‘E $800 le tupe a se tamā na gau ina ua fa’aaogā e lona atali’i 6 tausaga fa’amaumauga o lana credit card, ‘e fa’atau ai ni pōnesi mō lana ta’aloga luga o ‘upega tafa’ilagi. ‘O lea matā’upu na su’esu’eina ‘e le ‘au’aunaga ‘e nafa ma le su’esu’ega ‘o fa’aseā tau tupe.

‘I līpoti na tā’ua ai, na tu’u ‘e le tamā ‘i lana komepiuta fa’amaumauga ‘o lana pepa tala tupe ‘e fa’atau ai ana ta’aloga online, peita’i, ‘o le komepiuta lava lea e tasi e fa’aaogā ‘e lona atali’i 6 tausaga. Na ia maua mulimuli ane le $800 na fa’aaogā e lona atali’i e fa’atau ai gems po’o pōnesi mol ana ta’aloga. Sa fa’aseā le tamā i le faletupe, ‘e fa’apea sā tatau ona lātou mate’ia le fa’aogā sesē o lana card ‘i le va’aia o le silia ma le 100 o transactions po’o le fefa’auia’iga o tupe i le taimi e tasi.

Peita’i na tali mai le faletupe latou te lē taliaina le finau a le tamā. Na toe iloilo e le ‘au’aunaga tūto’atasi le fa’aseā, ma talosaga ai le i le faletupe ina ia toe totogi atu le tupe a le tamā, ‘ona ua leai se tupe e fa’atau ai la lātou mea’ai. Na talia e le faletupe ma mālilie e totogi atu le tupe ‘atoa a le tamā, ‘e aunoa ma se isi su’esu’ega e toe faia. Fa’aalia e Susan Taylor o se sui o le ‘au’aunaga tūto’atasi, ‘o le fa’afītāuli pito ta’atele lea, le lē sdaogālēmū o le teu ‘o fa’amaumauga ‘o debit ma credit cards luga ‘o telefoni ma komepiuta. ‘O lo’o fautuaina tagata ‘ia siaki ā lātou teugātupe ‘i aso ta’itasi, ‘ia vave ai ona maua nit upe ‘o ‘ave’ese mai ma lau teugātupe ‘e aunoa ma le iloa.

Link to RNZ (Article) translated: https://www.rnz.co.nz/news/business/591247/six-year-old-spends-food-budget-on-video-game-gems

ATA: SCR (file).

‘Ua ‘āmata fa’amamaluina mai le asō, le si’itaga ‘o le Living wage ‘i le $29.90 ‘i le ītūlā, ‘e 95 sene ‘ua fa’aopoopo ‘i le $28.95 sā iai.  ‘O le Living Wage Aotearoa NZ, le mafutaga ‘o ni fa’alāpotopotoga tu’ufa’atasi ‘a ni iuni ma nisi fo’i fa’alāpotopotoga, lātou te fa’atūlagaina le totogi ‘e talafeagai ma lava, ‘e tausi ai se ‘āiga.

Na saunoa le ta’ita’ifono Muriel Tunoho ‘o le taimi nei, ‘ua ātili fa’ateteleina le fa’alētonu ‘i aso ta’itasi ‘ona ‘o le taugatā ‘o le tau ‘o le soifuaga, ma ‘ua matuā mo’omia lava le Living Wage.  ‘E silia ma le 340 fale faigāluega ‘e fa’aaogāina le ta’iala lea ‘e totogi ai tagata faigāluega ‘i le totogi ‘e talafeagai ‘ona tausi ai se ‘āiga.

‘E lē’o iai se tu’utu’uga fa’aletūlāfono mō fale faigāluega ‘e totogi ai tagata ‘i se totogi ‘i luga atu ‘o le totogi ‘āmata.  ‘O le asō, lea ‘ua si’itia ai fo’i le totogi ‘āmata ‘i le $23.95, ‘o se si’itaga ‘e le’o ‘ausia ma ō gatasi ma le tau ‘o le soifuaga.  Na saunoa Finn Cordwell le ta’iulu ‘o le vāega ‘o fa’atūlagaina le Living Wage, ‘e mānana’o ‘i le mālō ‘ina ‘ia mānatunatu pe iai se tasi ‘i le Kāpeneta ‘e mafai ‘ona tausi ma ola ‘i le $23.95 ‘i le ītūlā, pei ‘ona tā’ua ‘i le Leitiō Niu Sila.

Link to RNZ (Article) translated: https://www.rnz.co.nz/news/business/591195/needed-more-than-ever-living-wage-rises-to-29-point-90-per-hour

ATA: RNZ / Rebekah Parsons-King

Na fa’aalia le to’atāma’i ‘o se tamā Porirua ‘ona ‘e faitau māsina ‘o fīnau ma le ‘Ōfisa ‘o Galuega ma Tupe Maua ‘e fa’atatau ‘i lana penefiti, ‘ae ‘ana lē tele ‘i ai fesili ‘a le Radio New Zealand ‘e lē vave ‘ona maua.

Na fa’ato’ese le Matāgāluega ‘o Aga Feso’ota’i (MSD) ‘ona ‘o le lē taliaina ‘i le taimi muamua ‘o le talosaga ‘a le tamā mō le penefiti ‘ua ta’ua ‘o le Supported Living Payment, ‘e ui na fa’ao’o atu ‘i ai le pepa fa’amaonia mai lana fōma’i ‘e lē tatau ‘ona toe faigāluega. 

Na fa’aalia ‘e lona alo, ‘o lona atugaluga, ‘o isi ‘āiga ‘e le’o mafai ma faigatā ‘ona maua le penefiti, ma sā lē tatau lava ‘ona tupu le tūlaga ‘o le tāpā ‘o se fautuaga mai se tagata ‘o lo’o ia sīlāfia lelei le fa’agāsologa ‘o le polokalame ‘o penefiti, fesoasoani ‘i ai ma le ‘au’aunaga fa’asalalau ‘a le Leitiō Niu Sila, ‘ina ‘ia maua se fa’ai’uga lelei ‘o le matā’upu. 

‘E 61 tausaga ‘o le tamā ma na vāea mai lana gāluega ‘i le māsina ‘o ‘Aukuso peita’i ‘o le taimi lea ‘ua leva ‘ona feagai ma faigatā ‘ona ‘o tūlaga ogaoga ‘o lona gasegase ‘i le suka.  Na feiloa’i ma le Winz ‘iā Sētema, ‘ae fa’ailoa ane ‘i ai ‘e lē agava’a ‘i le Supported Living Payment po’o le penefiti ‘e fesoasoani ‘i le totōgiga ‘o le fale, ‘ae fa’atonu ‘e talosaga mō le penefiti mō tagata su’e gāluega.  Na maua le $145 ‘i le vāiaso peita’i ‘e lē taitai ‘ona ‘ā’ua’u ai le fa’asoa. 

Na fa’atonu ‘e le fōma’i ‘i le māsina ‘o Nōvema ‘e lē tatau ‘ona su’eina sana gāluega.  ‘O se fautuaga ‘a se uō ‘a lona ‘āiga ‘e malamalama lelei ‘i penefiti, na talosaga ai mō le Supported Living Payment.  Na le’i talia, lēai se tusi ‘e fa’ailoa atu ai, lua vāiaso na tuana’i ‘ae telefoni atu ‘i le ‘ōfisa, ‘ae ta’u ane ai ‘ua lē talia le talosaga.  Ma na toe fautuaina ‘e le uō lava lea, ‘e toe apili le fa’ai’uga.  Lua vāiaso mulimuli ane ‘ae toe feso’ota’i atu ‘i le Winz ‘ae fa’ailoa ane ‘ua lē talia fo’i le ‘apili ma ‘e tatau ‘ona toe talosaga le tamā mō le penefiti su’e gāluega.

Ma uia ai loa ‘e le tamā le fesoasoani ‘a le Leitiō Niu Sila lea na fesiligiaina le MSD.  ‘O nai aso mulimuli ane, na fa’afeso’ota’i ai ‘e le MSD le tamā ma fa’ailoa ‘i ai ‘ua talia lana tālosaga ma ‘e na te mauaina le ta’i $331 ‘i le vāiaso ma toe totogi mai isi vāiaso ia ‘ua tuana’i. 

Na fa’aalia ‘e le komesina fa’aitūmālō Gagau Annandale-Stone le fuafuaga ‘e fa’ato’ese pe ‘ā fesāga’i ma le tamā, ‘ona ‘o le sesē ‘o la lātou fa’ai’uga.  Na māfua lea sasi ‘ona ‘e lē’i iloiloina ‘āto’atoa mau ‘uma na tu’uina atu.  ‘O le fa’amoemoega ‘autū ‘o la lātou ‘aufaigāluega ‘ina ‘ia mafai ‘ona tu’uina atu se ‘au’aunaga talafeagai ‘i taimi ‘uma ma gālulue mālosi ‘i aso ‘uma ‘e fesoasoani ‘i tagata ‘o lo’o sa’ili se fesoasoani. 

Link to RNZ (Article) translated: https://www.rnz.co.nz/news/national/590986/porirua-man-granted-supported-living-payment-after-ongoing-battle

ATA: RNZ / Rebekah Parsons-King

‘O le vāiaso talu ai na faia ai se tufagā fa’ailoga ‘a le Te Herenga Waka, le Iunivesitē ‘o Vītōria ‘i Uēligitone ‘o le Ki te Pae Excellence Awards ‘e fa’atāuaina ai faiā’oga ‘i le Iunivesitē ‘ātoa ‘ua maoa’e la lātou tautua ma ‘ua molimauina le lelei ‘āto’atoa ‘o le fa’atinoga ‘o a lātou matāfai’oi mā lo lātou sao telē ‘ua mafai ai ‘ona ‘ausia le tōfāmamao ‘a le iunivesitē. 

Na fa’amanuiaina ai le Susuga ‘a Dr. Ali’itasi Su’a Tāvila ‘i le fa’ailoga ‘o le Le Moana Mua Award.  ‘O Dr Aliitasi, ‘o le Faiā’oga Sīnia ‘i le School of health ‘i le Iunivesitē ‘o Vītōria.  ‘Ua molimau le iunivesitē, ‘o le a’oa’oga ‘a Dr Aliitasi, ‘ua atagia mai ai mata’aga matagōfie fa’a-Pasefika ‘ua tā aofa’i ‘uma ai vāega tāua ‘uma.  Ma na te a’oa’o atu ‘i se ‘auala ‘e lē gata ‘e fa’aaloalogia ai le silafia tāua na pasi mai ‘e tua’ā ma ia fa’amautinoa fo’i ‘o lo’o fa’a’āuai tagata ‘uma ma mafai ‘ona o lātou a’oa’o tusa lava po’o ai ‘i lātou.  ‘Ae ‘o lo’o puipui ma tausisi pea ‘i mata’aga matagofie ‘o tū ma aga’ifanua fa’apea o lātou fa’asinomaga, ‘e fa’avae nei mea ‘uma ‘i le Tōfā Mamao. 

‘O le susuga ‘a Dr Ali’itasi ‘o se sui ‘o le Komiti Fa’atonu ‘a le Leitiō ‘o le Si’ufofoga ‘o le Laumua.  Sā molimauina fo’i nisi ‘o tama fānau ‘a Sāmoa na fa’amanuiaina ‘i nisi fo’i ‘o fa’ailoga.

ATA: Pasifika at Te Herenga Waka – Victoria University of Wellington / Facebook.

E lē to’atasi, e lē to’alua fo’i, ae o le finagalo o le Palemia ma le Mālō, ia o ‘ese uma i latou o lo’o a’afia i le Polokiki mai le tau’aveina o tofiga i totonu o le Lakapi Samoa po’o le Iuni Lakapi a le atunu’u.

E lē māmā i le Palemia, Susuga i le La’aulialemalietoa Leuatea Polāta’ivao Fosi Schmidt, le tulaga fa’aletonu o i’uga ua i ai ‘au masi’i fa’avāomālō a Samoa i le lakapi, ma ua leai ma se tasi o toe fia lagolagoina, ona ua lotolotoi ai i latou o lo’o i le Polokiki i tonu fai a le Lakapi Samoa.

Ua tali manino le Palemia i fesili a Ofisa Fa’asalalau pe ua a’e se tōfā e saini loa i le maliega mo le talosaga i le seleni e fa’amatu’uina mai i le fesoasoani a Ausetalia mo Iuni Lakapi a Fiti, Tonga ma Samoa, ona ua fa’amavae Tuila’epa Lupesoliai Dr. Sa’ilele Malielegaoi, o le sa avea ma Ta’ita’ifono o le Lakapi Samoa, a’o ia fo’i o le Ta’ita’i o le Itu Agai [H.R.P.P.].

Peita’i ua tali manino le Palemia, ua ‘ave lana tali iā Ausetalia, e fa’agaioi pea le talosaga mo le auina mai o lea fa’amanuiaga, ae se’i aga’i pea le Mālō e fufulu ‘ese le Polokiki mai le Lakapi Samoa, ona fa’atoā fa’asaga lelei lea e fa’asoa lea seleni.

O lona uiga, e tatau ma alagātatau ona fa’amavae uma i latou o lo’o avea ma Faipule i le Palemene, o lo’o i totonu o le Komiti Fa’atonu a le Lakapi Samoa.

“O le ‘auga o la’u tusi na ‘ave, o ē o lo’o a’afia i le polokiki, e lē a’afia fua i latou e le’o i totonu o le Palemene, i lo’u talitonuga o ī lea na mafua ai ona fa’apea fa’ai’uga a le Iuni Lakapi.

“Ua fa’apolokiki le faiga o le tatou Iuni, o lea sa tilotilo e tatau ona fa’amamā, ae o lea e le’i mamā uma.

“O lea ua fa’amavae isi, ae le’o fa’amavae isi, lea fo’i ua fa’ailoa mai i le latou tusi na aumai, e lē fa’amavae isi.

“O lea ua tali mai i la’u tusi e lē ō ‘ese le isi vaega, ia lea ua toe tapena la’u tali e ‘ave i ai, ua mae’a fo’i ona o’o mai le Peresetene o le Iuni, ma feiloa’i mai iā te a’u ma fa’ailoa atu ai fo’i le naunauta’iga o le Mālō o lo’o i ai.

“Tu’u le lakapi i lima o i latou e tatau ona aga’i atu e fai le lakapi, ae ‘aua ne’i toe o’o i le tulaga lea e i ai, ua leai se isi e fia lagolagoina le tatou lakapi, ona ua fa’apolokiki ona fai le lakapi.

“E lua vaega sa ou fa’ailoa i le Iuni Lakapi a le Lalolagi fa’apea le Iuni a Ausetalia lea e aumai ai le tupe.

“Muamua, e lē mafai ona ou sainia se mea, pe a lē fa’amamā ma fa’asa’o nisi o fa’afitauli o lo’o tula’i mai totonu o le Iuni Lakapi a Samoa.

“Ae afai e lē ō ‘ese tagata nei ma le Iuni, ona faitalia lea o latou, auā o lea ua aga’i mai Iuni lakapi lāiti i totonu o le atunu’u ma fa’ailoa mai, ua tatau ona fai se isi Iuni Lakapi fou a Samoa.

“Afai o le fa’atūina o le Iuni fou e fīlēmū ma lelei ai le lakapi, ma sagatonu ai le lakapi i le lumana’i, ‘ave i ai ma le tupe lea na aumai e Ausetalia e fa’agaioi ai, o le tulaga lenā la’a fai.

“E lē mafai, lē mafai ona saini i le fesoasoani lea mai Ausetalia, ae aumai toe ‘ave i le mea o lea e fa’aletonu ai le tatou Iuni Lakapi, auā ana lelei le Pulega, aisea o le ā ou lē vave sainia ai le fesoasoani.

“E tatau ona foia fa’afitauli o lo’o aliali mai i totonu o le Iuni, o le ā mauālalo ai le tulaga o ‘au fa’avāomālō a le atunu’u sa masani ona mimita ai so’o se Samoa ona o le tulaga ‘ese o taumafaiga a nai a tatou tamafanau, o le popolega ina ne’i solo i tua le tulaga lelei o ‘au masi’i a Samoa i isi tauvaga i le lumana’i.”

Tusia e: Taunuuga Toatasi

ATA: Savali Newspaper