘i le pūlega ‘a Iran.  ‘E o’o mai anapō ‘o fa’aauau pea ‘ona tafana meatau fa’atonutonu mamao ‘i luga ane ‘o Sasa’e Tūtotonu.

‘Ua māe’a ‘ona saunoa fa’alaua’itele nisi ‘o ta’ita’i ‘o le faigāmālō ‘a Trump ‘e uiga ‘i la lātou osofa’iga lea ‘ua fa’aigoaina ‘o le Operation Epic Fury mō le taimi muamua ‘i se feiloa’iga ma Tusitala ‘i le Pentagon.  Na fa’aalia ‘e le Iūnaite Setete, ‘o le fa’amoemoega ‘autū ‘o le taua, ‘e le’o le suiga ‘o le ta’ita’iga ‘a Iran, ‘e ui ‘ua māliliu ai ta’ita’i ‘o Iran ‘e aofia ai Ayatollah Ali Khamenei. 

Na folafola ‘e le Failautusi ‘o le Puipuiga ‘a ‘Amerika, Pete Hegseth, ‘e le’o Iraq lenei, ‘e le’o se taua ‘e fa’apea ‘e lē ‘uma. 

Peita’i na folafola ‘e Iran, ‘ua sāuni mō se taua ‘umi ma ‘ua o lātou mata’itūina nofoaga ‘autū ‘a le militeli ‘a le Iūnaite Setete ‘i isi mālō ‘i le Vaifagaloa.  Na fa’aalia ‘e Kuwait, na sesē ‘ona lātou fanaina ‘i lalo nisi ‘o va’alele ‘a le Iūnaite Setete.

Link to RNZ World News (Article) translated: https://www.rnz.co.nz/news/world/588519/trump-seeks-to-justify-iran-war-but-stated-objectives-shift

ATA: The White House / Facebook.

Na fa’aalia ‘e ‘Ausetālia ‘i le Aso Lua, na lavea pe na a’afia le nofoaga ‘autū ‘a la lātou militeli ‘i Sasa’e Tūtotonu mai se osofa’iga ‘o masini felelei fa’atonutonu (drones) ‘a Iran ‘i le fa’ai’uga ‘o le vaiaso, ‘ae ‘o lo’o saogalēmū ‘uma la lātou ‘aufaigāluega.

Na saunoa le Minisitā ‘o le Puipuiga ‘a ‘Ausetālia, Richard Marles, ‘e fa’amaonia līpoti, ‘i a’afiaga ‘o la lātou nofoaga ‘autū ‘i Al Minhad, pe tusa lea ma le 24 kilomita le mamao ‘i saute ‘o Dubai. 

‘E lagolagoina ‘e le Palemia ‘o ‘Ausetālia, Anthony Albanese le osofa’iga ‘a le Iūnaite Setete ma ‘Isarā’elu.  Na fa’aalia ‘e fa’apea ‘e to’a 115,000 tagātānu’u ‘Ausetālia ‘i Sasa’e Tūtotonu, ‘e le’o mafai ‘ona malaga ‘ese ‘ona ‘o le tāpuniga ‘o feoā’iga talu ai le taua.  Talu mai le tausaga ‘e 2003, na tali ai ‘i le nofoaga ‘autū ‘o le Al Minhad Air Base, vaegā’au ‘a ‘Ausetālia ma ‘avea ma nofoaga ‘autū ‘a ‘Ausetālia ‘i ana gāluega fa’atino ‘i totonu ‘o Sasa’e Tūtotonu. 

‘E o’o atu ‘i le to’a 80 tagata ‘Ausetālia ‘i lea nofoaga ‘i so’o se taimi, ‘e tusa ai ma fa’amatalaga ‘a le militeli ‘a ‘Ausetālia.

Link to RNZ World News (Article) translated: https://www.rnz.co.nz/news/world/588498/australia-s-middle-east-military-hq-hit-by-iranian-drone-attack

ATA: RNZ / Samuel Rillstone