‘Ua fa’apopoleina ‘au’aunaga tau-le soifua mālōlōina ‘i totonu ‘o Niu Sila, ‘i le tūlaga pa’ū maualalo ‘o le aofa’i ‘o tagata ‘ua faia tui puipui mō le fa’ama’i ‘o le tale vivini, po’o le whooping cough.  ‘O le Aso Faraile na te’a nei, na fa’ailoa mai ai āloa’ia ‘e le Matāgāluega ‘o le Soifua Mālōlōina, le pipisi ai ‘o le tale vivini ‘i totonu ‘o Niu Sila.  ‘O lea gāioiga ‘ua faia ‘ina ‘ua o’o atu ‘i le 263 le aofa’iga ‘o tagata ‘ua a’afia ‘i lenei ma’i ‘i totonu ‘o le māsina ‘ua mavae atu nei.  ‘Ua tu’uina mai ai ma se lapata’iga ‘a le Soifua Mālōlōina, ‘e tusa ‘o le maualalo ma le to’aitiiti o lātou ‘ua faia tui puipui ‘o lenei fa’amai pipisi.

Na fa’ailoa mai ‘e le tama’ita’i Fa’atonu ‘o le Nofoaga tūtotonu mō Fautuaga  mō Tui Puipui, ‘o Nikki Turner, ‘e tatau ‘i tagata ‘ona faia o lātou tui puipui mō lenei fa’ama’i, ‘e tau tāofiofia  ai le o’o atu ‘i se tūlaga faigatā.
Na ia tā’ua ‘o le tūlaga ‘o lo’o iai nei, ‘e mautinoa ‘o le ‘ā o’o atu ‘i le 12 māsina po’o le 18 māsina ‘o pepesi pea lenei fa’amai ‘i totonu ‘o le atunu’u, mā ‘e lēai se faiga vave ‘e mafai ‘ona taofia ai, se’ia vaganā ai le fai ‘o tui puipui.

‘O le talevivini, ‘e aupito sili ‘ona āfāina ai pepe fou fa’ato’ā fānanau mai, ‘ātoa ai ma tagata mātutua, mā ‘e mafai ‘ona māliliu ai tagata ‘i nisi ‘o taimi.  Na fa’ailoa mai fo’i ‘e le tama’it’ai fōma’i ‘o Susan Jack le fa’atonu ‘o togafitiga ‘a le Te Whatu Ora, ‘e mana’omia le faia ‘o tui ‘o lenei fa’ama’i, ‘ona ‘e sili atu ‘ona pipisi gōfie nai lō le koviti-19.  Na ia tā’ua ‘o le taimi nei, ‘o lea ‘ua fa’agāsolo fuafuaga fa’alaua’itele ‘a le matāgāluega ‘o le Soifua Mālōlōina ‘e tali atu ai ‘i lenei fa’ama’i, mā ‘e tatau ‘ona fa’atāua ‘e tagata ‘uma mō le puipuia ‘o le soifua mālōlōina.

Link to RNZ (Article) translated by Lauano Ati Ilaoa: https://www.rnz.co.nz/news/national/534519/new-zealand-declares-whooping-cough-epidemic

ATA: RNZ.

O le ‘a fa’aāuāu ona faia fua su’esu’ega po’o fa’āta mo le fa’a’au tagata mo tama’ita’i poo le cervical screening, e maualuga tulaga ‘o le lamatia i a’afiaga ‘o le kanesa, pei ona fa’amaonia mai ‘e le Minisitā o le Soifua Māloloina Dr Shane Reti. O le naunauta’iga ‘a le mālō, ina ‘ia ‘ausia taunu’uga sili atu ‘e puipui mai ai tagata ‘i le kanesa.

A’o lumana’i ai le faigā-pālota ‘i le tausaga na te’a nei, na folafola ai e le Leipa le faia fua o su’esu’ega po’o fa’ata mo le fa’a’au tagata,  mo so’o se tasi e i le vā o le 25 ma le 69 tausaga le matutua, o se faiga fa’avae sa lagolagoina e le ‘au ātamamai o le soifua maloloina. O le ‘a fa’a’āu’au fo’i ona faia tui puipui o le HPV, e maua ai le puipuiga mai ‘i le kanesa.

Talu ona fa’avaeina le polokalame o le National Cervical Screening ‘i le 1990, ua fa’aītiitia le 50 pasene ‘o le numera o tagata e aafia ‘i le kanesa ‘o le fa’a’au tagata ‘i Niu Sila, ua fa’aītiītia fo’i tagata māliliu ona ‘o le cervical cancer pe tusa ma le 60 pasene. O lo’o ave le fa’amuamua ‘i le fa’atupega o ‘auaunaga mo su’esu’ega o tinā ma tama’ita’i e maualuga a’afiaga e maua ai ‘i le kanesa, e aofia ai tama’ita’i Māori ma Pasefika. O le polokalame mo su’esu’ega o lo’o fa’atupeina ‘e le soifua māloloina ‘a Niu Sila.

ATA: GARO / Phanie. RNZ