‘Ua maoa’e le fa’atupula’ia ‘o fa’asalalauga taufa’asesē po’o scams ma fake news ‘i luga ‘o ‘upegatafā’ilgi, ‘e āofia ai ma ‘itulau ‘e pei ‘o le Facebook ma isi ‘au’aunaga ‘e fa’aaogā ai le social media.

‘I se tasi ‘o tusitusiga ‘i luga ‘o le Facebook page ‘o lo’o ‘ua fa’asoa ‘e le to’atele ‘o tagata Sāmoa, ‘ua fa’aigoaina ‘o le “Apex Drive Malaysia” ‘o lo’o fa’asalalau ai se tala ‘ua fa’aulutalaina “Fiame Naomi Mata’afa didn’t know the microphone was on we say goodbye to her forever. It was a sad day for the whole of Samoa”

‘O lea ulutala ‘o lo’o fa’aali mai ai le ata ‘o le afioga ‘i le tama’ita’i Pālemia ‘i se fa’atalanoaga ‘a le Sāmoa Capital Radio ma lana afioga ‘i lana malaga fa’aleva’omālō ‘i le Aso 13 ‘o Iuni 2022, a’o iai le malaga ‘i Ueligitone, na fa’atalanoa ai ‘e le afioga ‘iā Afamasaga Tealu Moresi le Pālemia, ‘i le InterContinental Hotel, ‘i Ueligitone.

‘E mafai ‘ona ‘e maimoa ai ‘i le fa’atalanoaga lea, ‘i le YouTube channel ‘a le SCR:

‘O lea fa’asalalauga taufa’asesē, ‘o lo’o fa’aaogā mai ai le fa’ailo (logo) ‘a le Samoa Observer, ‘e fa’afōliga mai ai ‘o se tala moni. ‘A faitau iai le lautele, ‘e iloa gofie lava, le lē fa’avaea ‘o fa’amatalaga ‘o lo’o ta’u mai ai, ma ‘e lē ‘o ni matā’upu nei ‘o talanoaina ‘i le fa’atalanoaga ‘a le Sāmoa Capital Radio, ma le afioga ‘i le Pālemia.

‘Ua lipotia ‘e le ‘au’aunaga ‘a le Samoa Observer lea Facebook page ‘i le tautua ‘a le Meta ‘i ‘Amerika, ma ‘ua fa’aopopo ai ma le lipoti ‘a le SCR, ‘e lipotia ai nei ‘au’aunaga ‘o lo’o fa’asalalauina ni fa’amatalaga pepelo, ma fa’aaoga ai ata ‘o le tama’ita’i Pālemia, le Pule Sili ‘o le Si’ufofoga ‘o le Laumua, fa’apea fa’ailo ‘a le Samoa Observer.

‘O le fautuaga ‘a le Si’ufofoga ‘o le Laumua, ‘o le ulua’i leitiō Pasefika ‘i Aotearoa Niu Sila, ma na fa’avaeina mai le 1992, ma ‘ose tautua ‘ua fa’amoemoeina ‘e tagata mo le silia ‘i le 32 tausaga: ‘ia ‘aua ne’i talitonuina nei fa’asalalauga taufa’asesē, ma ‘ia tatou mataāla ‘i lenei taimi, ‘i le fa’atupula’ia ‘o fa’asalalauga taufa’asesē po’o scams ma fake news ‘i luga ‘o ‘upegatafā’ilgi.

ATA: Screenshots (Sāmoa Capital Radio / Samoa Observer).

‘O le ‘ā gālulue so’oso’otau’au le RNZ fa’atasi ma le Sāmoa Capital Radio po’o le Si’ufofoga ‘o le Laumua, ‘e tautua tagata Sāmoa ‘e tautatala ‘i le Gagana Sāmoa ma ‘i lātou ‘o lo’o a’oa’oina le gagana ‘i Aotearoa Niu Sila. 

‘O le asō, 25 Iulai 2024, ‘o le ‘ā sainia ai se faigāpā’aga fou ‘i le ‘Ōfisa Fa’asalalau ‘a le Sāmoa Capital Radio ‘i Porirua, ‘o le ‘ā gālulue fa’atasi ai le Radio NZ ma le Sāmoa Capital Radio po’o le Leitiō ‘o le Si’ufofoga ‘o le Laumua ‘i le Vāiaso ‘o le Gagana Sāmoa, lea ‘e faia ‘i tausaga ta’itasi, ‘e patipatia ai le Gagana Sāmoa, ‘o le gagana ‘e lona tolu lona tautalaina ‘i totonu ‘o Niu Sila.  ‘O lo’o āloa’ia fo’i ‘i totonu ‘o lea māliliega, le fefa’asoaa’iga ‘o tala fou, fa’apea le tomai ‘i le tēkonolosi ma feso’ota’iga fa’aonapō nei, ‘i le vā ‘o fa’alāpotopotoga ‘e lua.

• ‘O le ‘ā tatala atu ‘e le Leitiō Niu Sila po’o le Radio NZ fa’amaumauga ‘o ana tala fou mai le RNZ National fa’apea le RNZ Pacific ‘i le Sāmoa Capital Radio ‘e fa’aliliu ma fa’asalalau ai ‘i le Gagana Sāmoa ‘i luga ‘o le 106.1FM ma fa’asalalauga tu’usa’o ‘o lo’o fa’aaogāina ai ‘upega ‘o feso’ota’iga.
• ‘O le ‘ā fa’asoa atu fo’i ‘e le Sāmoa Capital Radio ‘ana fa’amaumauga ‘i le Leitiō Niu Sila ma ‘o le ‘ā fesoasoani fo’i ‘i so’o se vāega ‘e mafai ai ‘e ala ‘i ata video, ata ‘e pu’eina ma nisi tala fou ‘e aoina mai Sāmoa, ‘aemaise lava ‘i Apia, lea ‘ua tatala ai le ‘ōfisa fou fa’asalalau ‘a le Sāmoa Capital Radio.
• ‘O le ‘ā sā’ili’ili atili ‘e le RNZ Pacific ma le Sāmoa Capital Radio ni avanoa ‘e fefa’asoaa’i ai tomai ‘i le tēkonolosi ma feso’ota’iga fa’aonapō nei, ‘e aofia ai le feoa’i ‘o ‘aufaigāluega ‘a itū ‘e lua.

Na fa’aalia ‘e le Pule Sili ‘o le Radio NZ Paul Thompson, lona agaga fa’agae’etia ‘e faipā’aga ai ma se fa’alāpotopotoga fa’asalalau ‘o lo’o tautuaina tagata Sāmoa ma taulāmua ‘e fa’atāolaola le Gagana Sāmoa. ‘Ua tāumau le RNZ ‘i lona tūlaga, ‘o se fa’alapotopotoga fa’asalalau ‘e lē’o fa’agāluea’ina fa’apisinisi, ‘ina ‘ia mafai ‘ona tatala atu ‘a lātou fa’amaumauga ‘i fa’alāpotopotoga ‘uma lava ‘i totonu ‘o Niu Sila.  Ma ‘o lenei faigāpā’aga ma le Sāmoa Capital Radio ‘e tāua tele ‘ona ‘e lagolago ‘iā lātou taumafaiga ‘e maua ma tu’uina atu ai se ‘au’aunaga ‘ātoatoa mai le Pasefika, ma tautuaina tagata ‘e fiafia ‘e fa’afofoga ‘i tala fou ‘i le Gagana Sāmoa po’o le Pasefika. 

Na saunoa fo’i le Pule Sili ‘o le Sāmoa Capital Radio, le Afioga ‘Afamasaga Tealu Mōresi, ‘i lona agaga fa’afetai mō lenei faigāpā’aga ma le RNZ, ‘o se fa’alāpotopotoga fa’asalalau ‘e fa’atuatuaina ‘i totonu ‘o Niu Sila.  ‘O se la’asaga telē ma le tāua tele, le gālulue fa’atasi ma le RNZ ‘i le Vāiaso ‘o le Gagana Sāmoa ‘e pātipatia le Gagana Sāmoa pei ‘ona saunoa ‘Afamasaga.  Ma ‘o tala fou a le RNZ, ‘e ‘a’ānoa ma ‘e tele fo’i tūlaga tau ‘i a’oa’oga ‘e maua ai.  ‘O le fa’aliliuga ‘o tala fou mai le Gagana Fa’aperetania ‘i le Gagana Sāmoa, ‘e fesoasoani ‘e fa’ailoa atu ai ‘i tagata Sāmoa ‘i Aotearoa Niu Sila ma fafo atu, mea ‘o lo’o tutupu ‘i lea taimi ma lea taimi ‘o lo’o fa’asalalauina ‘e le RNZ, ‘i taimi tonu ‘e tutupu ai.  ‘O le ‘ā fa’aopoopoina ai fo’i tagata fa’alogologo ‘a le Sāmoa Capital Radio, ‘e manuia mai tala fou ‘a le Leitiō Niu Sila.

Sina fa’amatalaga ‘e uiga ‘i le Sāmoa Capital Radio

‘O le Sāmoa Capital Radio, ‘o le ulua’i leitiō Pasefika na fa’avaeina ma resitala ‘i totonu ‘o Niu Sila ‘i le 1992 ma ‘o le 98 pasene ‘o ana fa’asalalauga, ‘e faia ‘i le gagana Sāmoa.  Ma ‘o lo’o fa’agāluea’ina ‘i lalo ‘o le igoa ‘o le Si’ufofoga ‘o le Laumua Trust. ‘

‘E fa’asalalau le SCR ‘i luga ‘o le ālā leo fa’asalalau ‘o le 106.1 FM, Facebook ma le YouTube, ‘e iai fo’i lana ‘upegatafā’ilagi ‘o lo’o mafai ‘ona maua ai fa’amatalaga aogā ma isi ‘upegatafā’ilagi ‘o lo’o mafai ‘ona feso’ota’i ‘i ai, ‘e fa’alauiloa ai polokalame ‘o le gagana Sāmoa ma ‘au’aunaga.

‘O le manulautī ‘a le Sāmoa Capital Radio, fa’afiafia, a’oa’o, fa’ailoa, lapata’i ma fa’aolaola tū ma aganu’u ‘a Sāmoa fa’atasi ma le soifuaga fa’aleagaga ‘e ala ‘i le fa’aaogāina ‘o lana lava gagana.  ‘E fa’atupeina se isi vāega ‘e le NZ on Air ma fa’asalalau mai Porirua ma Apia.  ‘O le 2023, na tatala ai le ‘Api ‘o le Gagana Sāmoa, ‘e maua fua ‘e aunoa ma se totogi, ‘i tēkonolosi ‘o le Android ma le iOS, ‘e lagolago ai ‘i tagata ‘o a’oa’o le gagana Sāmoa, fa’atasi ai ma le lagolago ‘a le Matāgāluega ‘o Ā’oga.

Sa gālulue fa’atasi le RNZ ma le Sāmoa Capital Radio ‘i se taimi ‘ua tuana’i, ‘i le polokalame ‘o le Sa’ili Mālō – Seeking a Better Life, ‘o se polokalame fa’asolo, ‘o fa’atalanoaga ‘e ono ‘i le gagana Sāmoa, sa fa’amatala ai soifuaga ‘o ē na muamua mai ‘i Niu Sila.

Sina fa’amatalaga ‘e uiga ‘i le RNZ

‘O le RNZ, ‘e lē fa’agaluea’ina fa’apisinisi, ma ‘o se fa’alāpotopotoga tūto’atasi ‘a le atunu’u mō fa’asalalauga, ma ‘o se mitamitaga, ‘ona ‘ua lata ‘i le 100 tausaga ‘o fa’aauau ai pea.

‘E malaulau itū’āiga ‘o fa’amatalaga ‘ese’ese ‘e momoli atu ‘e le RNZ, ‘o lo’o fa’aata mai ai le aganu’u, ‘o aga feso’ota’i ma le tasi felanulanua’i ‘o Niu Sila.  ‘O lana tautua, ‘e mō gāluega fa’atusitala ‘e maualuga lava lona fa’atinoga, ‘e tatala atu le avanoa mo ni fa’atalanoaga fa’alaua’itele ma ni soālaupulega ‘o au’ili’ili ai matā’upu ‘e aogā ‘i tagata Niu Sila.

‘O le taimi nei, ‘e silia ma le 60 faigāpā’aga ‘a le RNZ ‘e fefa’asoaa’i ai fa’amatalaga ma gālulue fa’atasi ai ma isi.  ‘O lona uiga, ‘o fa’amatalaga ma tusitusiga ‘a le RNZ, ‘o lo’o avanoa mō le tele ‘o ala ‘o fa’asalalauga ‘i luga ‘o ‘upega tafā’ilagi, ‘o lōmiga, leitiō ma ‘au’aunaga ‘o televise ‘i Niu Sila fa’apea ai ma le lautele ‘o le Pasefika.  ‘E fa’aleleia ai avanoa ‘e mafai ‘ona maua ai nei fa’amatalaga ‘a le RNZ mō Niu Sila ma tagata fa’alogologo mai atunu’u ‘i fafo ma mafai ‘ona tu’uina atu ai ni fa’amatalaga tāua ma tūlaga ‘ese mō isi ‘au’aunaga fa’asalalau.

‘O lo’o aofia ai le Pacific Media Network, Tikilounge Productions, Tagata Pasifika, Sāmoa Capital Radio, Radio Sāmoa ma Kaniva Tonga, ‘i nei faigāpā’aga ma gāluega so’oso’o tau’au ‘i totonu lava ‘o Niu Sila.

Link to RNZ’s Media Release (English): https://www.rnz.co.nz/media/220