‘E to’avalu tama’ita’i Sāmoa ‘o le ‘a sā’ilia mai ai se tausala ‘a lō tātou atunu’u ‘i lenei tausaga. Mai le to’avalu, ‘o le to’alua ‘o ‘i lātou ia, ‘o alo ‘a Sāmoa mai atunu’u ‘i fafo, ‘a’o leisi to’aono ‘e aumau lava ‘i totonu ‘o lō tātou atunu’u, ma ‘o lo’o lagolagoina fo’i ‘e kamupanī ‘i totonu ‘o Sāmoa.

‘Ua fa’a’autūina le fa’amoemoe lenei ‘o le tauvaga ‘a tausala ‘e taualuga ‘iai polokalame ‘o le vaiaso ‘o Measina, “UA TĀLĀ MEASINA: ‘E mamae le tava’e ‘i ona fulu”.

‘O le tausaga lenei, ‘e ‘ātoa ‘iai le 40 tausaga talu ‘ona fa’avae mai le tauvaga ‘o tausala ‘i lō tātou atunu’u, ‘ae ‘ua fa’amauina ai fo’i ‘o le ulua’i tausaga lenei ‘ua suia ai le igoa ‘o lenei vaiaso fa’apitoa mai le Teuila, ‘i le vaiaso ‘o Aganu’u ma Measina ‘a Sāmoa.

IMAGE/ATA: Samoa Tourism Authority & Pasifika: Crowns & Sashes Facebook (adapted by Nessani Lam Sam / SCR)

‘E lua ni mū mai le motu tele ‘i Salāfai lea ‘ua rīpotia ‘i se pepa ‘o fa’amatalaga mai Pūlega ‘a le Tinei Mū ‘a le atunu’u. ‘O nofoaga ‘e lua ‘i le vaomatua ‘i le āfio’aga ‘o Samalae’ulu na sosolo ai le mū, ma na toe vala’au ‘uma ai le ‘aufaigaluega ‘a le tinei mū ‘ua mānava, ‘i le fesoasoani lea ‘i le tau tineia ‘o le sosolo ‘o le afi. ‘E le gata ‘i lea, na fa’apēnā fo’i ‘i ali’i ma faipule, ma le mālosi ‘o le nu’u ‘o le āfio’aga ‘o Samalae’ulu, na tutū fa’atasi ma galulue ‘e tineia le afi.

Mulimuli ane, na toe maua leisi vala’au mai le āfio’aga ‘o Faleālupo, ‘ua sosolo ai fo’i leisi afi ‘ona ‘o le tūlaga mātūtū ma le mago ‘o le mutia ma lā’au mai le vaitau lenei ‘o le El Niño. Fa’ailoa ‘e le ‘Ōfisa Sili ‘o le Pūlega ‘o le Tinei Mū ‘iā Tanuvasa Pētone Mauga, na mafai ‘ona tali vave atu ‘ia le ‘aufaigaluega ‘a le ‘ōfisa ‘autū ‘i Apia, ma ‘auina atu ai le to’a 12 ‘o le ‘aufaigaluega sīnia, ‘o sē tasi ‘o loli vai ma le tasi ‘o ta’avale fuimū ‘e fesoasoani ‘i le fa’afītāuli na tūla’i mai.

Na fesoasoani le Atua ma mafai ‘ona tineia ‘āto’atoa le afi ‘i ia vāega ‘e lua ‘o le motu tele ‘i Salāfai, mai le fesoasoani lea ‘o le savili ma le mago ‘o le mutia na vave ai ‘ona sosolo le afi ‘i le taimi na tupu ai. Na momoli fo’i le agaga fa’afetai ‘o Tanuvasa ‘i ali’i ma faipule ‘o le āfio’aga ‘o Faleālupo, na fesoasoani tele ‘i le galuega fītā ‘a le ‘aufaigaluega. ‘Ua toe fautua mālosi mai ai le pūlega ‘i le mamalu ‘o le atunu’u, ‘ina ‘ia tāofi lāpisi susunu ma tafuna’i, ma ‘ia māta’itūina so’o se ‘auala ma so’o se vāega, ‘e ono tūla’i mai ai se mū ‘e fa’aleagaina ai meatōtino tāua ‘aemaise fo’i ‘o se soifua.

IMAGE/ATA: Samoa Fire and Emergency Services Authority Facebook

‘O se tasi ‘o tofiga fa’alefa’avae, ‘ua fa’atautōina ‘i le ulua’i usuia ‘o le Palemene ‘i le vaiaso nei, lea ‘ua tōfia ai le Afioga Fa’amoetauloa Fa’asavalu Ah Siu Lin ‘e ‘avea ma su’etusi sili ‘a le mālō. ‘O se tōfiga ‘o lo’o i lalo ‘o le fa’avae ‘o le matā’upu 97 (1) ma le (2), ‘o le fa’avae ‘o le mālō tūto’atasi ‘o Sāmoa 1960, na fautuaina ‘e le Afioga ‘i le Palemia le Afioga ‘i le Ao Mamalu ‘o le mālō ‘o Sāmoa, mo le fa’amaonia lea ‘o le tōfia āloa’ia ‘o le Afioga ‘iā Fa’amoetauloa, na te tau’aveina lea tōfiga fou.

‘O se tamāli’i ‘ua loa tausaga ‘o tautua ‘i le mālō, ma ‘e lata atu ‘i le 20 tausaga ‘o lana tautua ‘i le ‘Ōfisa ‘o le Pule ma Su’etusi Sili ‘a le mālō ‘o Sāmoa, ma ‘ua tele fo’i tausaga ‘o fa’auluulu ‘iai nisi ‘o vāega ‘o lenei lava ‘ōfisa. ‘O lo’o ia ‘ūmia le tele ‘o fa’ailoga ma tusipasi taualoa, ‘e aofia ai le Tikerī Fa’alōia, fa’apea fo’i le Tikerī Fa’apisinisi ‘e fīto’itonu ‘i le fa’atausi tusi ma le tamao’āiga mai le Iunivesitē ‘o le Pasefika ‘i Saute. ‘O ia fo’i ‘o se tausi tusi āloa’ia ma le sui fo’i ‘o le Fa’alāpotopotoga ‘a Su’etusi ‘o tausi tusi ‘a le atunu’u.

Na fofogaina le malelega fa’amanuia mai i le Afioga ‘i le Ao mamalu ‘a le mālō, ‘i le filifilia ai ‘o lenei fo’i tamāli’i ‘a le atunu’u mo le tau’aveina ‘o lea tōfiga maualuga ‘a le mālō, fa’apea fo’i le saunoaga fa’amanuia mai le Afioga ‘i le Ta’ita’i ‘o le atunu’u, La’auli’alemālietoa Polata’ivao Fosi Schmidt.

IMAGE/ATA: Government of Samoa

‘Ua fa’ailoa manino mai ‘i le pepa ‘o fa’amatalaga mai le ‘Ōfisa ‘o le Kapeneta ma le Palemia, le fa’ailoa lea ‘e le International Monetary Fund (IMF) le iai pea ‘o le avanoa tau tupe ‘a le mālō, ‘e mafai ‘ona tu’uina atu ‘i ni fesoasoani fa’apitoa mo se vāega taimi talafeagai mo ‘āiga, ‘ātoa ai ma tagata ‘e sili ‘ona mana’omia le fesoasoani.

‘O lo’o fa’aauau pea ‘ona fa’amuamua ‘e le mālō le manuia ‘o tagata Sāmoa ‘i ana ‘anavatau ‘ua folasia, ‘āmata mai ‘i le aso 1 Iūlai 2026, ‘ua si’itia ai le penefiti mo tagata mātutua ‘e aulia le 70 tausaga ma luga atu, mai le $300 sa iai muamua ‘i le $500 ‘i le māsina mo le silia ‘i le 7,000 ‘o ia tagata mātutua. ‘Ua fa’amālosia fo’i ‘e le mālō le fesoasoani mo tagata ‘o lo’o iai a’afiaga tūmau ‘o le soifua, ma ‘ua si’itia ai fo’i la lātou penefiti ‘i le $300 ‘i le māsina.

‘Ātoa ai ma le fa’aagaga ‘a le mālō ‘o le $20 miliona mo se tasi ‘o polokalame lea ‘ua fuafuaina mo le soifua manuia ‘o fānau, le Child Wellbeing Benefit, ‘e fa’amatu’u atu ai le ulua’i $200 ‘i le taimi ‘e fānau mai ai se tagata fou, ma fa’aauau ai le $100 ‘i māsina ta’itasi mo le ulua’i 35 māsina muamua ‘o le soifuaga ‘o lea tamaitiiti. Ma ‘ua fuafua ‘e fa’ato’ā ‘āmata ‘ona totogi atu ia fa’amanuiaga ‘iā Ianuari 2027.

IMAGE/ATA: Nessani Lam Sam

‘Ua taulimaina ‘i le taeao nei se pepa ‘o fa’amatalaga mai le ‘Ōfisa ‘o le Kapeneta ma le Palemia, ‘e tali ma fa’amanino ai nisi ‘o tu’ua’iga ‘ua ūpea ‘i luga ‘o ‘upega tafa’ilagi, ‘ua ātagia ai se gaioiga ‘ua lē āmiotonu ma lē manino, ‘i le fa’aaogāina ‘a tupe ‘o ātīna’e ‘a nisi ‘o itūmālō. Mai le pepa ‘o fa’amatalaga, ‘o le fe’au mai le mālō, ‘e tatau ‘ona fa’amaonia lelei le fa’aaogāina ‘o tupe ‘a le atunu’u, ma ‘e tatau fo’i ‘ona tali atu ‘i lātou ‘ua tu’uina atu ‘iai le tiute ‘o le fa’afoeina ‘o le fa’aaogāina ‘o tupe ‘a le atunu’u.

Peita’i, ‘āfai ‘ae faia ni tu’ua’iga ‘o faiga pi’opi’o, ‘e tatau ‘ia ‘i lātou na faia ia tu’ua’iga, ‘ona ‘aumaia fa’amaoniga ‘e lagolago ai ia tu’ua’iga. Ma ‘o lo’o fa’aauau pea le fa’amālosia ‘e le mālō ‘o le manino ‘o le tali atu ‘o le pūlega lelei, ‘i le polokalame ‘a ātīna’e ‘a itūmālō, ma fa’amautinoa ‘o tupe ‘o lo’o fa’aagaga mo lenei polōketi, ‘e o’o atu ‘i ‘a’ao ‘o fānau, ‘o tagata mātutua, ‘o tagata ‘e iai a’afiaga tūmau ‘o le soifua, ‘o ‘āiga, ‘o āfio’aga ma nu’u sa fuafua ‘iai ia fesoasoani.

‘O le vaiaso ‘ua mavae na fa’ailoa ai ‘e se tasi ‘o nusipepa ‘i le atunu’u le Sāmoa Observer, le tala auaua’i ‘i tua ‘e le Afioga ‘iā Seve Te’i Fuimaono, ‘o lē sa ‘avea ma faipule ‘o le itūmālō ‘o Sāfata 1, ‘o ni sēleni mai teugātupe ‘o polōketi ‘a le itūmālō, ‘ae ‘ua māe’a ‘ona fa’atautōina le sui faipule fou na manumālō mai ‘i le la faigā pālota la’iitiiti. ‘O le tu’ufa’atasiga ‘o ia sēleni na fa’ailoa ‘i nei fa’asalalauga, ‘e o’o atu ‘i le $750,000.

Peita’i ‘ua tē’ena ‘e le mālō, ‘e ala ‘i le pepa ‘o fa’amatalaga ia fa’asalalauga, ‘e fa’apea sa iai se iloiloga lata mai ‘a le International Monetary Fund (IMF) ‘e fa’atatau ‘i le matā’upu, ma maua ai ni faiga pi’opi’o ‘i le fa’aaogāina ‘o ia sēleni, ma ‘e le’i iai se fa’ai’uga na faia ‘iai ‘e le IMF.

Pau matā’upu na fa’ailoa ‘e le IMF, ‘e aofia ai le ‘āto’ato’a ‘o le fa’atinoina ‘o nisi ‘o tupe fa’aagaga mo ātīna’e, ma sa fautuaina ai le fa’aleleia ātili ‘o tūlaga ‘i le iloiloga ‘o galuega fa’atino, faiga ‘o fa’atauga ma konokarate, le māta’itūina ‘o le manino ma le tali atu ‘i le fa’aaogāina ‘o ia tupe.

IMAGE/ATA: Government of Samoa

‘Ua taofia nei ‘i le va’ava’aiga ‘a leoleo ‘ia le tamā ‘e 59 tausaga le matua ‘iā Joe Hunt, ‘o le ‘avepasi ‘a le Queen Poto, ma ‘ua mōlia ‘i le mōliaga ‘o le ‘ave ta’avale fa’atamala, ‘ua āfua ai ‘ona maliu se atali’i ‘e 7 tausaga le matua, ‘i le taeao ‘o le Aso Tofi ‘o le vaiaso ‘ua mavae.

Sa tā’ua ‘i ni fa’amatalaga, le pa’ū mai fafo ‘o le pasi mai Faleāsi’u ‘o le atali’i, ma oso ai pa’u pito ‘i tua ‘o le pasi, ma ‘e tūgā tele manu’aga na maliu ai ‘o ia. ‘O lo’o tālia le tu’ufa’atasia ‘o rīpoti ma fa’amatalaga mai le Matāgaluega ‘o Leoleo ‘i le fa’alavelave na tūla’i mai.

‘O se tasi nei ‘o fa’alavelave ‘ua toe fa’amanatu mai ai le tele ‘o nisi maliu na tūla’i mai fo’i fa’apēnei ‘i le tele ‘o fānau, ‘ina ‘ua fa’amuamua ‘e mātua fānau ‘e fa’aoso ‘i lalo ma le pasi, ‘ae mulimuli atu le tamā po’o le tinā ‘i le totogiina ‘o le pāsese ‘i le ‘avepasi. ‘Ona tāmomo’e lea ‘o le fānau ‘i luma atu ‘o le pasi, ma lāvevea ai ‘i ta’avale ‘o lo’o āga’i atu ‘i le pito ‘i tua, ‘ina ‘ua kolosi fa’afuase’i ane fānau ‘i luma ‘o le afi ‘o le pasi.

‘O se fa’alavelave fo’i ‘ua toe fa’amanatu ai ‘i le atunu’u le lata mai ‘o le aso fa’apitoa mo le fānau ‘iā ‘Oketopa, ‘o lo’o maitauina fo’i ‘e le’o ‘asa ma ni maliu ‘o alo ma fānau ‘o lo’o tūla’i mai ai, ‘ina ‘ia ‘ave le fa’amuamua ma le fa’amamafa ‘a mātua, ‘i le māta’itūina ‘o le saogalēmū ‘o fānau.

IMAGE/ATA: Murray Faivalu

‘Ua māe’a se fonotaga 3 aso sa fa’atautaia ‘i Funafuti ‘i Tūvalu, sa fa’atasi atu ai sui ‘ese’ese mai atunu’u ‘o le pasefika, ‘ae ta’ita’ifono ma lāuga ‘a’ami ai ‘ia le alo ‘o Sāmoa, le susuga ‘iā Gene Kaleuati, ‘o le Sui ‘Ōfisa Sili lea ‘o le fausiaina ‘o tūlāfono ‘a le Matāgaluega ‘o Feso’ota’iga ma Fa’atekonolosi.

‘O se tūlaga ‘ua atagia ai le āmana’ia ‘o tomai ma agava’a ‘ua ‘i alo ma fānau ‘a Sāmoa, ‘ua mo’omia ‘e atunu’u ‘o le pasefika ‘e fa’asoaina atu le fa’amālosia ma puipuia ai ‘o feso’ota’iga fa’avā‘omālō ‘i ‘auala fa’atekonolosi fa’aonapōnei.

IMAGE/ATA: Ministry of Communications & Information Technology Samoa Facebook

‘Ua fa’asalalau fa’alauia’itele nei ‘i se pepa ‘o fa’amatalaga tauala mai ‘i le Matāgaluega ‘o Ā’oga ma Aganu’u, ‘ua fa’ase’e atu ai ta’amilosaga lakapī ‘a ā’oga ‘i lalo ‘o le Iuni Lakapī fou ‘a Sāmoa. ‘Ua fa’ailoa ‘e lea pepa ‘o fa’amatalaga ‘o polokalame ‘uma ‘a ā’oga tūlaga lua ma kolisi, ‘o le ‘a fa’atautaia ‘uma ‘e le matāgaluega. ‘O se vāega ‘o le ‘au’aunaga ‘a le matāgaluega, ma ‘o le ‘a fa’amauina āloa’ia nei ‘i lalo ‘o le iuni lakapī ‘a Sāmoa le SRFU, lea fa’ato’ā fa’avaeina ‘i le vaiaso talu ai.

‘Ua māta’itūina nei ‘e le matāgaluega le faigā pā’aga vāvālalata ‘a le iuni lakapī ‘a Sāmoa fa’apea ai ma pā’aga ‘uma ‘o lo’o a’afia, ‘ina ‘ia mautinoa le so’otaga lelei ‘o le fa’atinoina ‘o lea suiga, mo le manuia ‘o fānau ā’oga, ‘o ā’oga ma le lumana’i manuia ‘o le lakapī ‘i totonu ‘o le atunu’u.

IMAGE/ATA: Nessani Lam Sam

‘O le si’itaga fou mo pāsese ‘o pasi ma taxis lea ‘ua fa’alauiloa talu mai le tausaga 2014, fa’ato’ā manino ai, ‘ua leva ‘ona si’itia ‘e ‘ave ta’avale ‘o taxi la’u pāsese lāiti le tau ‘o pāsese āga’i ‘i tagata femālagaa’i. ‘I le lisi talu ai, sa $3.30 femālagaa’iga ‘i totonu ‘o le taulaga, ‘ae ‘ua fai si leva ‘ona ti’eti’e le mamalu ‘o le atunu’u ‘i le $5.

Peita’i, ‘e ui ‘i le si’itaga ‘e 30% ‘ua faia nei ma āloa’ia ‘e le mālō, na fa’aalia ai le fa’anoanoaga ‘i nisi ‘o ‘ave ta’avale lāiti, ‘e le’o lava le si’itaga lea mo ‘i lātou, pe ‘a fua atu ‘i le si’itaga ‘o le suāu’u. ‘E lē gata ‘i lea, ‘o lo’o āga’i lava ‘i luga le tau ‘o pa’u fa’apēnā fo’i tōtōga ‘o ta’avale afi, ma tau ‘a ‘inisinia ‘e faia ai se mea ‘ua fa’alētonu, ma ‘o nisi nei ‘o mafua’aga na o lātou talosagaina ai le si’itaga ‘e 50%.

Fa’ailoa ‘e se tasi ‘o ‘ave ta’avale ‘o se ta’avale la’iitiiti, na ia fa’afetaia ai le to’atele ‘o le mamalu ‘o le atunu’u ti’eti’e, ‘e fa’aalia lo lātou agalelei ‘i le fōa’ia lea ‘o sui ‘o pāsese ‘i taimi ‘e fa’aaogāina ai la lātou ‘au’aunaga.

IMAGE/ATA: Nessani Lam Sam

Sa fa’amauina ‘i le fa’ai’uga ‘o le vaiaso, ‘e 2 ni maliu ‘ua rīpotia ‘e le Matāgaluega ‘o Leoleo ‘ua āga’i nei ‘iai su’esu’ega. ‘O le ta’amilosaga lakapī sa fa’atautaia nei ‘i le aso To’ona’i na maliu mai ai sē tasi ‘o tama ta’alo, ‘o se sui fo’i ‘o le ‘asosi ‘o laufalī ‘a le atunu’u ‘i tūlaga ‘o ta’aloga lakapī. ‘O fa’amatalaga na tu’uina mai ‘e nisi sā maimoaina lea ta’aloga ‘i le aso To’ona’i, na fa’ao’olima ‘iai nisi ma maliu ai lava ‘i le malae ‘o le kalapu ‘a Vaiala.

‘Ua vala’au le Matāgaluega ‘o Leoleo ‘i le mamalu ‘o le atunu’u ‘ia ‘i lātou sā maimoaina lea ta’aloga, pe ‘āfai ‘o iai ni ata na o lātou pu’eina ‘i le taimi na tūla’i mai ai le fa’alavelave, ‘ina ‘ia tu’u ane ‘i le Matāgaluega ‘o Leoleo ‘e fesoasoani ‘i su’esu’ega ‘o lo’o fa’agāsolo ‘i lea matā’upu.

‘A’o le taeao lava ‘o le aso Sā le aso ananafi, na fa’ao’o ane ai ‘i le ‘ōfisa ‘o le Matāgaluega ‘o Leoleo, le maliu ‘o se talavou ‘e 20 tausaga le matua, ‘o lo’o masalomia ai le fa’aaogāina ‘e se tamā 66 tausaga le matua, ‘o se lā’au mālosi na āfua ai ‘ona maliu lea talavou. ‘O lo’o fa’amanu’alia lēisi talavou 21 tausaga, ma ‘o lo’o taofia nei ‘i le maota gasegase ‘i Moto’otua ‘e taumafai ‘iai togafitiga. Ma ‘ua i lalo nei ‘o le va’ava’aiga ‘a le Matāgaluega ‘o Leoleo le tamā 66 tausaga le matua, ‘ātoa ai ma lō lātou taofia ‘o le lā’au mālosi ‘e le’i resitalaina fo’i.

‘O lo’o fa’aauau pea su’esu’ega ‘i lea fo’i matā’upu, ‘i le māfua’aga na tūla’i mai ai lea fa’alavelave. ‘Ua talosaga atu ai le Matāgaluega ‘o Leoleo ‘i le mamalu ‘o le atunu’u ‘aemaise le nofoaga na tūla’i mai ai le fa’alavelave, ‘ina ‘ia fa’afeso’ota’i ane le Matāgaluega ‘o Leoleo ma tu’uina ane fa’amatalaga ‘e fesoasoani ‘i su’esu’ega ‘a le matāgaluega.

‘O ni ātugaluga fo’i lea ‘a le Matāgaluega ‘o Leoleo ‘i lenei vaiaso āga’i atu ‘i le fa’ai’uga ‘o le vaiaso ‘i le fa’amanatuina ‘o le aso fa’apitoa ‘o tamā, ‘ona ‘o le so’ona taumafa ‘o le ‘ava mālosi, ‘ae pe ‘āfai fo’i ‘ua fa’aopoopo atu ma le fa’aaogāina ‘o fuālā’au fa’asāina, ‘o lona uiga, ‘e ono toe tūla’i mai fo’i nisi fa’alavelave fa’apēnei, ‘ua sili ‘ona lē mana’omia ‘e le tātou atunu’u, ‘ae fa’apēnā ‘i totonu ‘o ‘āiga.

IMAGE/ATA: Murray Faivalu