‘Ua fa’amāonia le maua ai o le namu o le Larvae ‘i Aukilani, ‘o le namu ‘e mafai ona tau’aveina ni fa’ama’i ogaoga ‘e mafai ona māliliu ai tagata, pei ona līpotia e le Letiō Niu Sila. ‘Ua ‘amata matā’itū e le Soifua mālōlōina  lautele lea vāega, ‘ina ua maua ni namu o le larvae ‘i le uafu le Queens Wharf i Aukilani.

‘O le larvae ‘e mafai ona feavea’iina fa’ama’i o le dengue fever, fiva samasama, zika virus ma le chikungunya virus. ‘E ta’atele ‘i uafu ma malaeva’alele. ‘O lo’o faia ni mailei namu ‘a le vāega o le puipuiga ‘o le Soifua mālōlōina a Niu Sila, pē ā ma le 400 mita mai ‘i nofoaga na maua ai ia namu. ‘O lo’o fautuaina tagata ‘e viliina le 0800 669 943 pe ‘ā va’aia ia itu’āiga namu ‘i vaivai fa’apea vaituloto.

Link to RNZ (Article) translated: https://www.rnz.co.nz/news/national/591277/larvae-from-exotic-mosquito-which-could-carry-deadly-diseases-found-in-auckland-cbd

ATA: HEALTH NZ / SUPPLIED (RNZ)

‘Ua Pāsia i lona faitauga lona tolu le pili toe teuteu ‘a le faipule a le Labour Kieran McAnulty, ‘o le toe teuteuga o le Tūlāfono ‘o le fa’atauga ma le Sapalaiga ‘o le ‘Ava Mālosi, mā ‘o le ‘ā mafai ‘ona fa’ataga ai fale ‘o lo’o tatala ‘i le Aso Faraile ‘o le Aso Maliu, Aso Sā ‘o le ‘Eseta, taeao ‘o le Anzac Day fa’apea ai ma le Aso Kerisimasi, ‘ona fa’atau atu le ‘ava mālosi ‘i lalo ‘o tu’utu’uga māsani ‘o laisene fa’atau ‘ava mālosi.

‘O le ‘ā mafai ona fa’atau atu ‘ava mālosi ‘i fale’aiga ma isi pisinisi ia ‘o lo’o tatala ‘i aso ia, se’i vagana ai fale fa’atau ‘ava mālosi ma Supamāketi ma fale fa’atau ‘ava mālosi ‘e tapula’a pea le fa’atauga ‘o ‘ava mālosi ‘i ia aso. Na saunoa McAnulty, ‘o le pili ‘e fa’atatau tonu mō na’o fale ‘o lo’o iai laisene ia ‘o lo’o mafai ‘ona tatala, ‘e le’o mafai ‘ona fa’alautele atu ‘i nisi ‘o ‘au’aunaga ‘o lo’o mafai ‘ona lātou fa’atau atu le ‘ava mālosi.  ‘ae nate iloa ‘o le ‘ā fiafia tele pisinisi talimalo ‘i Kalaiesetete ‘ona a tatala lo latou malae ta’alo ‘o le ā le tutulia ‘ese i latou mai totonu o pisinisi talimalō ‘i le vaeluaga ‘o le po ‘ona o le aso e sosoo ai ‘o le aso ‘o le Anzac Day.

‘E le’i lagolagoina e sui faipule o le Green lea pili toe teuteu, fa’apenā i nisi o sui o le NZ First. Na tete’e le sui faipule o le Labour mō Māgele Lemauga Lydia Sosene ‘i lea pili, ona ‘e talitonu, o ni aso tāua nei ‘e tōmanatu ai lava le tagata ia.

Link to RNZ (Article) translated: https://www.rnz.co.nz/news/political/591281/bill-to-ease-holiday-alcohol-restrictions-passes-final-reading-in-parliament

ATA: RNZ / Samuel Rillstone

‘E $800 le tupe a se tamā na gau ina ua fa’aaogā e lona atali’i 6 tausaga fa’amaumauga o lana credit card, ‘e fa’atau ai ni pōnesi mō lana ta’aloga luga o ‘upega tafa’ilagi. ‘O lea matā’upu na su’esu’eina ‘e le ‘au’aunaga ‘e nafa ma le su’esu’ega ‘o fa’aseā tau tupe.

‘I līpoti na tā’ua ai, na tu’u ‘e le tamā ‘i lana komepiuta fa’amaumauga ‘o lana pepa tala tupe ‘e fa’atau ai ana ta’aloga online, peita’i, ‘o le komepiuta lava lea e tasi e fa’aaogā ‘e lona atali’i 6 tausaga. Na ia maua mulimuli ane le $800 na fa’aaogā e lona atali’i e fa’atau ai gems po’o pōnesi mol ana ta’aloga. Sa fa’aseā le tamā i le faletupe, ‘e fa’apea sā tatau ona lātou mate’ia le fa’aogā sesē o lana card ‘i le va’aia o le silia ma le 100 o transactions po’o le fefa’auia’iga o tupe i le taimi e tasi.

Peita’i na tali mai le faletupe latou te lē taliaina le finau a le tamā. Na toe iloilo e le ‘au’aunaga tūto’atasi le fa’aseā, ma talosaga ai le i le faletupe ina ia toe totogi atu le tupe a le tamā, ‘ona ua leai se tupe e fa’atau ai la lātou mea’ai. Na talia e le faletupe ma mālilie e totogi atu le tupe ‘atoa a le tamā, ‘e aunoa ma se isi su’esu’ega e toe faia. Fa’aalia e Susan Taylor o se sui o le ‘au’aunaga tūto’atasi, ‘o le fa’afītāuli pito ta’atele lea, le lē sdaogālēmū o le teu ‘o fa’amaumauga ‘o debit ma credit cards luga ‘o telefoni ma komepiuta. ‘O lo’o fautuaina tagata ‘ia siaki ā lātou teugātupe ‘i aso ta’itasi, ‘ia vave ai ona maua nit upe ‘o ‘ave’ese mai ma lau teugātupe ‘e aunoa ma le iloa.

Link to RNZ (Article) translated: https://www.rnz.co.nz/news/business/591247/six-year-old-spends-food-budget-on-video-game-gems

ATA: SCR (file).

‘O lo’o pepē polokalame ‘a le ‘au’aunaga fa’atūma’oti a le Soifua Mālōlōina le IntraCare, ‘ona o se osofa’iga ‘i ā lātou polokalame ma masini tekonolosi. ‘E 28 ta’otoga ua lē fa’ataunu’uina ona ‘o lea fa’afītāuli.

Na fa’aalia ‘e le sui o le ‘au’aunaga, na ō latou mauaina ua osofa’ia ā latou masini i le aso 20 o Mati ma ‘o lo’o gālulue ā lātou ITs ‘e fa’aleleia ela vāega. ‘E le’o manino pē fiat agata ua a’afia fa’amaumauga patino, ‘ae o lo’o tā’ua i la lātou ‘upega tafa’ilagi, ‘e o’o atu i le 2000 tagata ‘e fa’aaogāina lea ‘au’aunaga ‘a le Soifua Mālōlōina. ‘O lo’o gālulue vāvālalata fo’i ma le Soifua Mālōlōina a Niu Sila, fa’apea le National Cyber Security Centre ma leoleo ‘e auiliili lea matā’upu.

Link to RNZ (Article) translated: https://www.rnz.co.nz/news/national/590751/private-healthcare-provider-intracare-hit-by-cyber-breach

ATA: Unsplash / RNZ

Na fa’amāonia mai e le Minisitā o Tupe Nicola Willis i sana saunoaga i le Palemene ananafi, ‘o le ‘ā leai se suiga i le tau o le penisini ‘i le folasaga a le mālō o lo’o fuafua mō le asō. ‘E lē mafai ona vave maua se tali i se suiga se taimi lata mai, ‘ae alagatatau ona tu’uina mai e le mālō ni fa’amatalaga ‘e uiga i ta’iala ‘o le ‘ā lātou fa’aaogāina ‘e iloilo ai ni suiga ‘i ni vāega o le lātou tali mai i fesili ‘e uiga i le suā’u’u. Fa’ata’ita’iga e mafai ona lātou fa’ailoa mai le aofa’iga o le suāu’u o lo’o i le atunu’u i le taimi nei.

‘O kamupanī ia o lo’o ‘auina mai suāu’u i totonu o le atunu’u ua fa’atūlāfonoina ‘e tatau ona lātou ‘ūmiaina le sapalai o le tiso mō le lē itiiti ifo ma le 21 aso. ‘O lona uiga, ‘e mafai ona fa’asalaina i le faitau mīliona tālā pe ‘ā lē mulimulita’ia ia tūlāfono, pei ona saunoa Willis.

Na saunoa le Minisitā lagolago o le Mālosi’aga fa’aeletise a Niu Sila Shane Jones, ‘o ia fo’i o le ‘ā to’alua ma Willis e faia le folasaga i le asō ‘e uiga i le suāu’u, ‘e lēai se māfua’aga e tatau ai ona māfaufau le mālō i le lē lava o le suāu’u i luga o le sami o lo’o ‘auina mai ‘i le atunu’u. 

‘E le’o i se tūlaga e tatau ona fa’ate’ia ai Niu Sila i le fa’atalanoaina ‘e Korea i Saute lea e maua mai ai le 51% o ana suāu’u ua fa’amāmāina, pē tatau ona teuina pea suāu’u i totonu o le atunu’u, pē auina atu i fafo.

‘O lo’o tūtū ‘ā’ai fo’i Korea i Saute ‘e puipui la lātou atunu’u pei ona saunoa Jones. ‘O lo’o taumafai le mālō ‘ina ‘ia fa’ato’ato’a ma fa’amautinoa mai i tagata Niu Sila, ‘o le ‘ā iai pea ma lava le suāu’u i le atunu’u.

Link to RNZ (Article) translated: https://www.rnz.co.nz/news/political/590714/nz-will-not-move-up-fuel-alert-level-tomorrow-willis-says-changes-will-not-be-sudden

ATA: Samuel Rillstone / RNZ

‘O lo’o tālia e se ‘āiga Niu Sila Sāmoa ‘e nonofo ‘i Kuwait se tali atu ‘a le Mālō ‘i se aso ‘e mafai ai ‘ona toe taliu saogālēmū mai ai ‘i le atunu’u, ‘ona ‘o le tūlaga lē mautinoa ‘i le taua ‘i sasa’e tūtotonu ‘i le taimi nei. ‘I se fa’amatalaga mai le Minisitā ‘o le Vā ‘i fafo Vaovasamānaia Winston Peters, ‘e fa’apea ‘o le ‘ā ‘ave le fa’amuamua ‘a va’alele ma le ‘au tau ‘a Niu Sila ‘e ‘ave’ese mai tagata Niu Sila ‘o lo’o nonofo latalata ‘i pitonu’u ‘o lo’o lamatia ai ō latou soifua.

‘O Sinsemillia Magele ma lona to’alua ‘o Sage fa’apea le lā fānau to’alua iā Koulton ma Malia-Lavalea na malaga i Kuwait iā Mē 2021. ‘O le ulugāli’i ‘e faiā’oga ‘uma, ma ‘o lo’o iai fo’i ma le aunty ‘o tamaiti iā Pauline Toleafoa. ‘O lo’o iai se fuafuaga ‘a le ‘āiga ‘e toe malaga ‘ese mai ma Kuwait. Na maua le avanoa ‘e talanoa ai le ‘āiga ma le Leitiō Niu Sila ‘i le taeao ‘ananafi ‘i luga ‘o le telefoni, ma na saunoa Sage, ‘o le tele ‘o taimi ‘e le’o momoe, ‘ona ‘o le fa’alogoina ‘o leo ‘o sailini ‘a leoleo ma ta’avale falema’i, fa’apea ma leo ‘o pomu.

‘I se līpoti mai le Soifua Mālōlōina a Kuwait na fa’aalia ai se teienetiti 11 tausaga le matua, na maliu mai ‘i pomu pa’ū’ū mai luga.

‘O le ‘āiga nei ‘o tagatanu’u Niu Sila, a’o Māori fo’i ma Sāmoa.

Link to RNZ (Article) translated: https://www.rnz.co.nz/news/world/588732/new-zealand-family-in-kuwait-waits-to-hear-if-they-can-return-home

ATA: Supplied to RNZ.

‘O lo’o lagolago mālosi e le Komiti filifilia ‘a le Palemene le tāofia po’o le fa’asāina ‘o le fa’aaogāina ‘o ‘upega ‘o feso’ota’iga ‘e talavou 16 tasuaga aga’i lalo. ‘O le lipoti ‘a le komiti filifilia ‘a le palemene, lea na faʻasalalauina ‘i le Aso Tofi, ‘ua fautuaina ai foʻi le faʻatūina ‘o se pūlega tutoʻatasi ‘a Niu Sila ‘e fa’atonutonuina le saogālēmū ‘i luga ‘o le initaneti, lātou te fatonutonuina ala ‘o fa’asalalauga lautele fa’apea le mata’itūina ‘o fa’asalalauga ‘o ‘ava mālosi mo tupulaga talavou.

‘O le komiti filifilia fa’apalemene ‘e ‘āuai uma ai sui faipulea mai ‘i pātī ‘ese’ese, peita’i na ‘au ‘ese finagalo ‘o sui faipule a le Green ma le Act, ‘e le’i lagolagoina le sā ona fa’aaogāina ‘e talavou 16 tausaga aga’i lalo ‘o le Social Media. ‘O Nōvema 2024 na pāsia ai le pili ‘i ‘Ausetālia ‘e fa’asā ai talavou ta’i 16 tausaga aga’i lalo mai luga ‘o ‘upega o feso’ota’iga, ma ‘o le autnu’u muamua ‘ua la’a ‘e fa’amamalu lea tūlāfono.

‘O lo’o manatu le Greens, latou te lē lagolagoina lea matā’upu ona ‘e lē malu puipuia ai fa’amatalaga patino ‘o tupulaga talavou, ‘i le taimi ‘e fa’aaogā ai ‘o lātou ID ‘e resitala ma fa’amāonia ai ‘e ‘ova ma le 16 tausaga.

Link to NewstalkZB (Article): https://www.newstalkzb.co.nz/news/politics/parliament-committee-backs-social-media-ban-for-under-16s-but-mp-who-initiated-inquiry-embarrassed-by-outcome/

ATA: SCR (file).

‘Ua fa’amāvae lē sa ‘avea ma faiā’oga ulu mō le Fetū Sāmoa, le Susuga iā Jamie Soward, talu ona ‘avea ma faiā’oga ulu i le 2023. Na māta’ina taumafaiga ‘a le ‘au liki ‘a tama’ita’i a Sāmoa ‘i lalo le ta’ita’iga ‘a Soward. ‘A’o tāpena atu ai le Fetū Sāmoa mo le Ipu o le Lalolagi, ‘ua momoli fa’amanuiaga ‘a Soward mō le ‘au.

 ‘O nisi ‘o vāega na laualuga iā Soward a’o ‘avea ma faiā’oga, ‘o le manumālō ‘a le Fetū Sāmoa ‘iā Toga ma Fiti, ‘i lā ta’aloga e agava’a ai ‘i le Ipu o le Lalolagi 2026, fa’apea le manumālō iā Papua Niu Kini ‘e fa’alauiloa le Ipu o le Pasefika 2025 fa’asaga iā Ausetālia ma Niu Sila. ‘O lo’o fuafua le Lakapī Liki Sāmoa ‘e filifili ma fa’alauiloa le faiā’oga fou o le ‘au i se taimi lata mai.

Press Release supplied: Rugby League Samoa

ATA: Fetu Samoa (RLS).

‘O le aoauli ananafi na fa’asilasila ai ‘e le Palemia Christopher Luxon le aso ‘o le pālota tele a Niu Sila. ‘O le aso 7 o Nōvema na fa’asilasila ‘e Luxon, ‘o le aso o le pālota tele a le atunu’u. ‘O lo’o tatala ‘e le National le avanoa ‘e toe gālulue fa’atasi ai ma le Act ma le NZ First, pei ona saunoa Luxon. ‘O le aso muamua o Oketopa ‘e fa’ata’ape ai le Palemene ma fa’amuta ai le paea’iga lona 54. ‘O le aso 4 ‘o Oketopa ‘e alo’aia ai le poloa’iga mai le kōvana sili o Niu Sila Dame Cindy Kiro mō le fa’atinoga o le pālota.

‘O le aso 8 o ‘Oketopa i le aoauli ‘e fa’agata ai le fa’auluga ‘o sui tauvā mai pātī ‘ese’ese. ‘O pālota muamua ‘e ‘amata ona tatala i le aso 26 o ‘Oketopa, ‘ae ‘ia o’o atu i le aso 3 o Tēsema ‘ua toe fa’afo’i le poloa’iga a le kōvana sili ‘e aloa’ia ai sui tauvā ua manumālō i le faigā pālota. ‘O Kalaiesetete ‘i le nofoaga na faia ai le fonotaga muamua a le National, na faia ai le saunoaga ‘a le Palemia i le aso ananafi.

Link to RNZ (Article) translated: https://www.rnz.co.nz/news/political/584605/as-it-happened-election-to-be-held-on-7-november-christopher-luxon-announces

ATA: Supplied.

‘Ua fa’alauiloa ‘e le NZTA nisi ‘o ‘auala ‘ua ‘amata fa’aitiitia le nūmera o maila fa’atūlagaina mō nisi ‘o ‘auala ‘i aso fiafia. ‘E fā vāega ‘o le ‘auala State Highway 25 ‘o le ‘ā fa’aitiitia ‘i le 50kilomita i le itūlā mai le 80 po’o le 70 ‘o lo’o iai nei.

Fa’ailoa e le Waka Kotahi, ‘e tusa ma le 982 talosaga na fa’ao’o atu ‘e uiga i le iloiloina ‘o le matā’upu e uiga ‘i le ‘auala ‘i Coromandel, ma na va’aia le pa’ū i lalo ‘o nūmera ‘o ta’avale lavevea talu lea suiga. ‘E tele fo’i vāega o le ‘auala nūmera tasi  lata I Lake Taupō ‘o le ‘ā pa’ū maila fa’atūlāgaina mō le puipuiga ‘i feoa’iga ‘i aso fiafia.

Link to RNZ (Article) translated: https://www.rnz.co.nz/news/national/581571/christmas-comes-early-for-fans-of-speed-reductions

ATA: RNZ / Peter de Graaf