‘Ua ‘avea Temukisa Auina Penehuro Hauma ma ulua’i tama’ita’i ‘ua filifilia ‘e ‘avea ma Kōvana Sili ‘o le mālō ‘o Tuvalu.  ‘Ua 71 tausaga ‘o lona soifua.  ‘E to’asefulu kōvana sili ‘o Tuvalu talu mai le tūto’atasi ‘i le aso 1 ‘Oketopa 1978, mā ‘o le ītūpā ‘uma ‘o ali’i.

‘O Hauma ‘o le ‘ā ‘avea ma sui ‘o le Tupu ‘o Sālesa le Tolu mō Tuvalu, na fa’atautōina ‘i Funafuti ‘i le afiafi ‘a’o lumana’i le fa’amanatuga ‘o le 48 tausaga ‘o le Tūto’atasi ‘o le atunu’u ‘i le Aso Lulu.

‘O Hauma ‘e mai Vaitupu ma Nanumaga ma ‘ua silia ma le tolusefulu tausaga ‘o ‘i totonu ‘o a’oa’oga.  Sā ‘avea ma peresetene ‘o le Fono ‘a Tinā ma Tama’ita’i ‘a le Mālō ‘o Tuvalu talu mai le tausaga ‘e 2016 ma sā iai lona sao ‘i ni polokalame fou tāua ‘a le mālō, ‘e aofia ai le iloiloga ‘o le Tūlāfono Fa’avae ma gāluega ‘i  le fauga ‘o le tusi vaogagana ‘a Tuvalu. 

Link to RNZ Pacific (Article): https://www.rnz.co.nz/news/pacific/1667715/tuvalu-appoints-first-woman-governor-general-ahead-of-48th-independence-day

IMAGE/ATA: Tuvalu Government Media / RNZ.

Na fa’amaonia ‘e leoleo ‘a Fiti, ‘e lata ‘i le 40 kilokalama ‘o pauta ‘o’ona fa’asāina na teuina ‘i totonu ‘o se potu fa’apitoa mō ni mau ‘i le Fa’amasinoga Maualuga, ‘e fa’apea na maua ane, na sui ‘i le falaoamata.

‘E 39 poloka ‘o le pauta ‘o’ona ‘o le cocaine na teuina ‘i totonu ‘o lea potu ‘i le Fa’amasinoga Maualuga ‘i Suva.  ‘I ni fa’amatalaga ma līpoti ‘i totonu lava ‘o le atunu’u, ‘e tusa ma le 30 miliona tālā Fiti po’o le 14 miliona tālā ‘Amerika ‘e maua pe ‘ā fa’atau atu ia pauta ‘o’ona.

‘O le ‘āmataga ‘o le māsina talu ai, na ‘āmata ai se su’esu’ega ‘a leoleo Fiti ‘ina ‘ua iloa ane ‘ua leiloa ia poloka ‘o le cocaine.  Na saunoa le Minisitā ‘o Fa’amasinoga ‘a Fiti, Siromi Turaga, ‘e matuā fa’ate’ia lava ‘i lātou ‘i lea matā’upu.  ‘O le ‘ā lē tu’ua lava se avanoa ‘i su’esu’ega ‘ua fa’agāsoloina nei pei ‘ona tā’ua ‘e le Leitiō Niu Sila Pasefika.

Na fa’aalia ‘e le Komesina ‘o Leoleo ‘a Fiti, Rusiate Tudravu, ‘ua fa’amaonia ‘e to’aono tagata ‘ua āga’i ‘i ai su’esu’ega ‘i pauta ‘o’ona ia ‘ua leiloloa ma ‘o lo’o ao ma tu’ufa’atasia fa’amaoniga ma mau.  Na fa’amaonia fo’i ‘e le komesina, ‘o lea ua va’aia nei ‘e leoleo le puipuiga ‘o Fale ‘a le Mālō.

Link to RNZ Pacific (Article): https://www.rnz.co.nz/news/pacific/1655244/a-sad-indictment-flour-replaces-nearly-40kg-of-cocaine-exhibit-in-fiji-court

IMAGE/ATA: SCR (file).

‘I le atunu’u ‘o Vanuatu, ‘ua faitioina ai ‘e se sui ‘o le Palemene ‘o lea atunu’u, le tuai ‘ona fa’atino ‘o sā’iliga ma gāluega lāvea’i mō se va’a la’upāsese na goto ai ‘i gātaifale ‘o le motu ‘o Santo ‘i le taeao ‘o le Aso Faraile.

Na fa’ailoa mai ‘e le ali’i faipule mo Luganville, ‘o Matai Seremiah, ‘e silia ‘i le 30 ītūlā talu ‘ona tupu lea fa’alavelave  fa’ato’ā ‘āmata ni taumafaiga lāvea’i.

‘O le va’a na a’afia, ‘e fa’aigoaina ‘o le MV MATUI, ‘e to’a 45 le aofa’iga ‘o tagata sā malaga ai ‘ina ‘ua goto ‘i le vā ‘o le motu ‘o Santo ma le motu ‘e igoa Ambae, pe tusa ‘o le ‘afa ‘o le 9 ‘i le taeao ‘o le Aso Faraile, ‘i le taimi fa’alētonu ma le loulouā ‘o le tau.

Na tā’ua ‘e le ali’i faipule na fa’ato’ā ‘āmata ‘ona su’e lenei va’a ma faia ni gāluega lāvea’i mō le pāsese ‘i le 4.30 ‘i le afiafi ‘o le Aso Sā.

‘O le taimi nei lā, ‘e to’a 15 tagata ‘ua maua ma mafai ‘ona lāvea’iina mai le 45 lea sā malaga ai ‘i lenei va’a.

‘Ae to’atasi ‘ua maua ‘ua maliu, ‘ae ‘o lo’o fa’agāsolo pea sā’iliga ma gāluega lāvea’i mō isi ‘o lo’o leiloloa pea.

Link to RNZ Pacific (Article): https://www.rnz.co.nz/news/world/1355774/one-dead-30-missing-after-ferry-sinks-off-vanuatu

IMAGE/ATA: Supplied / Tui’s Shipping / Facebook (RNZ).

‘I le mafutaga ‘a Ta’ita’i ‘o Atumotu ‘o le Pasefika lea sā ‘āuai ‘i le fono lona 55 ‘a le Pacific Islands Forum, na ta’ita’ia ai ‘e le Peresetene ‘o le mālō ‘o Palau, ‘o ia fo’i ‘o le Ta’ita’ifono ‘o le Fono ‘a Atumotu ‘o le Pasefika, Surangel Whipps Jr., le avanoa ‘e fa’ailoa ai lana fa’amālō ‘i le Afioga ‘a Pesetā Noumea Simi, le Pule Sili ‘o le Matāgāluega ‘o le Vā ‘i Fafo ‘a Sāmoa, lea ‘ua fa’amāvae mai lona tofiga. 

‘O le afioga ‘a Pesetā Noumea Simi, na fai ma sui ‘o Sāmoa ‘i le Mafutaga po’o le Fono a Ta’ita’i, (Leaders Retreat).

Na fa’aaogā fo’i ‘e le Palemia ‘o le Atu Kuki, Hon. Mark Brown, le avanoa, ‘e fa’aleo ai le agaga lava lea ‘e tasi, ma fa’ao’o atu ai le agaga fa’afetai ‘i le telē ‘o le sao ‘o le afioga ‘a Peseta ‘i le gāluega ‘a le Pasefika. 

‘E lē fou le afioga ‘a Pesetā ‘i matā’upu tau le gālulue fa‘atasi ‘a mālō ‘o le Pasefika ‘i lenei itūlagi. ‘I le tele ‘o tausaga, sā ia fesoasoani tele ‘i le fa‘atūlagaga ma le fa‘amālosia ‘o le fa’amoemoega sā tepa taula‘i ‘i ai le Pasefika ‘i nai tausaga ‘ua tuana’i, ‘e aofia ai lona sao tāua ‘o se tasi ‘o ē na fesoasoani ‘i le fa‘avaega ‘o le fuafuaga ma le fa‘asinomaga lea ‘ua ta’ua ‘o le Blue Pacific.

‘E telē lona sao na fa’atino ‘i le tele ‘o tausaga, ‘i le ātīna’ega ‘o le Blue Pacific, ‘e ala ‘i lona fa’asoa ‘o le tele ‘o lona tomai ma lona poto māsani, lona silafia lelei ‘o fuafuaga fa‘ata‘atitia, fa‘apea ai ma lona naunauta‘iga mālosi ‘e lagolago ma ūna‘ia matā’upu tāua ‘e ave ‘i ai le fa‘amuamua ‘e le Pasefika ‘ātoa.

‘Ua fai ma molimau le telē ‘o lona sao, ‘ona ‘o lona ‘āuai pea ‘i nisi ‘o fuafuaga ‘autū ‘a le Pasefika, ‘e aofia ai le Toe Iloiloina ‘o le Fuafuaga ‘a le Pasefika, fa‘apea le Forum Compact Peer Review Initiative.

Talu ai nei fo‘i, na tōfia ai Pesetā Noumea Simi ‘e le Pacific Islands Forum Troika ‘e ‘avea ma sui ‘o le komiti fa’apitoa na filifilia ‘e le Fono ‘a Atumotu ‘o le Pasefika, ‘e talanoa ma ta’ita’i ‘o lenei itūlagi, ‘i ni suiga ‘e pūlea ai ‘e ta’ita’i ‘o atumotu ‘o le Pasefika ‘o lātou atumotu, fa’apēfea fo’i ‘ona gālulue fa’atasi ma tutū fa’atasi.

Na momoli ‘e le Failautusi Aoao ‘o le Pacific Islands Forum ‘ona mo’omo’oga alofa mō Pesetā, ma fa‘ailoa fo‘i lona agaga fa‘afetai, ma ia saunoa ai, ‘e iai lona talitonuga, ‘o le ‘ā tūmau pea le tāua ‘o le soifuaga galue lelei ‘o Peseta, i totonu ‘o fa‘alāpotopotoga na ia fesoasoani ‘e fa‘amālosi ātili, ‘o taumafaiga fa‘aitulagi na ia fesoasoani ‘e fa‘atūlaga lelei ma fausia, fa‘apea fo‘i ma soifuaga ‘o le to‘atele ‘o tagata ta’ito’atasi ‘ua ia suia ma fesoasoani ‘i ai.

‘O le ‘ā matuā misia lava le fautuaga poto, le atamai ma le silafia loloto ‘o le afioga ‘a Pesetā Noumea Simi ‘i fonotaga ma talanoaga fa‘aitūlagi pei ‘ona saunoa le Failautusi Aoao ‘o le Fono ‘a Atumotu ‘o le Pasefika, pei ‘ona lipotia ‘i sa lātou pepa ‘o fa’amatalaga. 

IMAGE/ATA: Supplied / Pacific Island Forum

‘E to’atele ta’ita’i ‘o Mālō ‘o le Pasefika, ‘ua fa’ailoa mai, ‘o le ‘ā lē ‘āuai ‘i lona 55 ‘o fonotaga ‘a Ta’ita’i ‘o le Pasefika, le Pacific Islands Forum, lea ‘e tatala āloa’ia ‘i le pō ā nānei ‘i le atumotu ‘o Palau.

‘O se taimi ‘ese lenei le vevela ‘o ‘upufai fa’aitūlagi ‘i le vā ‘o mālō ‘i totonu ‘o le Pasefika, ‘ona ‘o so’otaga ‘o nisi mālō ma atunu’u tetele ‘aemaise ‘o Saina ma lona ‘ōfisa mai ‘i le Pasefika.

‘Ua tele fa’afesili ‘ua tūla’i mai, ‘ona ‘o le fa’ama’amulu ai ‘i le taimi mulimuli, ‘o le Peresetene ‘o le Mālō Kiribati ‘o Ta’aneti Ma’amau mai le tauaofiaga lenei ‘a le Forum ‘i Palau, ‘ae fa’apea ai fo’i ‘ona lē mautinoa pē ‘āuai  ma le peresetene ‘o Naoero, lea sā lausilafia muamua ‘i lona igoa ‘o Nauru, ‘o le ali’i peresetene ‘o David Adeang.

‘Ua atagia ‘i ia tūlaga le maopoopo ma le mausalī ‘o le mafutaga ‘a mālō ma atunu’u nei ‘e i totonu ‘o le li’o ‘o le Forum, ‘aemaise ‘o a’afiaga ‘o mālō tetele mai fafo.

‘O le fono ‘a minisitā ‘o le vā ‘i fafo ‘a le Pasefika lea sā faia ‘i Suva ‘i le ‘āmataga ‘o le māsina lenei ‘o ‘Aukuso, ‘e le’i maua ai se tasi ‘i le matā’upu ‘e a’afia ai le fa’ata’ita’iga ‘o se meatau fa’atonutonu alu mamao ‘a le mālō ‘o Saina ‘i le Pasefika ‘ona ‘o Kiribati fa’apea ai ma Naoero sā tete’e mālosi ‘i ai talu ai le vāvā lalata tele ‘o lātou so’otaga ma le Mālō ‘o Saina.

‘E lē gata ‘i ta’ita’i ‘o Kiribati ma Naoero, ‘ae ‘o lea fo’i ‘ua fa’ailoa mai ‘i Apia, ‘o le ‘ā lē mafai ‘ona fa’atasi atu ‘i Palau le palemia ‘o Sāmoa ‘iā Laaulialemalietoa , a’o lea ‘ua malaga le sui palemia ‘iā  Mulipola Analosa Ale-Molio’o ‘e fai ma sui ‘o le mālō Sāmoa ‘i lea fonotaga.

Mō le Mālō Niu Sila, ‘o lea ‘ua iai ‘i Palau le ali’i minisitā ‘o le Vā ‘i Fafo ‘iā Vaovasamanaia Winston Peters, ‘ae ‘o le ‘ā malaga fo’i mō lea fonotaga le ali’i palemia ‘iā Tuisinavemaulumotootua Christopher Luxon.

IMAGE/ATA: Pacific ACP Leader Meeting at PIF Palau 2026 / PIF Facebook

‘E 60 pasene ‘e le’i maua ‘e atumotu ‘o Tokelau mai ana tupe maua māsani mai faigā faiva ‘i le vā ‘o Fepuari ma le māsina ‘o Iuni ‘o le tausaga nei, ‘ona ‘ua fa’amuta le ‘avea ‘o To’elau ma sui ‘āuai ‘o se maliega tau faigā faiva ‘a le Pasefika.

Na fa’ailoa mai ‘i se līpoti ‘a le Uaeālesi Fa’asalalau ‘a Niu Sila, ‘e fa’apea, na fa’ate’a ’ese Tokelau mai le feagaiga ‘e fa’aigoaina ‘o le Vessel Day Scheme (VDS), ‘a atunu’u ‘o lo’o ‘avea ma sui ‘āuai ‘o le Māliega ‘i Nauru (Parties to Nauru Agreement, poo le PNA).

‘O lea feagaiga ‘e fa’ataga ai atunu’u ‘āuai ‘uma ‘e faia laisene mō ni va’afāgota mai fafo ‘e fia fāgotaina o lātou ‘ōgāsami.

Peita’i lā, ‘e lei fa’amautūina mai le māfua’aga ‘o le fa’ai’uga lea ‘ua ‘ave’esea ai Tokelau mai lea Feagaiga ‘a le Pasefika..

‘O fa’amatalaga āloa’ia ‘ua fa’amatu’uina mai ‘i lalo ‘o le Tūlāfono ‘o Fa’amatalaga ‘a Niu Sila, le Official Information Act, ‘ua iloa ai, le faia ‘o se fetu’una’iga ‘o le Tala ‘o le Tupe ‘a atumotu ‘o Tokelau, ‘ona ‘o le tūlaga fa’aitīitia ‘o ana tupe maua talu ai ‘ona ‘ua fa’amuta lona ‘avea ma sui ‘āuai ‘o le feagaiga tau faigā faiva ‘e pei ‘ona tā’ua.

‘O faigā faiva ‘i  ‘ōgāsami loloto, ‘ona pau lea ‘o le ‘auala tūma’oti sā maua ai sēleni ‘a motu ‘o Tokelau.

‘O se līpoti mai le Fa’alāpotopotoga mō le Ātīna’e Felagolagoma’i, lea ‘e tā’ua ‘o le OECD, na tā’ua ai ‘e fa’apea na maua ‘e atumotu ‘o Tokelau le aofa’iga ‘e tusa ma le $15-Miliona ‘i le tausaga ‘e 2024 mai le feagaiga lenei tau faigā faiva ‘a le Pasefika.

‘O le vaegātupe ‘ua fa’atūlagaina ‘e le Mālō Niu Sila mō atumotu ‘o Tokelau mai ‘iā Iuni ‘o le 2024 ‘e o’o atu ‘i le tausaga fou 2027, ‘e $138-miliona, ‘ae lē ‘o aofia ai se fuafuaga ‘i le pa’ū pei ‘ona aliali mai nei ‘i tupe maua ‘a Tokelau mai faigā faiva, pei ‘ona tūla’i mai.

Link to RNZ Pacific (Article): https://www.rnz.co.nz/news/pacific/1066679/tokelau-loses-nearly-two-thirds-of-revenue-after-fisheries-pact-expulsion

IMAGE/ATA: Elena Pasilio / RNZ Pacific

‘O le lima ai lea ‘o tausaga ‘o mauaina ‘e Sam V le fa’ailoga ‘o le best Pacific Soul/RnB artist ‘i mea tau mūsika ‘i le tufagā fa’ailoga ‘a le Pasefika mō Mūsika.  ‘E lima fa’ailoga na filifilia ‘e tauvā ai.  Na ia mauaina fo’i le fa’ailoga ‘o le ali’i pese nūmera tasi fa’apea ai ma le pese Pasefika pito sili ‘ona matagōfie, lea ‘e i lana polokalame pese ‘o le ‘Small Taste’.

Sa fa’amanuiaina fo’i le ‘aufaipese ‘a le Signature Choir mai Uēligitone ‘i ni fa’ailoga se tolu, ‘o le pese lotu pito sili ‘ona matagōfie, ‘o se fa’ailoga ‘e āmana’ia fa’apitoa ai ‘i lātou po’o le special recognition award fa’atasi ai ma le fa’ailoga ‘ua ta’ua ‘o le people’s choice.

‘O le ali’i ‘o Scribe na mauaina le fa’ailoga ‘o le polokalame pese Pasefika pito sili ‘ona matagōfie lea ‘ua fa’aigoaina ‘o le Scribe Is Dead.  ‘O le Brent Park-Tamati & Brandon Haru lea na gālulue ma Ladi6, na mauaina le fa’ailoga ‘o le best producers mō le ‘Le Vā.   

‘O le ‘aufaipese ‘a le A.R.T, ‘o tama’ita’i talavou ‘e to’atolu mai Porirua, na mauaina le fa’ailoga ‘o le Pacific music group ‘o le tausaga, lea fo’i na lātou mauaina lea fa’ailoga ‘i le tausaga talu ai.  ‘O tama’ita’i ia ‘o Anastasia, Rosetta ma Tiresa. 

‘O Iva Lankum na mālō ‘i le best female artist ‘ae mauaina ‘e Kenzie mai Uēligitone le best Pacific hip hop artist mō le tausaga, ma ‘o le lua ai lea ‘o tausaga ‘o ia mauaina lea fa’ailoga.  ‘O le fā’aili Sāmoa ‘o le Shepherds Reign na manumālō ‘i le music video ‘o le tausaga ‘i la lātou pese ‘o le ‘Sāmoa Mo Sāmoa’. 

Link to RNZ Pacific (Article): https://www.rnz.co.nz/life/music/all-the-winners-at-the-2026-pacific-music-awards

IMAGE/ATA: RNZ / So’omalo Iteni Schwalger

‘Ua tūmau pea ‘ona fa’aluaina pe sili atu fo’i, le nūmera ‘o tagata Pasefika ‘i Niu Sila ‘e lēai ni gāluega pe ‘ā fua ‘i le faitau aofa’i ‘o tagata ‘o le atunu’u, ‘e ui ‘ua lata ‘i le 11 tausaga le ‘umi fa’ato’ā toe o’o lea ‘o se fuainūmera ‘o tagata ‘e lēai ni gāluega ‘i le atunu’u ‘i se tūlaga pito mauāluga.

Na fa’aalia ‘i fa’amaumauga ‘a le Statistics NZ ‘i le Aso Lulu, ‘e 11.6 pasene tagata Pasefika ‘e lēai ni gāluega ‘i totonu ‘o māsina ‘e tolu ‘e o’o mai ‘iā Iuni 2026, po’o le tusa ma le 23,700 tagata faigāluega Pasefika.

Mai ‘iā Iuni 2025 ‘i le 2026, ‘e 12 pasene ‘o le ‘averesi ‘o Pasefika na sā’ili ni gāluega, peita’i ‘e le’i maua, ma ‘ua fa’aluaina pe sili atu fo’i nai lō le ‘averesi fa’aletausaga ‘e 5.6 pasene mō le faitau aofa’i ‘ātoa ‘o le atunu’u.

Na si’itia ‘i le 5.6 pasene le faitau aofa’i ‘o tagata ‘e lēai ni gāluega ‘i le atunu’u ‘i totonu ‘o le kuata po’o māsina ‘e tolu ‘e o’o mai ‘i le fa’ai’uga ‘o Iuni 2026, mā ‘o se tūlaga mauāluga ‘e le’i toe o’o ‘i ai, talu mai Sētema 2015.

‘E 171,000 tagata na lēai ni gāluega, pe tusa ma le 7000 na fa’aopoopo ‘i le nūmera lea na iai ‘i le isi tolu māsina muamua atu, fa’atasi ai ma le 13,000, ‘ua mauāluga atu ai nai lō le tausaga talu ai.  ‘Ua mauāluga atu le nūmera ‘o ali’i ‘e lēai ni gāluega nai lō le 2013 ‘i lea lava piliota. 

Na si’itia le nūmera ‘o Pasefika ‘e lēai ni gāluega ‘i se fuainūmera pito mauāluga ‘e 12.2 pasene ‘i totonu ‘o le tolu māsina ‘e o’o mai ‘iā Tēsema 2025.

Link to RNZ Pacific (Article): https://www.rnz.co.nz/news/pacific/894454/pasifika-unemployment-remains-twice-the-national-rate

IMAGE/ATA: RNZ / Rebekah Parsons-King

‘O le aso ananafi na feiloa’i atu ai le Afioga ‘iā Ali’i’oāiga Elisaia Feturi, ‘i le Peresetene ‘o le Mālō ‘o Fiti, Ratu Naiqama Lalabalavu, ‘e fa’amāvae āloa’ia mai lona tofiga fa’a-Komesina Mauāluga ‘o le Mālō Sāmoa ‘i le Mālō Fiti.

‘Ua māe’a ai nei le lima tausaga ‘o le tofiga ‘o le Afioga ‘iā Feturi, ‘ina ‘ua tōfia ‘e le faigāmālō ‘i le māsina ‘o Mati 2021.

Na fa’ailoa ‘e le Afioga ‘i le Peresetene ‘o Fiti Lalabalavu, lona agaga fa’afetai ‘i le Afioga ‘iā Ali’i’oāiga, ‘ona ‘o lana tautua fa’amāoni ma lona sao tāua ‘i le fa’amālosia ‘o le vā feāloa’i ‘i le vā ‘o Sāmoa ma Fiti, fa’apea fo’i ma lona lagolago ‘i taumafaiga fa’aitūlagi mō atunu’u ‘o le Pasefika.

Na saunoa le Peresetene ‘e fa’apea, ‘o lo’o tūmau pea le mafutaga vāvālalata ‘i le vā ‘o Sāmoa ma Fiti, ‘e fa’avae ‘i le tele ‘o tausaga ‘o le so’otaga fa’asolopito, aganu’u ma ‘āiga. Na ia tā’ua fo’i le sao ‘o tagata Sāmoa ‘o lo’o nonofo ‘i Fiti ma tagata Fiti ‘o lo’o nonofo ‘i Sāmoa ‘i le fa’amālosia pea ‘o nei so’otaga.

‘I lana saunoāga fa’amāvae, na momoli ai ‘e le Afioga ‘iā Ali’ioaiga lona agaga fa’afetai ‘i le Peresetene, le Mālō ma tagata ‘o Fiti ‘ona ‘o le ālolofa ma le talimālō sa ia maua ‘i lenei taimi ‘ātoa ‘o lana nofoā’iga.

Na ia saunoa ‘e fa’apea, ‘o le fa’atūina ‘o le ‘Ōfisa ‘o le Komesina Mauāluga ‘o Sāmoa ‘i Suva ‘o se fa’amāoniga lea ‘o le naunauta’iga ‘o Sāmoa ‘e gālulue so’oso’ofa’atasi ma Fiti fa’apea isi sui ‘o le Pacific Islands Forum, ‘ina ‘ia tali atu fa’atasi ‘i lu’itau ‘o lo’o feagai ma atunu’u ‘o le Pasefika.

‘O le Afioga ‘iā Ali’io’āiga Feturi Elisaia na tōfia ‘e ‘avea ma Komesina Mauāluga ‘i Fiti ‘iā Mati ‘o le 2021, ma ‘o ia fo’i ‘o le ulua’i Komesina nofotūmau ‘a Sāmoa ‘i Fiti talu ‘ona fa’avae le ‘ōfisa ‘i Suva.

‘E silia ma le 40 tausaga ‘o tautua le Afioga ‘iā Ali’i’oāiga ‘i galuega fa’alevā’omālō mō Sāmoa. Na ‘āmata mai lana tautua ‘i le Matāgaluega ‘o le Vā ‘i Fafo ‘i le tausaga ‘e 1979, soso’o ai ma lona ‘avea ma Failautusi Muamua ‘i le ‘Ōfisa ‘o le Komesina Mauāluga ‘a Sāmoa ‘i Niu Sila. Sa galue fo’i ‘o ia ‘o le Sui Failautusi ‘o le Matāgaluega ‘o le Vā ‘i Fafo, a’o le’i ‘avea ma Sui Tūmau ‘o Sāmoa ‘i Mālō ‘Aufa’atasi (United Nations) ‘i Niu Iōka mai le 2003 se’ia o’o ‘i le 2021. ‘I lea vaitaimi sa ‘avea ai fo’i ‘o ia ma ‘Amapasa ‘o Sāmoa ‘i le Iūnaite Setete ‘o ‘Amerika ma le Komesina Mauāluga ‘o Sāmoa ‘i Kānata, ma sa fai ma sui ‘o Sāmoa ‘i le tele ‘o fonotaga ma feūtana’iga fa’avā’omālō.

‘O se tautua īloga mō Sāmoa ‘i le tele ‘o tausaga, ma ‘o lona poto māsani ‘i galuega fa’avā’omālō na ‘avea ma sao tāua ‘i le fa’alauteleina ‘o le igoa lelei ‘o Sāmoa ‘i le lalolagi ma le fa’amālosia ‘o mafutaga ma so’otaga vāvālalata ma atunu’u ‘o le Pasefika ma le lalolagi ‘ātoa.

͏’O le toe taliu ai la ‘i Sāmoa ‘o le Afioga ‘iā Ali’i’oāiga, ‘e lē ‘o mautinoa ‘i le taimi nei se isi tofiga ‘i le lumana’i ‘e tautua ai pea mō le atunu’u.

IMAGE/ATA: Fiji Government

‘E lima atunu’u ‘o le Pasefika ‘ua nofo sāuni ‘e ‘avea ma sui tūmau ‘i totonu ‘o le polokalame ‘a le Iūnaite Setete ‘o le visa bond programme, ‘e alagātatau ai ‘i tagātānu’u ‘o ia atunu’u, ‘ona fa’ailoa le o’o atu ‘i le $20,000 tālā ‘Amerika ‘e mafai ai ‘ona malaga ‘i ‘Amerika, ‘i se visa asiasi lē tūmau. 

Na fa’amaonia ‘e le Iūnaite Setete, ‘o le ‘ā ‘avea ‘o se mea tūmau, la lātou polokalame ‘o le Visa Bond Pilot Program pei ‘ona līpotia muamua ‘e le Reuters ‘i le fa’ai’uga ‘o le vāiaso.  ‘O lo’o aofia ‘i lea polokalame ‘o visa ‘a le faigāmālō ‘a Trump, atunu’u ‘e 50, ma ‘e tele lava, ‘e mai ‘Aferika, ma na ‘āmata ‘ona faia lea faiga, ‘i le fa’ai’uga ‘o ‘Aukuso 2025, ‘e sa’ili ai tagata ‘o lo’o ‘ova aso fa’asolitūlāfono ‘i totonu ‘o le Iūnaite Setete. 

‘O atunu’u ‘e lima ia mai le Pasefika, ‘e iai Fiti, Papua Niu Kini, Tonga, Tuvalu ma Vanuatu.  Na fa’aalia ‘e le mālō ‘o le Iūnaite Setete, ‘o le bond lea ‘e tatau ‘ona totogi ‘e le tagata, ‘ua fa’amaonia, ‘o se faiga aogā mō le fa’aitīitiga ‘o tagata ‘ova aso ‘i lo lātou atunu’u.  ‘O le aso 3 ‘Aukuso lea na ‘āmata fa’amamaluina ai lea polokalame.

Link to RNZ Pacific (Article): https://www.rnz.co.nz/news/pacific/870865/five-pacific-states-face-permanent-us-visa-bond-requirement

IMAGE/ATA: SCR (file).