‘Ua folafola e le Vāega Fa’aupufai ‘a le Greens ‘e toe fa’afo’i le polokalame ‘o taumafa ‘a fānau ā’oga ‘i lona fa’atūlagaga na iai muamua, ma fa’alaua’itele atu mō isi ā’oga. ‘Ua tā’ua e le Greens, ‘afai ‘ae manumālō mai le faigāpālota, ‘o le ‘ā lātou fa’amautinoa fo’i se fa’atupega tūmau mō le polokalame Ka Ora, Ka Ako, lea na toe fa’aigoaina iā ‘Oketopa ‘o le Health School Lunches.

Na faia ‘e le faigāmālō ‘o lo’o iai nei ni suiga ‘o le poloakalme ‘ina ‘ia fa’aitiitia ai tupe fa’aalu. Sa iai ni fa’afītāuli ‘i le amataga ‘o le polokalame fou, ‘e aofia ai le lē lelei ‘o nisi ‘o taumafa, fa’apea le tāpunia ‘o sē tasi ‘o kamupanī sa tāpenaina taumafa.

Peita’i na saunoa le Minisitā Lagolago o A’oga David Seumour iā Mē, ua toetiti ‘atoa le 100 pasene o taumafa ua taunu’u ‘i le taimi ‘atofaina ‘i aso ta’itasi, ma ‘ua fa’aitiitia faitioga ‘i le silia ma le 92 pasene.

‘Ua fa’aitiita nei le tau māsani ‘o se taumafataga ‘i le $3.58 peita’i ‘e finagalo le Greens, ‘e toe si’itia le fa’atupega ‘i le $6.50 mō le taumafataga e tasi. Na saunoa le ta’ita’i ‘o le Vāega Fa’a’upufai Marama Davidson, ‘o le ‘ā fa’alautele atu fo’i le polokalame  ‘i le tusa ma le 400 isi ā’oga, ma maua ai ‘e le isi 150,000 fānau se taumafataga ‘i aso ta’itasi.

 Na tā’ua ‘e Davidson, ‘o le ‘ave’esega o le fa’atupega ma koenkarate mai Kamupanī i totonu o nu’u na māfua ai ona ‘ave’esea ‘o le faitau selau o gāluega.

‘E tusa ma le ‘afa ‘o taumafataga ‘e le’i ‘ausia tūlaga maualalo mō taumafa pāleni, ua fa’ateleina otaota ‘o taumafa, ma e lē ‘o mautinoa fo’i se fa’atupega ‘o le polokalame ‘o lo’o iai nei pe ‘ā mavae le 2028. ‘Ua fuafua le Greens ‘e toe fa’afo’i le tāpenaina o taumafa ‘i totonu o nu’u, ‘e ono toe maua ai le o’oi atu ‘i le 2000 ‘o avanoa faigāluega, ‘ae o le fa’alauteleina ‘o le polokalame ‘e ono maua ai fo’i le isi 1900 o gāluega fou.

‘Ua fuafuaina le tau ‘e fa’atupe ai lea faiga fa’avae ‘i le $472mīliona tālā ‘i le tausaga 2027/28, ma ‘o le ‘ā si’itia atu ‘i le $602 mīliona tālā ‘i le 2030/31.

Link to RNZ (Article): https://www.rnz.co.nz/news/politics_election-2026/1066090/greens-vow-to-restore-original-school-lunch-programme-include-more-schools

IMAGE/ATA: RNZ / Marika Khabazi

‘E lua ni mū mai le motu tele ‘i Salāfai lea ‘ua rīpotia ‘i se pepa ‘o fa’amatalaga mai Pūlega ‘a le Tinei Mū ‘a le atunu’u. ‘O nofoaga ‘e lua ‘i le vaomatua ‘i le āfio’aga ‘o Samalae’ulu na sosolo ai le mū, ma na toe vala’au ‘uma ai le ‘aufaigaluega ‘a le tinei mū ‘ua mānava, ‘i le fesoasoani lea ‘i le tau tineia ‘o le sosolo ‘o le afi. ‘E le gata ‘i lea, na fa’apēnā fo’i ‘i ali’i ma faipule, ma le mālosi ‘o le nu’u ‘o le āfio’aga ‘o Samalae’ulu, na tutū fa’atasi ma galulue ‘e tineia le afi.

Mulimuli ane, na toe maua leisi vala’au mai le āfio’aga ‘o Faleālupo, ‘ua sosolo ai fo’i leisi afi ‘ona ‘o le tūlaga mātūtū ma le mago ‘o le mutia ma lā’au mai le vaitau lenei ‘o le El Niño. Fa’ailoa ‘e le ‘Ōfisa Sili ‘o le Pūlega ‘o le Tinei Mū ‘iā Tanuvasa Pētone Mauga, na mafai ‘ona tali vave atu ‘ia le ‘aufaigaluega ‘a le ‘ōfisa ‘autū ‘i Apia, ma ‘auina atu ai le to’a 12 ‘o le ‘aufaigaluega sīnia, ‘o sē tasi ‘o loli vai ma le tasi ‘o ta’avale fuimū ‘e fesoasoani ‘i le fa’afītāuli na tūla’i mai.

Na fesoasoani le Atua ma mafai ‘ona tineia ‘āto’atoa le afi ‘i ia vāega ‘e lua ‘o le motu tele ‘i Salāfai, mai le fesoasoani lea ‘o le savili ma le mago ‘o le mutia na vave ai ‘ona sosolo le afi ‘i le taimi na tupu ai. Na momoli fo’i le agaga fa’afetai ‘o Tanuvasa ‘i ali’i ma faipule ‘o le āfio’aga ‘o Faleālupo, na fesoasoani tele ‘i le galuega fītā ‘a le ‘aufaigaluega. ‘Ua toe fautua mālosi mai ai le pūlega ‘i le mamalu ‘o le atunu’u, ‘ina ‘ia tāofi lāpisi susunu ma tafuna’i, ma ‘ia māta’itūina so’o se ‘auala ma so’o se vāega, ‘e ono tūla’i mai ai se mū ‘e fa’aleagaina ai meatōtino tāua ‘aemaise fo’i ‘o se soifua.

IMAGE/ATA: Samoa Fire and Emergency Services Authority Facebook

‘O se tasi ‘o tofiga fa’alefa’avae, ‘ua fa’atautōina ‘i le ulua’i usuia ‘o le Palemene ‘i le vaiaso nei, lea ‘ua tōfia ai le Afioga Fa’amoetauloa Fa’asavalu Ah Siu Lin ‘e ‘avea ma su’etusi sili ‘a le mālō. ‘O se tōfiga ‘o lo’o i lalo ‘o le fa’avae ‘o le matā’upu 97 (1) ma le (2), ‘o le fa’avae ‘o le mālō tūto’atasi ‘o Sāmoa 1960, na fautuaina ‘e le Afioga ‘i le Palemia le Afioga ‘i le Ao Mamalu ‘o le mālō ‘o Sāmoa, mo le fa’amaonia lea ‘o le tōfia āloa’ia ‘o le Afioga ‘iā Fa’amoetauloa, na te tau’aveina lea tōfiga fou.

‘O se tamāli’i ‘ua loa tausaga ‘o tautua ‘i le mālō, ma ‘e lata atu ‘i le 20 tausaga ‘o lana tautua ‘i le ‘Ōfisa ‘o le Pule ma Su’etusi Sili ‘a le mālō ‘o Sāmoa, ma ‘ua tele fo’i tausaga ‘o fa’auluulu ‘iai nisi ‘o vāega ‘o lenei lava ‘ōfisa. ‘O lo’o ia ‘ūmia le tele ‘o fa’ailoga ma tusipasi taualoa, ‘e aofia ai le Tikerī Fa’alōia, fa’apea fo’i le Tikerī Fa’apisinisi ‘e fīto’itonu ‘i le fa’atausi tusi ma le tamao’āiga mai le Iunivesitē ‘o le Pasefika ‘i Saute. ‘O ia fo’i ‘o se tausi tusi āloa’ia ma le sui fo’i ‘o le Fa’alāpotopotoga ‘a Su’etusi ‘o tausi tusi ‘a le atunu’u.

Na fofogaina le malelega fa’amanuia mai i le Afioga ‘i le Ao mamalu ‘a le mālō, ‘i le filifilia ai ‘o lenei fo’i tamāli’i ‘a le atunu’u mo le tau’aveina ‘o lea tōfiga maualuga ‘a le mālō, fa’apea fo’i le saunoaga fa’amanuia mai le Afioga ‘i le Ta’ita’i ‘o le atunu’u, La’auli’alemālietoa Polata’ivao Fosi Schmidt.

IMAGE/ATA: Government of Samoa

‘Ua fa’amāonia le aga’ia tu ‘o Richie Mo’unga ‘i Aferika i Saute, ‘e ‘auai atu ‘i le ‘au a le Olopeleki. Ina ua mavae ni vaiaso ‘o fa’atalanoa lona agava’a ‘e ta’alo ai mō le ta’amilosaga. ‘Ua fa’amāonia mai e le Lakapī Niu Sila, na malaga Mo’unga ‘i Johannesburg ‘i le Aso Tofi, ‘e fa’atasi atu ‘i le ‘Olopeleki mō le lātou ta’aloga lona valu o le lātou malaga ta’amilo ‘i Aferika i Saute.

‘O le vala’auina o Mo’unga na tula’i mai ina ua fa’amanu’alia Billy Proctor i le pōgāivi o lona taua’u. ‘O lo’o iai fo’i popōlega ‘i manu’aga o Damien McKenzie pei ona saunoa le faiā’oga o le ‘au.

IMAGE/ATA: All Blacks Facebook

Na fa’ato’ese le pule ‘a le ali’i leoleo le Superintendent Rakesh Naidoo, ‘ona ‘e vaiaso ‘e lē’i fa’ailoaina ‘i le komesina ‘o leoleo, le finagalo ‘o Naidoo, ‘e fia tauvā mō le Vāega Fa’a’upufai ‘a le Labour, talu mai la lā talanoaga muamua.  ‘E lē gata na fa’ato’ese Tim Anderson ‘i le Komesina ‘o Leoleo Richard Chambers ‘ae fa’apea fo’i ma Naidoo ‘ona ‘o le fa’aluafesasi, lea na ala ai ‘ona tu’uina atu ‘i vāega fa’asalalau ni fa’amatalaga lē sa’o.

‘O le Aso Lulu na fa’alauiloa ai ‘e le Leitiō Niu Sila, na talanoa Naidoo ‘iā Anderson, ‘o lea sā māfaufau ‘e fia ‘avea ‘o ia ma sui tauvā  mō le Labour, pe tusa ma le lua vāiaso muamua ‘a’o le’i fa’amautūina ‘o ia ‘o se sui tauvā ‘i le lisi ‘a le Labour. 

Na fa’amaonia le ‘avea ‘o Naidoo ma sui tauvā ‘a le Labour (list-only candidate) ‘i le aso 8 Iuni.  ‘O le taimi nei ‘o lo’o nūmera 13 ma ‘ua lata ‘ina fa’amaonia lona nofoa ‘i totonu ‘o le Palemene ‘e tusa ai ma līpoti ‘a le 1News. 

Sā le’i fiafia le Minisitā ‘o Leoleo Mark Mitchell fa’apea le Komesina ‘o leoleo, ‘i le taimi muamua na alia’e ai le matā’upu, ma saunoa ai le komesina, sa tatau ‘ona vave fa’ailoa atu ‘iā te ia le mana’oga ‘o Naidoo ‘e fia ‘auai ‘i ‘upu fai ‘o le mālō.

Link to 1News (Article): https://www.1news.co.nz/2026/08/13/rakesh-naidoos-manager-apologises-for-confusion-over-labour-bid/

IMAGE/ATA: 1News / Supplied

‘Ua toe saini Ethan de Groot, le pou ‘autū ‘o le sikalamu ‘a le ‘Olopeleki ‘i le Iuni Lakapī ‘a Niu Sila, ‘o le Highlanders ma Southland ‘e o’o atu ‘i le fa’ai’uga ‘o le 2029.  ‘O le māsina ‘o Mati, na maua ai la lā pepe fou ma lona to’alua, lea na tā’ua ‘e De Groot, na ātili faigōfie ai lana fa’ai’uga, ‘e toe fa’aopoopo ai le ‘umi ‘o lana konekarate ‘i Niu Sila. 

‘E fiafia lava ia ‘i le Highlanders ma ta’alo mō lona itūmālō, fa’apea fo’i mō lona atunu’u, ‘e ala ‘i le ‘Olopeleki.  ‘Ua 45 ana ta’aloga faitaulia mō le ‘Olopeleki, ma ‘o lo’o iai ‘i le taimi nei ‘i ‘Aferika ‘i Saute ‘i le malaga ta’amilo ‘a le ‘au.

IMAGE/ATA: https://www.allblacks.com/players/ethan-de-groot

‘O le lima ai lea ‘o tausaga ‘o mauaina ‘e Sam V le fa’ailoga ‘o le best Pacific Soul/RnB artist ‘i mea tau mūsika ‘i le tufagā fa’ailoga ‘a le Pasefika mō Mūsika.  ‘E lima fa’ailoga na filifilia ‘e tauvā ai.  Na ia mauaina fo’i le fa’ailoga ‘o le ali’i pese nūmera tasi fa’apea ai ma le pese Pasefika pito sili ‘ona matagōfie, lea ‘e i lana polokalame pese ‘o le ‘Small Taste’.

Sa fa’amanuiaina fo’i le ‘aufaipese ‘a le Signature Choir mai Uēligitone ‘i ni fa’ailoga se tolu, ‘o le pese lotu pito sili ‘ona matagōfie, ‘o se fa’ailoga ‘e āmana’ia fa’apitoa ai ‘i lātou po’o le special recognition award fa’atasi ai ma le fa’ailoga ‘ua ta’ua ‘o le people’s choice.

‘O le ali’i ‘o Scribe na mauaina le fa’ailoga ‘o le polokalame pese Pasefika pito sili ‘ona matagōfie lea ‘ua fa’aigoaina ‘o le Scribe Is Dead.  ‘O le Brent Park-Tamati & Brandon Haru lea na gālulue ma Ladi6, na mauaina le fa’ailoga ‘o le best producers mō le ‘Le Vā.   

‘O le ‘aufaipese ‘a le A.R.T, ‘o tama’ita’i talavou ‘e to’atolu mai Porirua, na mauaina le fa’ailoga ‘o le Pacific music group ‘o le tausaga, lea fo’i na lātou mauaina lea fa’ailoga ‘i le tausaga talu ai.  ‘O tama’ita’i ia ‘o Anastasia, Rosetta ma Tiresa. 

‘O Iva Lankum na mālō ‘i le best female artist ‘ae mauaina ‘e Kenzie mai Uēligitone le best Pacific hip hop artist mō le tausaga, ma ‘o le lua ai lea ‘o tausaga ‘o ia mauaina lea fa’ailoga.  ‘O le fā’aili Sāmoa ‘o le Shepherds Reign na manumālō ‘i le music video ‘o le tausaga ‘i la lātou pese ‘o le ‘Sāmoa Mo Sāmoa’. 

Link to RNZ Pacific (Article): https://www.rnz.co.nz/life/music/all-the-winners-at-the-2026-pacific-music-awards

IMAGE/ATA: RNZ / So’omalo Iteni Schwalger

‘Ua ‘ausia ‘e le Vāega Fa’a’upufai ‘a le Opportunity, le nūmera ‘e mafai ‘ona ulufale atu ai ‘i le Palemene, ‘e tusa ai ma fa’amaumauga pito lata mai ‘i le sā’ili’iliga ‘a le 1News, le Verian poll, mā ‘e mafai ‘ona ‘avea ma pātī ‘e faia le fa’ai’uga pe ‘ana fa’apea ‘o le taimi nei le faigāpālota.

‘O le fa’ai’uga ‘o lea sā’ili’iliga ‘i finagalo ‘o tagata pālota, na fa’aalia ai, ‘e 30 pasene le lagolago mō le Labour, ma ‘e 2 maka ‘ua pa’ū ai pe ‘ā fua ‘i le sā’ili’iliga talu ai, mā ‘e mafai ‘ona maua ai nofoa ‘o le Palemene ‘e 38.  ‘O le lagolago mō le National ‘e 29 pasene, tūmau ‘i le 36 nofoa.  Green ‘e 12 pasene, ‘e 1 ‘ua pa’ū ai, tūla’i mai ‘i le 15 nofoa.  ACT ‘e 9 pasene, 3 maka ‘ua si’itia ai, 11 nofoa, New Zealand First ‘e 8 pasene, 3 maka ‘ua pa’ū ai, 10 nofoa.  Opportunity ‘e 8 pasene, 3 maka ‘ua si’itia ai, 9 nofoa.  Vāega Fa’a’upufai ‘a Māori ‘e 1 pasene, 1 ‘ua pa’ū ai, 6 nofoa.  11 pasene ‘o tagata na fesiligia ‘i le sā’ili’iliga, na tali lātou te lē iloa, pē na mumusu fo’i ‘e tali. 

Na fa’ailoa ai, ‘e lē lava ni nofoa ‘e fa’atū ai se faigāmālō ‘e le Labour, Greens, Te Pati Māori, ‘i se aofa’iga ‘e 59, ‘ae ‘ā tu’ufa’atasi le National, ACT ma le New Zealand First, ‘e 57.  ‘Ae ‘ā fai ‘e tu’u atu ‘i ai nofoa ‘e 9 ‘a le Opportunity lea ‘e pei ‘e lilifa ‘i le agavale, ‘ona maua ai lea ‘o nofoa ‘e 68, ‘ae ‘ā fai ‘e toe sui le māfaufau ‘o Tuisinavemaulumoto’otua ‘e uiga ‘i le gālulue fa’atasi ma le Opportunity, ‘ona mafai lea ‘ona lātou maua ni nofoa se 66, ‘e tusa ai ma le i’uga ‘o le sā’ili’iliga ‘a le 1News Verian poll. 

‘O lea sā’ili’iliga na fa’atautaia mai le aso 8 ‘e o’o ‘i le 11 ‘Aukuso, ma pe tusa ma le to’a 847 tagata na fesiligia ai.  ‘E 17 pasene le lagolago mō Luxon ‘i le tofiga palemia, ‘e 1 le maka ‘ua pa’ū ai, ‘ae 15 pasene mō Chris Hipkins le ta’ita’i ‘o le Labour.

Link to RNZ (Article): https://www.rnz.co.nz/news/politics/976515/the-opportunity-party-could-decide-next-government-new-poll-shows

IMAGE/ATA: RNZ / Supplied

Na fa’aalia ‘e Chris Penk, ‘e lē toe tauvā ‘i le faigāpālota tele ‘i le māsina ‘o Nōvema, ‘ina ‘ua tuana’i ni nai itūlā, talu ‘ona ‘ave’esea ‘e le Palemia Tuisinavemaulumoto’otua Christopher Luxon ona tofiga minisitā, ‘ona ‘o lana lu’i ‘i le tofiga ta’ita’i ‘o le vāega fa’a’upufai ‘a le National ‘i le vāiaso nei.

Na fa’amaonia ‘e le Palemia  ‘i le aso ananafi, le toe fa’amausalī ‘o le talitonuina ‘o ia ‘e le vāega ‘i se fono fa’anatinati na ia taloina, ma fa’ataunu’uina, ‘i le taeao ananafi ‘i le palemene, ma fa’atūmau ai pea lona tofiga palemia ma le ta’ita’i ‘o le vāega fa’a’upufai ‘a le National. 

‘O nai itūlā mulimuli ane, na fa’ate’a ai ‘e Tuisinavemaulumoto’otua le ali’i minisitā.  Na saunoa Penk, sā ia tō mānatu ‘i lona lumana’i ‘i ‘upu fai ‘o le mālō fa’atasi ma lona ‘āiga, ma faia ai lana fa’ai’uga, ‘e lē toe tauvā ‘i le faigāpālota. 

‘O ia ‘o se sui mitamita ‘o le National, ma ‘e matuā ‘āto’atoa lana lagolago ‘i le vāega fa’a’upufai fa’apea ma Luxon ‘e ta’ita’iina le isi faigāmālō pe ‘ā māe’a le faigāpālota.

‘Ua tau’aveina ‘e Paul Goldsmith le Mālosi’aga Fa’afitafita, ‘o ē ‘ua loa taimi ‘o gālulue mō le atunu’u ‘e pei ‘o fitafita ‘ua mālōlo, ‘o le Minisitā mō le Vāteatea, GCSB fa’apea ai ma le NZSIS.   ‘O Simon Watts ‘ua ‘avea ma Minisitā mō Fale ma le Fauga ‘o Fale.   Na fa’aalia ‘e le ‘ōfisa ‘o le palemia ‘i le Leitiō Niu Sila, ‘o le lu’i lava lea ia ‘a Penk, ‘ae lē mō nisi sui ‘o le vāega. 

‘I le feiloa’iga ma tusitala ‘i le aso ananafi, na fa’asilasila ai ‘e Luxon, ‘ua sao mai le taumafaiga lona lua ‘i lenei tausaga ‘e ‘ave’ese ‘o ia, ‘ae ‘ua tutū fa’atasi la lātou vāega, ma ‘ua fīnau ‘ina ‘ia manumālō ‘i le faigāpālota.  Na ia tu’ua le feiloa’iga ma tusitala ‘e aunoa ma se avanoa na tu’uina atu mō ni fesili. 

Na tutū fa’atasi Luxon ma ana minisitā, Nicola Willis, Mark Mitchell ma Chris Bishop.  ‘O tua atu na tū ai Erica Stanford, lea na iai fo’i tala salatua ‘e fa’apea sā fia tauvā mō le tofiga ta’ita’i.  Sā lona 14 Penk ‘i le lisi ‘a le National lea na fa’asalalauina ‘i le fa’ai’uga ‘o le vāiaso. 

Link to RNZ (Article): https://www.rnz.co.nz/news/politics/975747/chris-penk-says-he-will-not-seek-re-election-after-losing-ministerial-portfolios

IMAGE/ATA: RNZ

‘Ua fa’ailoa manino mai ‘i le pepa ‘o fa’amatalaga mai le ‘Ōfisa ‘o le Kapeneta ma le Palemia, le fa’ailoa lea ‘e le International Monetary Fund (IMF) le iai pea ‘o le avanoa tau tupe ‘a le mālō, ‘e mafai ‘ona tu’uina atu ‘i ni fesoasoani fa’apitoa mo se vāega taimi talafeagai mo ‘āiga, ‘ātoa ai ma tagata ‘e sili ‘ona mana’omia le fesoasoani.

‘O lo’o fa’aauau pea ‘ona fa’amuamua ‘e le mālō le manuia ‘o tagata Sāmoa ‘i ana ‘anavatau ‘ua folasia, ‘āmata mai ‘i le aso 1 Iūlai 2026, ‘ua si’itia ai le penefiti mo tagata mātutua ‘e aulia le 70 tausaga ma luga atu, mai le $300 sa iai muamua ‘i le $500 ‘i le māsina mo le silia ‘i le 7,000 ‘o ia tagata mātutua. ‘Ua fa’amālosia fo’i ‘e le mālō le fesoasoani mo tagata ‘o lo’o iai a’afiaga tūmau ‘o le soifua, ma ‘ua si’itia ai fo’i la lātou penefiti ‘i le $300 ‘i le māsina.

‘Ātoa ai ma le fa’aagaga ‘a le mālō ‘o le $20 miliona mo se tasi ‘o polokalame lea ‘ua fuafuaina mo le soifua manuia ‘o fānau, le Child Wellbeing Benefit, ‘e fa’amatu’u atu ai le ulua’i $200 ‘i le taimi ‘e fānau mai ai se tagata fou, ma fa’aauau ai le $100 ‘i māsina ta’itasi mo le ulua’i 35 māsina muamua ‘o le soifuaga ‘o lea tamaitiiti. Ma ‘ua fuafua ‘e fa’ato’ā ‘āmata ‘ona totogi atu ia fa’amanuiaga ‘iā Ianuari 2027.

IMAGE/ATA: Nessani Lam Sam