Ono telē se pili mō le mālō Niu Sila mō lona sao ‘i le tau ‘o suiga ‘o le tau ‘o le lalolagi

‘E ono telē se tupe ‘e totogi ‘e le Mālō Niu Sila, mō lona sao ‘i taumafaiga ‘e fa’aitiitia kasa ‘o’ona ‘e fa’aaogāina ‘e le lalolagi ‘ona ‘o se fua ma se tapula’a fou ‘ua fa’atūlagaina mō atunu’u ‘e lelei lo lātou tamāo’āiga, mō polokalame ‘o le suiga ‘o le tau.

‘O ītūlā fa’ai’u ‘o le fonotaga ‘a Mālō ‘Au Fa’atasi ‘i le suiga ‘o le tau, le COP29 lea sā faia ‘i le atunu’u ‘o Azerbaijan, na pāsia ai se fua fou mō atunu’u mau’oloa ma lelei lo lātou tamāo’āiga, ‘i se fa’aputugātupe fa’alevāomālō, ‘e fesoasoani ai ‘i atunu’u tau ātīna’e ma vaivai lo lātou tamāo’āiga, ‘i gāluega ma puipuiga mai a’afiaga ‘i suiga ‘o le tau.  ‘O le i’ugāfono mai lea fonotaga, ‘ua ‘ioeina ai le sao ‘o atunu’u mau’oloa ‘e $300-Piliona Tālā ‘i le tausaga ‘e tasi se’ia aulia le tausaga ‘e 2035, ‘o se aofa’iga na tē’ena ‘e atunu’u tau ātīna’e sā ‘āuai ‘i le fono ‘e fa’apea, ‘e lē taitai ‘ona lava. 

‘O le sao ‘o lo’o iai nei ‘o le mālō Niu Sila mō lea fa’amoemoe, ‘o lo’o fua ‘i le aofa’iga po’o le tapula’a ‘e $100-Piliona Tālā lea sā iai muamua.  Na tā’ua mai ‘e le fa’aulūuluga ‘o polokalame mō suiga ‘o le tau ‘a le mālō Niu Sila, ‘o Christina Hood, ‘o le sao ‘o lo’o iai ‘o le mālō Niu Sila ‘i le taimi nei ‘e $235-miliona Tālā ‘i le tausaga lea na ‘āmata mai ‘i le tausaga ‘e 2022 ‘e o’o atu ‘i le 2026, ‘ae peita’i lā, ‘o le fua ma le tapula’a fou ‘e pei ‘ona pāsia ‘i le fonotaga ‘i Azerbaijan, ‘e mautinoa lava ‘o le ‘ā si’itia maualuga ai lea aofa’iga.

Link to RNZ (Article) translated by Lauano Ati Ilaoa: https://www.rnz.co.nz/news/top/534729/cop29-deal-disappoints-kiwi-climate-activists

ATA: Supplied / COP29, Baku.