Fēfa’asōaa’i le ‘au fai tōfā ‘i matā’upu ‘e fa’atatau ‘i le Talafa’asolopito ma Tala’aga ‘i le vā ‘o Siāmani, Niu Sila ma Sāmoa

‘O le aso ‘ananafi na fa’atasi atu ai nisi ‘o le ‘aufaigaluega ‘a le Si’ufofoga ‘o le laumua, ‘i se polokalame na fa’atāunu’uina ‘i le falemāta’aga ‘a le Te Papa ‘i Ueligitone. ‘O le ‘autū ‘o le polokalame ‘o le fefa’asōā’iga ‘a le ‘au fai tōfā ‘i matā’upu ‘e fa’atatau ‘i talafa’asolopito ma tala’aga ‘i le vā ‘o Siāmani, Sāmoa ma Niu Sila, ‘aemaise le taimi a’o pulea ‘e Siāmani Sāmoa.

Sā faimalaga mai ‘i Sāmoa le fa’aūluūluga ‘o le Falemata’aga ‘a Sāmoa ‘o lo’o ‘i Mālifa, le Afioga ‘iā Utufa’asili Sharon Rosita Roma, ‘e fa’asoa ‘i le tāua ‘o le fa’alauiloaina ‘o tala’aga ma measina ‘o lo’o ‘i le falemata’aga ‘a le tatou atunu’u. Na fa’amālosia ‘e Utufa’asili le pa’ia ma le mamalu ‘o le tatou atunu’u, ‘e lē gata ‘i Sāmoa, a’o atunu’u ‘i fafo, ‘afai ‘e malaga atu ma āsia lo tatou atunu’u, ‘aua ne’i galo ‘ona asiasi atu ‘i le tatou Falemata’aga, ‘o le nofoāga ‘o lo’o teumalu ai le talafa’asolopito ‘o Sāmoa, ma āna measina.

‘O nisi ‘o le ‘au fai tōfā ‘i matā’upu ‘e fa’atatau ‘i tala faasolopito ma tala’aga ‘i le vā ‘o Siāmani ma Sāmoa, ‘o ni alo ‘o le atunuu, na fa’asoa ‘i vāega ‘ese’ese ‘o su’esu’ega ‘i nafa ma tala’aga. ‘O le Afioga ‘iā Leāfā Wilson, po’o Olga Krause, na fa’asoa ‘i le tala’aga ‘o ona tuaā ‘i le taimi ‘o pūlea ‘e Siāmani Sāmoa ‘i le vā ‘o le 1900 ma le 1914, na āfua ai ona to’atele tagata Siāmani ‘o nonofo ‘i Sāmoa ‘e o’o mai ‘i le asō.

‘O le Afioga ia Togialelei Dr. Safua Akeli Amaama, ‘o le fa’aūluuluga ‘o le vaega ‘e nafa ma matā’upu ‘o Talafa’asolopito ma Aganu’u ‘a le Pasefika ‘i le Falemata’aga fa’avāmālo ‘a Niu Sila, le Te Papa ‘i Ueligitone. Sa fa’asoa ‘i le tele ‘o measina ‘o lo’o teuina ma fa’alāuiloa ‘i le Te Papa.

ATA: Symposium on Shared Histories, Connected Futures: The Entangled Relationships between Aotearoa New Zealand, Germany, and Sāmoa Speakers: Ulu Afaese (Digital Pasifik), Leafa Wilson/Olga Krause, Murray Faivalu (SCR), Courtney Powell, Anna Fa’asolo (SCR), Togialelei Dr Safua Akeli Amaama, Utufa’asili Roma, Attendees, Savelina Kasiano (SCR), Dr. Annika Sung & Dr. Christine Winter. Sāmoa Capital Radio