‘Ua tauāluga taumafaiga ‘a lau Manu Sāmoa ‘i le tūlaga 10 ‘o le ta’amilosāga ta’ito’afitu mo le ‘Ōlimipeka 2024 ‘i Pale Farani. Na toe feilo’ai le ‘au ‘a Sāmoa ma le ‘au ‘a Kenya ‘i le sā’iliga ‘o le tūlaga 9 ma le 10, na manumālō ai Kenya ‘i ‘ai ‘e 10 ‘i le 05 ‘i le malae ‘a le Stade de France.

‘Ua fa’afetai ma fa’amālō le taumafai ‘i ālo ma tamafānau ‘a  Sāmoa, le Faiā’oga ma le Pūlega. ‘Ē lē ‘o se taumafaiga ‘e faigōfie, ‘ae ‘ua fa’amālō le lotonu’u, ma le tautua mo le ‘igoa ‘o Sāmoa.

ATA: Manu Sāmoa 7s Team (World Rugby).

Na feiloa’i le ‘au ta’ito’afitu ‘a le Manu Sāmoa ma le ‘au ‘a Iapani ‘i le Semi-Final (9TH Place) ‘o le ta’amilosaga ta’ito’afitu ‘o le ‘Olimipeka 2024, na manumālō ai Sāmoa ‘i ‘ai ‘e 42 ‘i le 07. ‘O lea ‘ua sao atu ai le Manu ‘i le Final (9TH Place Playoff) ‘o le ‘a toe feiloa’i ai ma le ‘au ‘a Kenya ‘i le vaveao ‘o le Aso Sā 28 ‘o Iulai ‘i le 3AM (NZT). 

ATA: Manu Sāmoa 7s Team (World Rugby).

Na manumālō le ‘au ta’ito’afitu ‘a le Manu Sāmoa (26-0) ‘i le lā ta’aloga ma le ‘au ‘a Kenya ‘i le ta’aloga lona tolu ‘a le Manu ‘i le aso lona lua ‘i le Pool B mo le ta’amilosaga ta’ito’afitu ‘o le ‘Olimipeka 2024, ‘o lo’o talimālō ai Farani. ‘O le mālō muamua lea ‘a le Manu ‘i le ta’amilosaga talu mai āna ta’aloga ‘e lua ‘i le aso muamua, na faiā’ina ai ‘i le ‘au ‘a ‘Ausetālia ma Argentina.

ATA: Manu Sāmoa 7s Team (World Rugby).

Tauāluga taumafaiga ‘a le Manu ‘i le aso muamua ‘o le ta’amilosaga ta’ito’afitu ‘o le ‘Olimipeka 2024 ‘i le faiā’ina ai ‘iā Argentina. ‘O ‘ai na faiā’ina ai ‘i ‘e 12 ‘i le 28. ‘O le ‘a ālo atu nei le Manu ‘i lana ta’aloga mulimuli ‘o le Pool B ‘i le 12:00am (taimi Niu Sila) Aso Faraile 26 ‘o Iulai 2024, ‘e feiloa’i ai ma Kenya.

ATA: Manu Sāmoa 7s Team (World Rugby).

Na lē manuia taumafaiga ‘a le ‘au ta’ito’afitu ‘a le Manu Sāmoa ‘i lana ulua’i ta’aloga ‘i le Pool B mo le ta’amilosaga ta’ito’afitu ‘o le ‘Olimipeka 2024, ‘o lo’o talimālō ai Farani. ‘I le aso muamua ‘o le ta’amilosaga na lā feiloa’i ai ma le ‘au ‘a ‘Ausetālia, ma faiā’ina ai ‘i ‘ai ‘e 14 ‘i le 21. ‘O le ‘a ālo atu nei le Manu ‘i lana ta’aloga mulimuli ‘o lenei aso ma le ‘au ‘a Argentina ‘i le 5:30am (taimi Niu Sila), ‘ona feiloa’i ai lea ma le ‘au ‘a Kenya ‘i le aso ‘a taeao ‘i le 12:00am (taimi Niu Sila) ‘o le vaveao ‘o le Aso Faraile 26 ‘o Iulai.

ATA: Manu Sāmoa 7s Team (World Rugby).

Vi’ia le Ali’i ‘ua toe manumālō lau Manu Sāmoa ‘i lana ta’aloga lona 2 mo le 2024, na lā feiloa’i ai ma le ‘au ‘a Sēpania ‘i le mālae ‘a le Apia Park ‘i le afiafi nei.

Na mālō le Manu ‘i ‘ai ‘e 34 ‘i le 30. 

PHOTO: Manu Sāmoa practicing Siva Tau / FB Manu Sāmoa.

Vi’ia le Ali’i ‘ua manumālō lau Manu Sāmoa ‘i lana ulua’i ta’aloga mo le 2024, na lā feiloa’i ai ma le ‘au ‘a ‘Ιtālia ‘i le mālae ‘a le Apia Park ‘i le afiafi nei. Na mālō le Manu ‘i ‘ai ‘e 33 ‘i le 25. ‘O le ‘a tāpena atu le ‘au ‘a le tatou atunu’u ‘i lana ta’aloga lona 2 ‘o le tausaga ma le ‘au ‘a Sēpania ‘i le Aso To’ona’i 13 ‘o Iulai, ‘i le vaiāso fou.

PHOTO: Manu Sāmoa practicing Siva Tau / FB Manu Sāmoa.