‘I se tala mai ‘i le Pasefika: Līpotia mai le vevesi ‘o sui ‘a faipule ‘o le Palemene ‘o le mālō Vanuatu mō le sā’ilia ‘o ni sēleni mō a lātou fa’atōsina mō se pālota fa’anatinati ‘ua māfua, ‘ona ‘o le fa’ai’uga ‘i le māsina nei, ‘a le ali’i Peresetene ‘o lea mālō, ‘o Nikenike Vurobaravu, ‘e fa’ata’ape āloa’ia le Palemene ‘o le atunu’u.

‘O se līpoti ‘i le nusipepa ‘o le Vanuatu Daily Post, na tā’ua ai ‘e le Minisitā ‘o matā’upu fa’alōtoifale ‘a Vanuatu, ‘o Andrew Napuat ‘o le pālota fa’anatinati lenei ‘e ono fa’ataunu’uina ‘i se taimi ‘o le tausaga fou.

Na tā’ua fo’i ‘e le nusipepa, ‘o lo’o ‘ese’ese tāofi ma manatu ‘o tagata ‘i le fa’ai’uga ‘a le ali’i peresetene, ‘ua fa’ata’apeina ai le Palemene, ‘aemaise ‘ua faia ‘a’o loma ai le fa’atūina ‘o se lafo ‘o le lē fa’atuatuaina ‘o le ali’i palemia ‘o le atunu’u ‘o Charlot Salwai, ‘ātoa ai ma se isi lafo ‘ua fa’atūina ‘e fa’ate’a ai mai lona tofi le ali’i peresetene ‘o lea atunu’u.

Na tā’ua ‘e fa’apea, ‘o lea ‘ua ‘ave ‘e le itū agai ‘i le fa’amasinoga lenei matā’upu, mō se fa’amanīnoga āloaia. 
Na tā’ua mai fo’i ‘e fa’apea, ‘o le fa’alua ai lea ‘o ni taumafaiga ‘a le ali’i peresetene ‘o Vanuatu ‘e fa’ata’ape le Palemene ‘o le atunu’u ‘i totonu ‘o le lua tausaga ‘ua tuana’i atu nei.

ATA: Vanuatu Parliament / Vanuatu Daily Post.

Ua sūia le faigāmālō ‘a Peretania, ‘ina ‘ua manumālō Sir Keir Starmer ma lana vāega fa’a’upufai ‘a le Labour ‘i le Pālota 2024.

Talu mai le tausaga 2010, ‘o sē’ei lava ‘i le ta’itā’iga ‘o le mālō le vāega fa’a’upufai ‘a le Conservatives, ‘ae āgaia lava ‘e le Labour le mālō ‘i lata ‘i le 14 tausaga.

‘O le pālota talu ai nei, na manumālō ai le Conservatives ‘i le 2019 a’o ta’ita’i Boris Johnson, mulimuli ane na tuli ‘e lana vāega ‘ona ‘o lape ‘o lana ta’itā’iga ‘i le taimi ‘o le Koviti ma na sui mai ai lea ‘o le ta’ita’i ‘i le tama’ita’i ‘o Liz Truss, ‘ae na’o le 49 aso ‘o lana nofoā’iga, lea na filifilia mai ai Rishi Sunak, ‘o le ulua’i Pālemia Initia-Peretānia, ‘ae ‘ua na’o le 20 māsina ‘o nofoia le nofoa ‘o le Pālemia, ‘ae ‘o lea ‘ua faia le fa’ai’uga ‘a Peretānia, ‘e sui le faigāmālō ‘i le Labour.

‘O lo’o fa’agāsolo pea le faitauga ‘o pālota ‘i lenei taimi, ‘ae ‘o le āta mautinoa ‘i le pālota, ‘ua manumālō le Labour ‘i Peretānia.

PHOTO: Sir Keir Starmer & Wife / UK Flag & Big Ben Clock. Sāmoa Capital Radio