‘Ua fa’amāonia se tagata fou ‘i le mīsela ‘i Uēligitone, ma ua fa’ailoa mai ‘e ono ‘iai sona so’otaga ‘i se faigā malaga mai ‘i atunu’u i fafo. Na tā’ua ‘e le Soifua Mālōlōina a Niu Sila, ‘o lo’o gālulue le National Pacific Health Service ‘e fesoasoani ‘i le tagata ua fa’amāonia, fa’apea ‘i lātou na vāvālalata ma lea tagata, ‘ina ‘ia puipuia mai ai le pepesi ‘o le misela.

‘O lo’o taumafai fo’i le Matāgāluega ‘e fa’ailoa nofoaga sa asia ‘e lē ua a’afia. ‘O nofoaga ua fa’ailoa mai ‘e aofia ai le Salvation Army ‘i Upper Hutt, Canine Solutions ‘i Naenae ma le Romans Kitchen ‘i Lower Hutt, fa’apea isi nofoaga ‘i Wairarapa ma Lower Hutt.

‘O auga o le mīsela ‘e aofia ai le fiva, tale, tafe o le isu ma le mū o mata. ‘E soso’o ai ma le pata o le tino lea ‘e māsani ona ‘amata mai ‘i fōliga.

Link to RNZ (Article): https://www.rnz.co.nz/news/health/1794081/new-measles-case-in-wellington

IMAGE/ATA: CDC Public Health Image Library (RNZ).

‘Ua folafola ‘e le Vāega fa’a’upufai a le National le lātou fa’atinoina ‘o su’esu’ega faia fa’afuase’i mō fuālā’au fa’asāina mō tagata o lo’o maua penefiti sa’ili gāluega le Jobseeker Support, ‘ina ‘ia mautinoa o lo’o lātou sauni ma agava’a ‘e faigāluega.

‘I se pepa ‘o faiga fa’avae na fa’alauiloa ‘e le National, na tā’ua ai, ‘e tele ina mo’omia ona pasi le su’esu’ega mō fuālā’au fa’asāina po’o le drug test, ‘e tagata faigāluega i Niu Sila, ‘ina ‘ia maua pē tūmau ai ‘i se gāluega. ‘O le fuafuaga ‘o se vāega ‘o fuafuaga ‘e lima ‘a le Vāega Fa’a’upufai, lea ‘e taula’i ‘e fesoasoani ai ‘i tagata ‘ina ‘ia maua ni gāluega, ‘ae ‘ia talafeagai fo’i ma gafatia ‘e tagata totogi lāfoga, pei ona fa’alauiloa ‘e le so’o’upu ‘a le National mō le Atina’ega ma Agafeso’ota’i Louise Uptson ‘i Paraparauma ‘i le taeao ‘o le asō.

Fa’aalia ‘e Upston, ‘o le ‘ā ‘amata ‘i le 10,000 su’esu’ega muamua ‘i le tausaga, ma ‘o le ‘a fa’ateleina ‘i tausaga o lumana’i. ‘E tusa ma le 1.5 mīliona tālā ‘i le tausaga ‘e fa’aalu ‘i lea fuafuaga, ma ‘o le ‘ā fa’atupe ‘i le vāega tupe ua fa’aagaaga mō le Matāgāluega mō le Atina’ega ma Agafeso’ota’iga. ‘Ua fuafua fo’i e mafai ona fa’asaoina ai le silia ma le $580 mīliona tālā mai le tausaga fa’aletupe 2027/28 se’ia o’o ‘i le 2030/31.

‘Afai e lē usita’ia e le tagata ana matafaioi pe ‘ā māe’a lea su’esu’ega, ‘o le ‘ā fa’aaogā fa’asalaga māsani, ma ‘e ono aofia ai le fa’aaitiitia ‘o le penefiti.

Link to RNZ (Article): https://www.rnz.co.nz/news/politics_election-2026/1789337/national-promises-random-drug-testing-for-jobseeker-beneficiaries

IMAGE/ATA: NZ Herald

‘Ua folafola ‘e le Leipa le isi ā lātou pōlisi, lātou te fa’amālosia ai kamupanī va’alele ‘e fa’ailoa manino le tau ‘atoa ‘o pāsese mai ‘i le ‘amataga, ‘e aofia ai ma tau fa’aopoopo. ‘O lea pōlisi ‘o le ‘ā fa’amālosia ai fo’i kamupanī va’alele ona ‘otometi ona toe fa’afo’i tupe  ‘o pāsese, pe ‘āfai ‘e fa’alēaogāina faigā malaga, pē faia fo’i ni suiga tetele ‘i faigā malaga ua ‘uma ona fa’atūlagaina.

Na saunoa le ta’ita’i o le Leipa Chris Hipkins e fa’apea, ‘ua taugatā tele femālagaa’iga ‘i va’alele, ma ‘e la’ititi lava se tauvaga ‘i le vā ‘o kamupanī va’alele. Saunoa Hipkins, ‘o lo’o feagai tagata ma le taugatā ‘o le soifuaga, ma ua atili ai ona fa’ataunu’uina faigā malaga tāua, ona ‘o le lē gafatia ‘o tau o pāsese ‘ua iai le taimi nei.

‘O le ‘ā mafai fo’i ona toe fa’afo’i atu ‘e kamupanī va’alele tupe ‘i tagata malaga, pe totogi ni taui tupe, pe ‘ā matuā fa’atuai ona taunu’u ‘ato, pē lē fa’ataunu’uina fo’i ‘au’aunaga ua uma ona totogi. Na saunoa le so’o’upu o le Leipa mō matā’upu tau ‘i pisinisi ma āiā tatau ‘a tagata fa’atau, Arena Williams e fa’apea, ‘e lē tatau ‘i tagata malaga ona tau tauanau mai ā lātou tupe, pe ‘ā fai ‘o se sasi ma se fa’alētonu ‘i le ‘auaunaga ‘a kamupanī va’alele.

Link to RNZ (Article): https://www.rnz.co.nz/news/politics_election-2026/1790464/labour-says-it-will-force-airlines-to-show-real-prices-up-front

IMAGE/ATA: Sam Rillstone / RNZ

‘Ua fa’alauiloa ‘e le NZFirst le fa’atūlagaga ‘o lātou sui tauvā mō la lātou lisi, ‘ua va’aia ai nisi ‘o sui tauvā fou ‘i tūlaga pito ‘i luga nai lō nisi ‘o isi faipule tuai. ‘O Craig Stobo ma Taine Randell ‘ua mauāluga atu ō lā tūlaga ‘i le fa’atūlāgaga  ai lō Jenny Marcoft, Andy Foster, Dr David Wilson ma Jamie Arbuckle.

‘E tusa ai ma le pālota lata mai ‘i su’esu’ega ‘a le RNZ, ‘ua fa’amauina ai le lagolago mō le pātī ‘i le 10.6 pasene. ‘Afai ‘e fa’apea le ī’uga ‘o le pālota, ‘o le ‘ā maua ‘e le pātī ni faipule se 13 ‘e ulufale ‘i totonu ‘o le Palemene.

‘O le fa’atūlagaga pei ‘ona fa’alauiloa mai ‘o

1. Vaovasamanaia Winston Peters
2. Shane Jones
3. Casey Costello
4. Hon Mark Patterson
5. Hon Alfred Ngaro
6. Michael Laws
7. Harete Hipango-Brownlie
8. Craig Stobo
9. Taine Randell
10. Jenny Marcroft
11. Andy Foster
12. Dr David Wilson
13. Jamie Arbuckle
14. Jamie Cleine
15. Tracey Coxhead
16. Hon Ron Mark
17. Jason Herrick
18. Esther Tofilau-Tevaga
19. Penny Gaylor
20. Elliot Ikilei
21. Vicky Hau
22. Bernadette Soares
23. Robert Cookson
24. Mark Arneil
25. Lee Smith

Link to RNZ (Article): https://www.rnz.co.nz/news/politics_election-2026/1780805/nz-first-list-ranks-newcomers-above-sitting-mps

IMAGE/ATA: NZ / Nick Monro

‘Ua māe’a ‘ona filifili ‘au ‘a Sāmoa ‘i ali’i ma tama’ita’i mō le ta’amilosaga ‘o le Ipu ‘o le Lalolagi.  Fa’apea fo’i ‘ona māe’a filifili ‘au ‘a ali’i ma tama’ita’i Niu Sila.  ‘O le ‘au lā ‘a le Fetu Sāmoa –

Fetu Sāmoa

1. Amber Hall (Sydney Roosters)
2. Annetta Nu’uausala (New Zealand Warriors)
3. Christabelle Onesemo-Tuilaepa (New Zealand Warriors)
4. Christian Pio (Wests Tigers)
5. Destiny Mino-Sinapati (Gold Coast Titans)
6. Evania Isa’ako (Gold Coast Titans)
7. Evelyn Roberts (Canterbury Bulldogs)
8. Fanua Rimoni (Gold Coast Titans)
9. Freedom Crichton Ropati (Parramatta Eels)
10. Ivana Lolesio (Gold Coast Titans)
11. Jasmine Fogavini (Gold Coast Titans)
12. Jaydika Tafua (Cronulla Sharks)
13. Jetaya Faifua (Wests Tigers)
14. Laikha Clarke (Gold Coast Titans)
15. Leilani Wilson (Canterbury Bulldogs)
16. Mary Jane Taito (Canterbury Bulldogs)
17. Mercedez Taulelei-Siala (Newcastle Knights)
18. Monica Tagoai (Canterbury Bulldogs)
19. Pauline Piliae-Rasabale (Gold Coast Titans)
20. Sarina Masaga (Gold Coast Titans)
21. Taliah Fuimaono (St George Illawarra Dragons)
22. Tavarna Papalii (Brisbane Broncos)
23. Tyra Ekepati (St George Illawarra Dragons)

Toa Sāmoa

1. Shawn Blore Anae Ulesese (Melbourne Storm)
2. Stephen Crichton (Canterbury-Bankstown Bulldogs)
3. Sua Fa’alogo (Melbourne Storm)
4. Clayton Faulalo (Manly Warringah Sea Eagles)
5. Chanel Harris-Tavita (Warriors)
6. Benaiah Ioelu (Sydney Roosters)
7. Connelly Lemuelu (Dolphins)
8. Spencer Leniu (Sydney Roosters)
9. Jarome Luai (Wests Tigers)
10. Francis Manuleleua (Newcastle Knights)
11. Deine Mariner (Brisbane Broncos)
12. Ata Mariota (Canberra Raiders)
13. Greg Marzhew (Newcastle Knights)
14. Jermaine McEwen (Newcastle Knights)
15. Francis Molo (Dolphins)
16. Junior Paulo (Parramatta Eels)
17. Pasami Saulo (Newcastle Knights)
18. Hamiso Tabuai-Fidow (Dolphins)
19. Izack Tago (Penrith Panthers)
20. Jazz Tevaga (Wakefield Trinity)
21. Brian To’o (Penrith Panthers)
22. Enari Tuala (Canterbury-Bankstown Bulldogs)
23. Ronald Volkman (Parramatta Eels)

IMAGE/ATA: Rugby League Samoa

‘Ua fa’aalia ‘i se sā’ili’iliga fou ‘a le 1News Verian poll, le tūlaga muamua ‘o le Vāega Fa’a’upufai ‘a le National mā ‘e tasi le pasene ‘o lo’o sili ai nai lō le Labour, ‘e 29 ‘i le 28 pasene.  Tūmau pea le Greens ‘i le 16 pasene, New Zealand First 10 pasene, ACT 9 pasene, Opportunity 7 pasene ma le Vāega Fa’a’upufai ‘a Māori, ‘e 1 le pasene. 

‘A fa’apea ‘o pasene ia ‘i le faigāpālota, ‘e tūla’i mai le National ‘i le 35 faipule, NZ First 12 ma le ACT 11, ‘ātoa ‘i ai le to’a 58 ‘o faipule. 

‘I le itū agavale, 33 faipule mō le Labour, 20 Greens, ma le Vāega Fa’a’upufai ‘a Māori ‘e tasi, tu’u fa’atasi ‘e 54 nofoa.  ‘O itū ‘uma ia ‘e lua, ‘e fa’alagolago ‘i le to’avalu ‘a le Opportunity, ‘e fau ai se faigāmālō fou.  ‘O lea sā’ili’iliga na maua ‘i le afiafi ananafi, ‘a’o lumana’i ai le fa’afinauga ‘i le TVNZ lea na fa’atautaia ‘e Jack Tame.  ‘Ae o le sā’ili’iliga ‘a le RNZ-Reid Research, ‘o lo’o tūlaga muamua ai le Labour, 31 ‘i le 26.

Link to RNZ (Article): https://www.rnz.co.nz/news/politics/1764664/national-s-path-to-power-narrows-in-new-poll

IMAGE/ATA: RNZ

‘Ina ‘ua māe’a le fa’afīnauga muamua ‘o le faigāpālota ‘i le vā ‘o ta’ita’i ‘o vāega fa’a’upufai tetele, le National ma le Labour ‘i le pō anapō ‘i le TV1, na fa’aalia ai ‘e le ta’ita’i ‘o le Labour, Chris Hipkins, lona fiafia tele ‘i ana tali na faia ma ia tā’ua ai, sā fa’alagolago lava ‘i le tūlaga ‘e o’o ‘i ai le fa’afīnauga ‘o le pō. Sā va’ava’ai fo’i ‘i uiga ma fōliga va’aia ‘o tagata fa’alogologo na iai, ma taumafai ‘e fa’amautinoa atu ‘i le aofia, ‘o lo’o taumafai ‘e fa’ao’o ma fa’aleo atu ma le manino ona manatu ‘autū.

‘O lona fa’amoemoe ‘autū ‘o le fa’amautinoa atu ‘i tagata Niu Sila, ‘e iai le fuafuaga mautū ma talafeagai ‘a le Labour ‘e foʻia ai le maualuga ‘o le tau ‘o le soifuaga, lea na ia tā‘ua ‘o le matā’upu pito sili lea ‘ona tāua mō tagata pālota.

‘O le 49% ‘o le ‘au pālota na iai ‘i le potu ma sā fa’amasino na iai lo lātou manatu, ‘e mālō Hipkins, ‘ae 24% na manatu ‘e mālō Tuisinavemaulumoto’otua Christopher Luxon.  ‘E 27% ‘e le’i iloa po’o ai ‘e tu’u atu ‘i ai la lātou lagolago.   ‘O matā’upu na fefīnaua’i ai ta’ita’i ‘e to’alua e aofia ai le tūlaga fa’atuatuaina, ‘o le fa’ailoga lanu fa’apea ma le tau ‘o le soifuaga, soifua mālōlōina ‘aemaise ‘o Māori ma Pasefika.  ‘E 90 minute ‘o le fa’afīnauga, ‘ae lata ‘i le 100 tagata pālota na fa’amasino po’o ai le ta’ita’i na pito sili ‘ona lelei ana tali. 

Sā tu’ua’ia ‘e Hipkins ia le palemia ‘i lona faia ‘o ni saunoaga ‘e lē moni, ‘ae lē fa’atasi ‘ona tu’ua’ia ‘e Tuisinavemaulumotootua Luxon le Labour ‘i le faia ‘o ni folafolaga ‘e lē mafai ‘ona fa’atupeina.

Sā le’i tasi le taimi na ‘alo ai Tuisinavemaulumoto’otua mai lona tali atu pe ‘e ono talanoa ‘i le Vāega Fa’a’upufai ‘a le Opportunity pe ‘ā fai ‘e lē mafai ‘e le National ‘ona maua le aofa’iga ‘o nofoa ‘e fau ai se faigāmālō na’o ia. 

Muamua atu, sā fa’ailoa ai ‘e le palemia, ‘e lēai se avanoa ‘e gālulue fa’atasi ai.  ‘E lē mana’o le National ‘e gālulue ma ni pātī ‘e fa’ati’eti’e nisi lāfoga se tele ma ni tau ‘i luga ‘o tagata Niu Sila, ma sā fa’atatau lana saunoaga ‘i le pōlisi ‘a le Opportunity mō ‘ele’ele. 

‘O se tasi ‘o matā’upu na o’o ‘i ai le fa’afīnauga, na saunoa ai Hipkins, ‘o se fasiotigā tagata tele ‘o lo’o tupu pea ‘i Kasa, peita’i pau le saunoaga ‘a Tuisinavemaulumoto’otua, ‘e tatau ‘ona limata’ita’iina Niu Sila ‘e fa’amasinoga fa’avaomālō.  ‘Ina ‘ua fesiligia Hipkins pe iai sona talitonuga, ‘ua fa’atino ‘e ‘Isarā’elu le fa’ao’oga ‘o le oti ‘i ni tagata se to’atele, ‘ae na tali, ‘e iai lona talitonuga, ‘e iai le matā’upu ‘e tatau ‘ona tali ai ‘Isarā’elu.  Na saunoa Luxon, ‘e iai ni fesili ogaoga tele ‘i le matā’upu. 

‘E ‘ese’ese finagalo ‘o ta’ita’i ‘e to’alua pe tatau ‘ona taliaina ma āmana’ia se setete ‘o Pālesitina.  Na saunoa Hipkins, ‘ua tatau ‘ona fa’atino ‘e Niu Sila ‘i le taimi nei.  Na saunoa Tuisinavemaulumoto’otua, ‘e tatau ‘iā Niu Sila ‘ona āmana’ia Pālesitina, peita’i ‘e le’o le taimi lenei. 

‘I le matā’upu ‘o le AI po’o le poto fa’afōliga ‘o masini komipiuta, na saunoa ai Luxon, ‘e fiafia ‘e gālulue fa’atasi ma Hipkins ‘i le faiga ‘o tūlāfono mō le poto fa’afōliga ‘o masini, mā ‘o se vāega ‘e tatau ‘ona gālulue fa’atasi ai. 

Na saunoa Hipkins, ‘ua mamao lava ‘i tua Niu Sila mai isi atunu’u ‘o le lalolagi ‘e fa’atatau ‘i le fa’aaogāga ‘o le AI fa’apea le aiā tatau ma fa’ailoilo ‘o ‘oloa, ‘o meatōtino ‘o le māfaufau ma le puipuiga ‘o tūlaga patino ‘o le ta’ito’atasi.  Na ‘ioe ‘uma ta’ita’i ‘e to’alua la te fa’aaogāina le AI mō su’esu’ega.  Na ta’utino fo’i ‘e Hipkins, na ia fa’aaogāina mō le fa’afīnauga ‘i le pō anapō.

‘I le tūlaga tau ‘i faiga fa’ailoga lanu, na saunoa ai le ta’ita’i ‘o le Labour, na te fa’ate’aina vave lava se minisitā ‘e faia ni saunoga pei ‘o minisitā ‘o le NZ First Vaovasamanaia Winston Peters ma Shane Jones, ‘ia lā lafoga na faia ‘i le tausaga nei.  Sā ia faitioina ai Luxon, ‘e fa’apea ‘e lēai sana gaioiga na faia ‘i ai, ‘e le’i tū ‘e puipui le fa’apotopotoga ‘o tagata mai fafo ‘ina ‘ua faia ‘e ia minisitā ni lafoga fa’ailoga lanu ‘e fa’asaga ‘iā ‘i lātou.

Na o’o fo’i le fa’afīnauga ‘i tūlaga ‘o le soifua mālōlōina ‘aemaise ‘o Māori ma Pasefika. 

‘Ua ātili ‘ona fevaevaea‘i ma mamao ‘ese manatu ‘o tagata Niu Sila, ‘ae ‘ese’ese fo’i o lātou manatu po’o ai ‘e tu’uaia.

Na tā‘ua ‘e Hipkins, ‘o le tiute ‘a ta‘ita‘i fa’a’upufai ‘o le fesoasoani lea ‘i tagata Niu Sila ‘ia maua ni manatu ‘e mafai ‘ona lātou mālilie fa’atasi ai, ‘ae ‘aua ne‘i o’o atu ‘i le tūlaga ‘o le fevaevaea‘i tele ‘e pei ‘ona iai ‘i isi atunu’u.

Link to 1News (Article): https://www.1news.co.nz/2026/10/07/leaders-debate-luxon-hipkins-fire-up-over-cost-of-living-trust-racism/

IMAGE/ATA: 1News.

‘O lea ‘ua o’o ‘i se tau aupito ‘i maoa’e le penisini ‘i totonu ‘o Niu Sila, talu ‘ona ‘āmata le taua ‘i le vā ‘o ‘Amerika ma Iran.

‘O le tau ‘evalesi ‘o le penisini 91, ‘o lea ‘ua o’o ‘i le $3.50.5 sene ‘i le lita ‘i le taimi nei ‘e pei ‘ona lipotia mai ‘e le fa’alāpotopotoga ‘o le Gaspy, lea ‘e māta’itūina le tau ‘o le penisini ma le suāu’u.

Na fa’aālia mai ‘e le ali’i fa’atonu ‘o Mike Newton, ‘ua mauāluga atu le tau ‘i le taimi nei, nai lō le $3.50.2 sene ‘i le lita, lea sa iai ‘i le taimi na vevela ai le taua ia ‘Aperila.

Na ia tā’ua, ‘o le si’itaga ‘ua iai nei, ‘ua soso’o ma le fa’aauau pea ‘ona sili atu ‘i le selau tālā ‘Amerika, le tau ‘o le paelo, ‘o le suāu’u ‘o le Brent Crude, lea ‘ua o’o nei ‘i le $101.5 sene tupe ‘Amerika.

‘Ae lē gata ‘i lea, ‘ae ‘o a’afiaga mai le pa’ū ai ‘o le aogā ‘o le tālā Niu Sila ‘i nai māsina ‘ua mavae atu nei, lea ‘ua tūla’i mai ai nei ‘i le tasi le tālā Niu Sila ‘ ‘i le 55.8 sene tupe ‘Amerika.

‘O le pa’ū ‘i lalo ‘o le aogā ‘o le tālā Niu Sila ‘i fefa’atauā’iga ma isi atunu’u, ‘e māfua ai ‘ona taugata suāu’u ma penisini ia ‘e fa’atauina mai atunu’u ‘i fafo.

Link to RNZ (Article): https://www.rnz.co.nz/news/business/1745943/petrol-price-hits-highest-level-since-start-of-iran-war

IMAGE/ATA: RNZ / Unsplash

‘O lea ‘ua fa’ailoa mai fa’alaua’itele le Fuafuaga tau tupe ‘a le pātī ‘o le Labour, ‘e pei ‘ona sa fa’atalitali iai le to’atele ‘aemaise ‘o le ‘au pālota ‘o Niu Sila.

‘O le fa’ailoaina mai ‘o lenei Fuafuaga ‘Autū ‘a le Labour, ‘e lona Sui So’o’upu mō mea tau tupe ma le tamā’o’āiga, le afioga Pesetātamalelagi Barbara Edmonds, na ia tā’ua ai, ‘o pōlisi ma faiga fa’avae ‘uma pei ‘ona folafola ma pōlōmisi mai ‘e le Labour, ‘o lea ‘ua ‘uma ‘ona fa’atūlaga ma fa’avasega vāegatupe ‘e tatau ‘ona fa’aalu ai.

‘O lo’o aofia ‘i lenei Fuafuaga ‘a le Labour ia se si’itaga ‘o totogi mo le aofa’iga ‘e 65,000 afe ‘o tagata faigaluega ‘i le va’aiga ma le tausiga ‘o isi tagata, ma le ‘aufaigaluega lagolago po’o support workers, ‘o le ‘a tatau ‘ona fa’aalu ai le vāegatupe ‘e tusa ma le $2.5 piliona tālā ‘i totonu ‘o tausaga ‘e fā ma telē ai le avanoa ‘e fetu’una’i ai seleni ma vāegatupe mana’omia mō le tūlaga aoao tetele ‘o totogi tutusa, mo tagata faigaluega.

Sa fa’amanino mai ai fo’i e Pesetā, ‘e leai se suiga ‘e faia ‘e le Labour ‘i le $2.4 piliona tālā ‘o tupe fa’aalu mo galuega fai ‘a le mālō, ‘e pei ‘ona fa’atūlagaina mai ‘e le Faigāmālō So’ofaatasi ‘i le latou Tala ‘o le Tupe ‘o le tausaga nei, 2026.

Sa ia fa’amamafaina ai, ‘e lē ‘o iai se fa’amoemoe ‘o le Labour ‘e fa’alagolago atu ‘i se vāegatupe ‘e maualuga atu mo galuega fa’atino, ‘ona ‘o le manatu ‘o so’o se ‘inivesi fou ‘e fia faia, ‘e tatau ‘ona talafeagai ma vāegatupe fa’atatauina ‘ātoa ma isi vāega ‘e pei ‘o tūlaga ‘e tatau ‘ona ‘ave iai le fa’amuamua.

Na ia tā’ua, ‘o le tau ‘ātoa ‘o galuega ma fuafuaga fa’ata’atitia, ‘e pei ‘ona folafola mai fa’alaua’itele ‘e le Labour, ‘a’o fa’agāsolo fa’atōsina ‘o le pālota, ‘o lo’o fetaui lelei ma talafeagai ma le $12 piliona tālā ‘o tupe fa’aalu fa’atatauina ‘a le Mālō mo ana galuega fa’atino.

‘Ae lē gata ‘i lea, ‘ae iai fo’i le vāegatupe ‘e lata ‘i le $10.5 piliona tālā, ‘e le’i fa’apolokalameina ni atina’e ma ni galuega ‘e fa’atino ai ma ‘o lea sēleni ‘e mafai ‘ona fa’atino ai le tele ‘o polokalame sa pōlōmisi mai ‘e le Labour, ‘e aunoa ma le si’itia ai ‘o vāegatupe fa’aāgaga mō galuega fa’atino ‘a le Mālō. 

‘O vāega ‘o le pōlisi tau tupe ‘a le Labour, ‘e aofia ai le:

• $200 milliona tālā fa’aopoopo ‘i le sao ‘o le Mālō mo le Fa’aputugātupe ‘o le Lumana’i le New Zealand Future Fund,
• $420 milliona tālā ‘e ‘āmata ‘ona soloia ai ‘aitālafu ‘a tama ma teine ā’oga po’o student loans,
• $200 milliona tālā mō falema’i ‘uma ‘o le atunu’u,
• $400 milliona tālā mo ā’oga ‘uma,
• $2.9 pilliona tālā mo Fale ‘o le Mālō le Kāinga Ora housing, ‘i totonu ‘o le fā tausaga ‘o lumana’i,
• $7 milliona tālā ‘e fesoasoani ai ‘i le ‘au totogi lāfoga mo le polokalame lea e tā’ua for Ratepayer Assistance Scheme (RAS) ‘i le tau ‘o le ‘eletise ‘e maua mai ‘i le mālosi ‘o le lā (solar power).

Link to RNZ (Article): https://www.rnz.co.nz/news/politics_election-2026/1718141/labour-releases-its-fiscal-plan-promises-pay-rise-for-care-and-support-workers

IMAGE/ATA: RNZ/Baz Macdonald

‘Ua folafola mai ‘e le vāega fa’a’upufai ‘a le Greens, ‘o le ‘a o latou u’una’ia le tatau lea ‘ona fesoota’i ‘o ‘a’ai tetele ‘o Niu Sila ‘i malaga ‘a nofoaafi po’o trains, pe ‘āfai ‘e a’afia ‘i lātou ‘i le isi faigāmālō ‘e soso’o ai nei ‘a le atunu’u.

‘O se vāega ‘o lea fuafuaga ‘a le Greens, ‘e aofia ai le toe faia ‘o ni malaga fa’atūlagaina mō pāsese femalagaa’i ‘i nofoaafi ‘i le vā ‘o ‘Aukilani ma Ueligitone ‘i le pō, ‘ae lē gata ‘i lea ‘o le vā ‘o Kalaiesetete ma Dunedin ‘i le motu ‘i saute ‘ātoa ai ma le fa’alauteleina atu ‘o le ‘auala lea ‘e fa’aigoaina ‘o le Te Huia mō nofoaafi aga’i ‘i le ‘a’ai ‘o Tauranga.

Na fa’ailoa mai ‘e le tasi ‘o ta’ita’i ‘o le Greens, ‘o Marama Davidson, ‘o le agaga ‘autū ‘o ia fuafuaga, ‘ina ‘ia taugōfie ai le tau ‘o femalaga’iga ‘a le atunu’u ma maua ai feso’ota’iga lelei ‘i le vā ‘o nu’u ma itūmālō.

Link to RNZ (Article): https://www.rnz.co.nz/news/politics_election-2026/1701879/green-party-announces-plan-for-passenger-rail-between-major-nz-cities

IMAGE/ATA: Tess Brunton / RNZ