‘Ua sainia ‘e Peresetene Donald Trump se pōloa’iga ‘e fa’atatau ‘i le fuafuaga ‘a le mālō mō tuipuipui ‘o tamaiti, mā ‘o lo’o fīnau ai, ‘e tatau ‘ona fa’aitīitia ifo le aofa’iga ‘o tui puipui ‘o fānau iti, ‘i se piliota ‘e ‘umi atu ‘e ui ‘e la’itiiti se fa’amaoniga fa’asaienitisi ‘e lagolagoina ai suiga tetele ia ‘ua aofia ‘i le pōloa’iga.

‘Ua fautuaina ai le vaevae ‘o tui ‘o le MMR po’o le mami, mīsela ma le rubella, ‘i ni tui ‘ese’ese se tolu, mā ‘ua tā’ua ‘o se suiga tele ‘ua tu’ufa’afeagai ma le talitonuga ta’atele ‘o su’esu’ega fa’asaienisi peita’i na tausisi pea Trump ‘i nai māsina ‘ua tuana’i, ‘e tatau ‘ona toe sui ‘ātoa le faiga ‘o ia tui puipui.

Na tā’ua ‘i līpoti ‘a le Leitiō Niu Sila, na faia lea folasaga ‘a Trump, ‘a’o fa’atasi ai ma ni fa’auluulūga ‘o le soifua mālōlōina, ‘e aofia ai le Failautusi ‘o le Health and Human Services ‘a le Iūnaite Setete, Robert F Kennedy Jr, ma na ia faia ai ni saunoaga ‘e ta’ita’iina sesē ai tagata mā ‘e lē moni ‘e fa’atatau ‘i tui puipui, ‘e aofia ai sana fa’amatalaga ‘e fa’apea ‘o le tui puipui ‘o le MMR, ‘e mafai ‘ona fa’apea ‘e matuā mata’utia lava ma ‘e ono oti ai le tagata. 

Na saunoa le ali’i senatoa ‘o Bill Cassidy, ‘o ia fo’i ‘o se fōma’i, ‘e sesē tele lea pōloa’iga.  ‘E lēai se tomai ‘o le Peresetene ‘e faia ai ia suiga.  ‘E matuā saogalēmū ma sefe tui puipui mā ‘e aogā fo’i.  ‘E lē ‘o tui puipui ‘e ala ai ‘ona māfua le ‘ōtisi.  ‘O le vaevae fo’i ‘o tui puipui, ‘o le ‘ā itiiti ifo ai fo’i le puipuiga ma le saogalēmū ‘o tamaiti pei ‘ona saunoa le ali’i senatoa.

Link to RNZ (Article): https://www.rnz.co.nz/news/world/961925/trump-signs-executive-order-aimed-at-reducing-number-of-recommended-childhood-vaccines

IMAGE/ATA: The White House Facebook.

‘Ua salalau solo ‘i luga o le ‘initaneti tala a’o sā’afiafiga mō le teineititi Sāmoa iā Leneah Taeaoalii 10 tausaga, lea na fa’ata’otolia ‘i le falema’i ‘i Utah ma fa’amānāva ‘i le masini fa’aola, ‘ina ua malemo ‘i se vai ‘i Willow Pond ‘i le aso 31 o Iūlai. ‘Ua fa’amāonia mai ‘i līpoti a le ‘aufa’asalalau ‘a le ABC, ‘o le vaiaso nei ‘o le ‘ā ‘ave’ese ai le masini fa’aola, ma fa’amāvae atu ona ‘āiga, ma le to’atele ‘o ona ‘āiga na malaga mai ‘i Sāmoa.

‘O Leneah ma lona uso la’ititi na i le paka ma le lā tamā iā Fotu Taeaoalii, ma na mo’omia ‘e le tamā ona fa’aaogā le faleui ‘a ali’i, ma fa’atonu tēneiti ‘e fa’atali i fafo ane o le faleui. Peita’i, na aga’i atu Leneah ma lona uso la’ititi 9 tausaga ma ta’a’alo lata i le vai, ma tau’ai ‘iai ō lā se’evae. Na mamau vae ‘o teneiti ‘i le palapala ma gōgōto ai ‘i lalo i le vai.

Na va’aia Leneah o tago tūlei ‘i luga lona uso la’ititi, ma fa’asao mai ai, peita’i na māgoto ‘i le vai, ‘e tusa ai ma līpoti. Na viliina e tagata leoleo, ma sa taumafai le tamā ‘e lavea’i mai Leneah, peita’i ‘e lē ‘ato’atoa lona mālosi, ma e maua Taeaoalii ‘i le fa’ama’i o le Parkinsons disease.

‘E tusa ma le 10 ‘i le 15 mīnute ‘o ‘i lalo le vai Leneah, ma ‘ua fuafua lona ‘āiga ‘e ‘ave’ese ma le masini fa’aola. ‘O lo’o momoli mai se fautuaga ‘a le ‘āiga ‘o Leneah ‘i mātua, ina ‘ia ‘avea le fa’alavelave na tupu ‘iā Leneah ma fe’au tāua mō tagata ‘uma, ‘aemaise ‘o le sēkone ‘e mafai ‘ona malemo ai se tamaititi.

Link to ABC4 (Article): https://www.abc4.com/news/wasatch-front/family-speaks-10-year-old-drowning-willow-pond/

IMAGE/ATA: Leneah (left) and her sister. Courtesy: Connie Bradshaw

‘Ua o’o atu i le to’a 6125 tagata ‘ua fa’amaonia ‘ua māliliu ‘i māfui’e ‘e lua ‘i Venesuela ‘i le māsina ‘o Iuni pei ‘ona fa’aalia ‘i le Aso Gafua.

‘O le aso 24 Iuni, ‘e lua mafui’e na lūlūina ai le atunu’u, ‘e 7.2 ma le 7.5 le mālolosi, ma sōlofa ai le lata ‘i le 200 ‘o fale, mā ‘o le tele lava ‘o ia fale na fa’aleagaina ‘i le setete ‘o La Guaira. 

‘O lo’o fa’aauau pea gāluega lavea’i ma ‘ua fesoasoani ‘āiga ‘e laga fale na fa’aleagaina ‘e sa’ili o lātou tagata na a’afia ai, ‘ae lata ‘i le 17,000 tagata na mānunu’a ‘i ia mafui’e.  ‘E tusa ma le 1400 tagata ‘o lo’o sā’ilia pea ‘e tusa ai ma līpoti peita’i, ‘e iai le talitonuga ‘o nisi, ‘e o’o atu lava ‘i le 10,000.

Link to RNZ (Article): https://www.rnz.co.nz/news/world/884707/death-toll-from-venezuela-quakes-rises-past-6000

IMAGE/ATA: SCR (file).

E 7.1 le mālosi ‘o se māfui’e na lūlūina ai Kyushu ‘i Iāpani ‘i le Aso Lua, na motusia ai le ‘eletise ‘i le faitau afe ‘o ‘āiga, māvaevae ‘auala tetele ma ‘e o’o mai ‘i le pō anapō ‘ua o’o atu ‘i le to’a 50 tagata mānunu’a.  Na fa’aalia ‘e le Palemia ‘o Iāpani, Sanae Takaichi, ‘e le’i māua ‘i le taimi nei, le faitau aofa’i ‘o tagata ‘ua a’afia mai le māfui’e. 

‘E tele ni fale na fa’aleagaina, ‘e aofia ai le mall ‘o le Aeon mō fa’atauga.  ‘O Iāpani se tasi ‘o atunu’u ‘e lamatia tele mai māfui’e mā ‘e tusa ma le 20 pasene ‘o māfui’e ‘e tutupu ‘i le lalolagi, ‘o māfui’e ia ‘e lūlūina ai Iāpani.

Link to RNZ (Article): https://www.rnz.co.nz/news/world/820459/magnitude-7-point-1-earthquake-hits-japan-s-kyushu-region

IMAGE/ATA: SCR (file).

Na tula’i mai ni solo tete’e i le tele ‘o a’ai ‘i Ukraine ‘i le tāeao o le Aso Tofi, ona ‘o le ‘ave’esea ‘o le Minisitā lailoa o le Puipuiga, Mykhailo Fedorov mai lona tofiga. Na molimauina ‘e tusitala a le AFP ‘i Kyiv le silia ma le 1000 o tagata na potopoto ‘i se malae tūtotonu o le taulaga.

Sā o lātou usuina le vi’i ‘o le atunu’u o Ukraine, sisi a’e le tagāvai ‘o Ukraine ma le Iuni a Europa ma tauvala’au ‘ina ‘ia toe fa’afo’i Fedorov ‘i lona tofiga. ‘E na’o le ono māsina talu ona tōfia Fedorov ‘i lea tofiga, peita’i ua lauiloa ‘o ia ‘o se ta’ita’i na taumafai ‘e fa’afou ma toe fa’alelei vaegā’au ‘a Ukraine, lea ua matuā a’afia ma vaivai ona ‘o le silia ma le fā tausaga ‘o osofa’iga a Lūsia.

Link to RNZ (Article): https://www.rnz.co.nz/news/world/726557/protests-erupt-across-ukraine-against-removal-of-defence-minister

IMAGE/ATA: Mykhailo Fedorov Facebook

‘O le pō ‘o le Aso To’ona’i na toe tu’ua ai Niu Sila ‘e le palemia ‘o le mālō Initia, ‘o Narendra Modi, le ulua’i palemia ‘o lea atunu’u ‘ua malaga asiasi mai ‘i Niu Sila ‘i totonu ‘o le 40 tausaga ‘ua tuana’i.

‘A’o iai Modi ‘i ‘Aukilani mō le aso ‘e tasi, sā o lā’ua fa’ailoa mai ai  fa’alaua’itele fa’atasi ma le palemia ‘o Niu Sila, ‘iā Tuisinavemaulumot’ootua Christopher Luxon, le si’itia ai ‘o le vāfealoa’i ‘o mālō ‘e lua, ‘ua ‘avea ai nei ma (faigā pā’aga ‘autu)… “strategic partnership” , ‘e aofia ai le fa’amoemoe mō le fa’aluaina ‘o le aofa’i ‘o ‘oloa fefa’ataua’i ‘i le vā ‘o atunu’u ‘e lua, ma le fa’alolotoina ai ‘o lā so’otaga tau ‘i le puipuiga.

Sā iloga ‘ona fa’atumulia le Spark Arena ‘i ‘Aukilani, ‘i tagata ‘Initia ‘ua nonofo ma fa’amautū ‘i Niu Sia sā fa’atasi atu ‘i ai ‘i le fia feiloa’i ma fa’ailoa lo lātou lagolagoina ‘o le ali’i palemia ‘o le mālō tele ‘o ‘Initia, le atunu’u ‘e aupito ‘i to’atele le faitau aofa’i ‘o ona tagata ‘i le lalolagi ‘ātoa mā ‘o le Mālō Temokarasi aupito ‘i telē lea ‘o le lalolagi.

‘I lana saunoaga fa’afetai ‘i le Mālō Niu Sila ‘i le gagana Hindi, ‘e fa’alua ‘ona tā’ua ai ‘e Narendra Modi ‘e fa’apea ‘ua ‘ioe le mālō Niu Sila ‘i se vaegātupe ‘e o’o ‘i le $20-Piliona ‘e ‘inivesi ‘i ni ātina’e ‘i totonu ‘o ‘Initia ‘i le 15 tausaga ‘o lumana’i ma ‘ia fa’aalia ai ‘e tatau ‘ona a’afia le Mālō Niu Sila ‘i le fa’atupula’ia ‘o le ātina’e ‘o le mālō ‘Initia.

Peita’i lā, ‘o lea matā’upu, ‘e lē talia lelei ‘e le Ta’ita’i ‘o le Labour ‘iā Chris Hipkins ‘ae fa’apea le Ta’ita’i ‘o le NZ First, ‘iā Vaosamanaia Winston Peters.

Na fa’aalia ‘e Hipkins ‘i le ‘au fa’asalalau, ‘e tāua le faigā pā’aga ‘autū ‘i le vā ‘o mālō ‘e lua, ‘ae peita’i, ‘e iai a’afiaga pe ‘ā fai ‘o le ‘ā lē mafai ‘e Niu Sila ‘ona fa’atino lana pitolā’au, ‘e pei ‘ona mālilie ‘i ai.

‘E le’i ‘āuai le minisitā ‘o le  Vā ‘i Fafo ‘i sāuniga fa’alemālō mō le palemia ‘o ‘Initia, ‘ona ‘o lo’o malaga ‘i Singapore fa’apea ma Iāpani.

‘Ae pei ‘ona silafia, ‘e lē lagolagoina ‘e le ta’ita’i ‘o le NZ First le Feagaiga tau Fefa’ataua’iga ‘i le vā ‘o Niu Sila ma ‘Initia, ‘ona ‘o nisi ‘o aiāiga ‘o lea feagaiga ‘o lo’o tete’e ‘i ai lana pātī.

Na fesiligia le ali’i palemia ‘i le matā’upu lenei ‘e tusa ‘o le $20-Piliona mō ni ātīna’e ‘e fia fa’atino ‘i totonu ‘o ‘Initia, ‘ae na tā’ua ‘e Christopher Luxon, ‘o le uiga ‘o le matā’upu lea, ‘o le ‘ioega ‘e ātīna’e ai ma fa’ailoa ni mea tau ‘inivesi ‘i totonu ‘o ‘Initia, ‘ae fa’apea ai fo’i ma Niu Sila.

Link to RNZ (Article) written by Tuwhenuaroa Natanahira, Political reporter: https://www.rnz.co.nz/news/politics/700635/luxon-and-modi-agree-on-partnership-with-trade-and-maritime-security-ambitions

IMAGE/ATA: Pool/NZME/Dean Purcell (RNZ).

‘Ua atagia mai le ono ‘avea ‘o Andy Burnham ma palemia fou ‘o Peretānia ‘ona ‘ua to’atele ‘i lātou ‘o le vāega fa’a’upufai ‘a le Labour ‘ua tōfiaina ‘o ia ‘e sui tūlaga ‘iā Keir Starmer ‘e ‘avea ma ta’ita’i ‘o le vāega. 

Na’o Burnham le sui o le palemene mai le vāega fa’a’upufai ‘o lo’o ta’ita’ia le mālō, lea ‘ua fa’ailoa manino fa’alaua’itele ‘o se sui tauvā ‘e suia Starmer.  ‘O le māsina talu ai lea na fa’amāvae ai Starmer. 

‘E to’a 322 faipule mai le aofa’iga ‘e to’a 403 ‘ua fa’ailoa lo lātou lagolagoina ‘o Burnham ‘i le aso muamua ‘o faigā filifiliga.

Link to RNZ (Article): https://www.rnz.co.nz/news/world/696396/burnham-on-track-to-be-uk-pm-as-scores-of-labour-mps-back-leadership-bid

IMAGE/ATA: Andy Burnham Facebook

‘Ua māe’a se fa’amasinoga ‘e fa’asaga ‘i le YouTube, ‘o se tagi ‘a se tamaitiiti ‘e fa’apea na fa’aleagaina le soifua mālōlōina ‘o lona māfaufau ‘ona ‘o le YouTube pei ‘ona fa’aalia ‘e ana lōia ‘i le Aso Lua.  ‘E le’o fa’ailoaina le fa’ai’uga na faia pei ‘ona tā’ua ‘e lōia.  ‘E 4 ‘au’aunaga ‘e aofia ai le YouTube, Instagram ‘a le Meta, Snapchat ma le TikTok ‘a le ByteDance ia na tā’ua ‘i le matā’upu.  ‘O le māsina ‘o Iūlai ‘e tali ai mōliaga ‘o isi kamupanī ‘e tolu.

Na fa’aalia ‘e le Google ‘e ala ‘i la lātou so’o’upu ‘o Jose Castaneda  ‘ua māe’a ona fofō le matā’upu. 

‘O R.K.C, ‘o se tama ’e 16 tausaga le matua mai Florida, ma na ia tā’ua, na ‘āmata ‘ona ia fa’aaogāina ‘upega ‘o feso’ota’iga ‘ina ‘ua fa’ato’ā valu ona tausaga.  Na ‘āmata mai ai lava ‘ona pipi’i ai lona māfaufau ‘o se amioga ‘ua lē mafai ‘ona tu’u, lē lava ai lana moe ma a’afia ai ‘i isi fa’afītāuli ‘o le soifua mālōloina ‘e pei ‘o le popole ma le atuatuvale ‘e tusa ai ma fa’amaumauga ‘i le fa’amasinoga.  ‘O le aso 27 Iūlai lea ‘ua fa’atūlaga mō le isi fa’amasinoga.

‘E silia ma le 3300 ni tagi ‘o lo’o aofia ai ni talosaga ‘e fa’atatau ‘i a’afiaga ‘ua lē mafai ‘ona tu’u le naunau ‘i feso’ota’iga ‘i luga ‘o le ‘initaneti lea ‘e fa’apea ‘o lo’o tatālia ‘i le setete ‘o Kalefonia. 

Link to RNZ (Article): https://www.rnz.co.nz/news/science-and-technology/618752/google-s-youtube-settles-case-over-social-media-harm-to-children

IMAGE/ATA: SCR (file).

‘Ua faia ‘e le Senate ‘a le Iūnaite Setete se fa’ai’uga, ‘ua fa’atonuina ai le Peresetene ‘ina ‘ia ‘ave’esea vaegā’au ‘a le militeli mai le taua ma Iran, ma ‘ua tā’ua ‘o se fa’ai’uga maoa’e lea ‘ua tete’e ai ‘ia Donald Trump ma ‘o se fe’au mālosi ‘ua fa’ailoa atu ai, ‘e lē lava le lagolago mai le Konekeresi mō le taua.

‘E lē fa’atasi ‘ona fa’amālosia ‘e le Democrats ni pālota ‘ina ‘ia fa’atapula’a le mālosi’aga ‘o Trump ‘i le taua, mā ‘e lē gata ‘i totonu ‘o le Maota ‘o Sui ‘ae fa’apea fo’i ‘i le Senate, ma ‘ua lipotia ‘e fa’apea ‘o se taumafaiga na i’u lava ‘ina lagolagoina ‘e le to’atele ‘o sui ‘o le Democrats pei ‘ona mōlimauina ‘i nai vaiaso ‘ua tuana’i atu.  ‘O le i’uga ‘o le pālota, ‘e 50 ‘i le 48. 

Link to RNZ (Article): https://www.rnz.co.nz/news/world/618676/us-senate-votes-to-limit-trump-s-iran-war-powers-in-rare-rebuke

IMAGE/ATA: White House Facebook

‘Ua fa’amāvae mai lona tofi le ali’i Palemia ‘o le Mālō Peretānia Tele, ‘o Sir Keir Starmer ‘ae le’i ‘atoa lelei se lua tausaga ‘o lana nofoā’iga.

Sa tele ‘ina lē fiafia tagata ‘i lenei ali’i talu ‘ona tūla’i mai ‘e ta’ita’i le faigāmālō ‘a le Labour ‘i totonu ‘o Peretānia ‘ona ‘o le fesuisuia’i ‘o ni ana fa’ai’uga fai ma le lē fa’ataunu’uina ‘o ni faiga fa’avae sā folafola.

‘I lana saunoāga āloa’ia ‘e fa’ailoa ai lona fa’amāvae mai le tofi ta’ita’i ‘o le patī ‘a le Labour ‘a Peretānia, na tā’ua ai ‘e Sir Keir Starmer, ‘o fa’ai’uga ‘uma sā ia faia a’o ia ‘umia le tofi Pālemia, sā ia ‘ave ai le fa’amuamua mō se lelei ‘o le atunu’u ‘atoa, ‘o le māfua’aga lea ‘ua manatu ai ‘o le ‘a fa’ase’etuāgalu ‘o ia mai tofiga ta’ita’i ‘o le patī ‘a le Labour.

‘O le māsina fou ‘o Iulai, lea ‘o le ‘a ‘amata ai ‘ona fa’agāsolo fuafuaga mō le filifilia ‘o se ta’ita’i fou ‘o le Labour, ‘ae ‘o le ‘a tau’aveina pea ‘e Sir Keir Starmer le tofi ta’ita’i ‘o le mālō, se’ia o’o ‘ina mautū le filifilia ‘o se tasi ‘e suitūlaga atu ‘iā te ia ‘i le māsina ‘o Sētema.

Na fa’ailoa mai ‘e le ali’i Pālemia ‘o Niu Sila, ‘iā Tuisinavemaulumoto’otua Christopher Luxon, ‘o Sir Keir Starmer, ‘o se ta’ita’i sā ō lā’ua gālulue vāvā lalata.

‘Ua saunoa fa’afetai  fo’i le Peresetene ‘o le Iuni ‘o Mālō Europa, ‘iā Ursula von der Leyen, ma ia vī’ia le sao ‘o Sir Keir Starmer ‘i le fa’amālosia ma le fa’aleleia ‘o le puipuiga ‘o mālō Europa.

‘O Sir Keir Starmer ‘ua 63 tausaga ‘o lona soifua, ‘o ia ‘o se lōia fa’au’uina ma ‘o ia le Palemia lona ono ‘o Peretānia ‘i totonu ‘o le sefulu tausaga ‘ua mavae atu nei.

IMAGE/ATA: Screengrab / Keir Starmer Facebook livestream