Fa’avae le vāega su’esu’e fou ‘i le Matāgāluega ‘o Tamaiti

‘Ua fa’avaeina ‘e le Mālō Niu Sila, se ‘ōfisa fa’apitoa ‘i totonu ‘o le Matāgāluega mō Tamaiti, le Oranga Tamariki, mō le faia ‘o su’esu’ega ‘i matā’upu ‘e a’afia ai le saogalēmū ‘o tamaiti ‘e tausia mā ‘i lalo ‘o le va’aiga ‘a lea matāgāluega ‘a le Mālō.

‘I se fa’asalalauga tusitusia mai le tama’ita’i minisitā ‘o le Matāgāluega, ‘o Karen Chhour, na ia tā’ua ai, ‘o le vāega fou lenei, ‘o le Child Protection Investigation Unit, ‘o le ‘ā fa’auluulu ‘i le tama’ita’i ‘e suafa ‘iā Janis Adair, lea ‘o lo’o ‘avea nei ma Ta’ita’i Leoleo ‘i le Matāgāluega ‘o Falepuipui.  ‘E lē gata ‘i lea, ‘ae ‘o le ‘ā gālulue ai ma tagata ‘e iai tomai fa’apitoa ‘ina ‘ia mautinoa ‘e lelei ma manino le taunu’uga ‘o ni su’esu’ega ‘e faia ‘i āfāina ma ni fa’alētonu ‘e a’afia ai tamaiti ‘i lalo ‘o le tausiga ma le va’aiga ‘a le Mālō.

‘O le ‘ā sā’ili’ili ma silasila lea vāega fou ‘i ni fa’afītāuli ‘o lo’o iai ‘i le fa’atinoina ‘o gāluega ma ‘au’aunaga ‘a le Matāgāluega ‘o le Oranga Tamariki ‘e gālulue so’oso’o tau’au ai ma le ‘Ōfisa ‘o le Mālō ‘e tali atu ‘i sauaga ma ni āfāina ‘o tagata ‘e i lalo ‘o le va’aiga ma le tausiga ‘a le Mālō.  Na tā’ua fo’i ‘e le minisitā, ‘o Karen Chhour, ‘o le ‘ā tūto’atasi le gāluega ‘a lenei vāega fou pei ‘ona fa’avaeina nei, mai ‘au’aunaga māsani ‘a le Matāgāluega ‘o Tamaiti, mā ‘e tatau ‘ona aulia atu le ‘āmataga ‘o le tausaga fou, 2025, ‘ua ‘āmata fa’atino ana gāluega fai.

Link to RNZ (Article) translated by Lauano Ati Ilaoa: https://www.rnz.co.nz/news/political/534536/new-child-protection-investigation-unit-announced-by-children-s-minister

ATA: Children’s Minister Karen Chhour. Photo: RNZ / Samuel Rillstone