Sāuniuni mō le motusia ‘o le ‘eletise ma feso’otaiga ‘ona ‘o le mālosi ‘o le lā

‘Ua faia nei tāpenaga ‘a le ‘Ōfisa mō le tali atu ‘i ni Fa’alavelave Fa’afuase’i, mō le ono motusia ‘o le ‘eletise ‘ātoa ai ma feso’ota’iga televavave, ‘i le taimi ‘e ono lavea ai ma a’afia Niu Sila ‘i se afā ‘o ‘ave mālolosi ‘o le lā, po’o le tūlaga lea ‘e tā’ua ‘i le gagana Peretānia, ‘o se extreme solar storm.  ‘O le māsina ‘o ‘Aukuso na fa’ailoa mai ai fa’alaua’itele ‘e le ‘Ōfisa lenei, se fuafuaga ‘e tali atu ai ‘i ni uiga ma ni tūlaga fa’alētonu ‘o le tau ‘o le vānimonimo, mā ‘o le ‘ā taumafai ‘e fa’afou ma fa’aleleia pea lenei fuafuaga ‘i nai vāiaso ‘o lumana’i nei.  ‘O le tau ‘o le vānimonimo, ‘o mea ia ‘e tutupu ‘i fafo atu ‘o le si’osi’omaga po’o le atimosifia ‘o le lalolagi, ‘o le māfua’aga ‘autū ‘o ia suiga ‘o le lā, lea ‘e fai ma fesuisuia’i mai ai afā ma matagi ‘o le mālosi’aga ‘e māsani ‘ona a’afia atu ai ma le feso’ota’iga ‘i lo tātou lalolagi.  ‘O le fuafuaga fa’ata’atia ‘e pei ‘ona fa’ailoa mai ‘a lenei ‘ōfisa, ‘o lo’o aofia ai ta’iala mō mea ‘e tatau ‘ona faia ‘i le taimi ‘e ono pē ai le ‘eletise ma motusia feso’ota’iga televavave ‘e ‘auala ‘i satelite fa’apea uaeālesi ma feso’ota’iga fa’atēkonolosi.

Peita’i, ‘e lē ‘o aofia ai ‘i lea fuafuaga, a’afiaga faifai’umi ‘o se fa’alētonu fa’apea ‘e ono tūla’i mai, ‘aemaise ‘o a’afiaga tau ‘i le soifua mālōlōina ‘o tagata, fa’apea ma isi fa’alētonu ‘e pei ‘o le ‘elea ‘o paipa tetele mō le suāu’u ma le penisini, ‘ātoa ma isi vāega ‘e pei ‘o le toe pā’u’ū mai ‘i le lalolagi ‘o otaota ma ‘u’amea mai le vāteatea ‘ona ‘o uiga ogaoga ‘o le vau ‘i le vānimonimo.

Link to RNZ (Article) translated by Lauano Ati Ilaoa: https://www.rnz.co.nz/news/national/534709/parts-of-power-system-could-be-out-for-36-hours-in-event-of-extreme-solar-storm

ATA: An aurora lights up the sky in Mercer in May. Photo: Supplied / Laura Acket. RNZ