‘Ua fa’ailoa se tasi ‘o fa’ai’uga ‘a le kapeneta ‘i lana fonotaga ‘o le Aso Lulu ‘o lenei vaiaso, ma ‘ua toe tōfia ai le tinā Polōfesa ‘iā Tuifuisa’a Patila Amosa ‘e fa’aauauina pea mō le isi 3 tausaga ‘i le tōfiga ‘o le ‘Ōfisa Sili ‘o le Pūlega ‘o le Iunivesitē Āoao ‘o Sāmoa.

‘O le Afioga ‘iā Tuifuisa’a ‘o se tamāli’i ‘e lē toe tau fa’ailoa lona tūlaga tautua ‘i le atunu’u ‘e ala ‘i le tūlaga tau a’oā’ga, mā ‘o se ulua’i tama’ita’i ‘ua tōfia ‘i le tōfiga lea na ‘amata mai ‘i le 2023.

Talu mai ‘ona fa’avaeina le iunivesitē ‘i le tausaga 1984, sā fa’auluulu lava ‘e le itūpā ‘o tamā ma ali’i.

‘O Polōfesa Tuifuisa’a, ‘ua loa lana tautua ‘i le iunivesitē, mā ‘e tele fo’i ona tomai ma agava’a fa’apitoa ‘auā le feagai ai ma lea fo’i matāfaioi tāua.

ATA: Government of Samoa / Facebook.

‘Ua fa’amaonia mai ‘e le afioga ‘i le ta’ita’i ‘o le atunu’u le Afioga ‘i le Palemia, ‘ua māe’a o’o atu le Afioga ‘i le Faipule ‘iā Tai’oali’iseu Taimalelagi Saunia Fiti ma lona Faletua ‘e fa’ao’o atu lona finagalo, ‘o ia ‘o le ‘a fa’amāvae ‘ese mai le vāegafa’a’upufai ‘a le H.R.P.P, ma ‘ua iai lana filifilga ‘e fa’ase’e ane ‘i le lalo ‘o le tagāvai ‘o le vāegafa’a’upufai ‘o lo’o ta’ita’ia le atunu’u, le Fa’atuatua ‘i le Atua Sāmoa ‘ua Tasi (F.A.S.T) ‘e sui mai ai lona itūmālō ‘o Vaimauga 3.

Na saunoa le Afioga ‘i le Palemia, le Susuga ‘i le La’auli’alemalietoa “ ‘e lē nātia na taumafai mai lava lona fa’amoemoe ia te a’u, māsina talu ai, toeititi ā lua māsina. Pau lava la’u ‘upu na fai iai, alu ‘e tatalo, ma ‘e māfaufau lelei ‘i lau fa’ai’uga lea ‘o le ‘a fai. ‘Ou te lē tauānauina ‘oe, le aga ‘o le fa’ai’uga ‘e a’afia ai ‘oe, ma lou ‘aiga, si ou faletua ma le itūmālō. ‘Ae alu ‘e te toe fesili ‘i lou itūmālō, ‘o le ā lava le tonu ‘e ‘aumai, ‘ona ‘e toe sau lea ta te toe talanoa. ‘Ae ‘ia ‘e manatua ‘aulape ‘o le tūlāfono, pe ‘afai ‘o lou lava finagalo lea.”

Peita’i na saunoa le Afioga ‘i le Palemia, na fa’ailoa atu ‘iā te ia se fe’au tusitusia ‘i le fonotaga ‘a le Kapeneta na usuia ‘i lenei vaiaso, ‘ua fa’atino le fa’amāvaega ‘a le Sui Faipule mai lana vāegafa’a’upufai na manumālō mai ai ‘i le faigāpālota tele ‘a le atunu’u, mā ‘ua mautinoa ai ‘o le fono usu ‘a le Palemene ‘o le ‘a soso’o ai nei,  ‘o le ‘a fa’afeiloa’i ai Sui Faipule fou na manumālō mai ‘i pālota lāiti, ‘a Vaisigano 2 ma Safata 1, ‘ae ‘o le ‘a fa’alauīloa ai fo’i ma le fa’amāvaega aloā’ia ‘a le Sui Faipule ‘o Vaimauga 3, ma toe sāuni ai lea itūmālō mō le lātou faigāpālota la’ititi.

ATA: Taioaliiseu Taimalelagi Saunia Fiti / Facebook.

‘O le lē lava ‘o fuāla’au ma vailā’au mo’omia mō togafitiga ‘o gasegase ‘i so’o se maota gasegase fa’aitūmālō ‘e o’o ‘i maota gasegase ‘i Tuasivi ma Moto’otua, ‘o le gaiōiga muamua lava lea ‘a le Minisita fou ‘o le Matāgaluega ‘o Falema’i le Tōfā Hon. Va’aaoao Salumalo Alofipo.

‘E le’i ‘alo le saunoaga ‘a le Minisita ‘ina ‘ua saunoa ‘o le ripoti ‘e tasi ‘e fa’ao’o atu ia te ia, ‘i le ‘uti’uti ‘o fuāla’au ma vailā’au ‘e maua ‘e maota gasegase ‘uma ‘i le atunu’u.

ATA: Ministry of Health Sāmoa / Video: Murray Faivalu, SCR

‘Ua tāpā ‘e le Sōsaiete ‘a Lōia ‘a Sāmoa se finagalo ‘a le Afioga ‘i le Palemia Hon. La’aulialemalietoa Polata’ivao Fosi Schmidt, ‘ina ‘ia silasila ‘i faigafa’avae ‘e tūto’atasi ai le fa’atinoga ‘o su’esu’ega ‘a le fa’amasinoga ‘i nisi ‘o matā’upu ‘o lo’o tu’uā’ia ai lana Afioga.

‘Ae ‘i se feiloā’iga ‘a le Palemia ma tusitala ‘ua mavae, na tali ai le Afioga ‘i le Palemia ‘ua ta’atia atu le matā’upu ‘i le Fa’amasinoga Fa’aitūmālō ‘e fa’agaioi latou su’esu’ega.

ATA: SCR (file) / Video: Murray Faivalu, SCR

‘Ua fa’aalia manino se folasaga ‘a le Ta’ita’i ‘o le Itū Agai Hon. Tuilaepa Dr. Sa’ilele Malielegaoi ‘i le feiloa’iga ma se vaega ‘o le ‘autusitala, ‘o lana toe paeā’iga lenei ‘i le ‘avea ai ‘o ia ‘o se Sui Faipule ‘o lona itūmālō ‘o Lepā.

‘O le tausaga lenei 2025, ‘e ‘atoa ai le 44 tausaga ‘o ‘avea lenei tamāli’i ‘o le atunu’u ma Sui Faipule ‘o lona itūmālō. ‘Ae ‘o se ta’ita’i fo’i po’o se Palemia ‘e lē toe taufa’amatalaina lona tala’aga, a’o tūla’i e ‘avea ma Ta’ita’i ‘o le Atunu’u mō le 22 tausaga.

ATA: PMN / Video: Murray Faivalu, SCR

‘Ua fa’amaonia mai ‘e le afioga ‘i le Minisita ‘o le Matāgaluega ‘o Tinā ma Tama’ita’i Lagaa’ia Ti’aitua’u Tufuga, ‘o lo’o fa’agāsolo su’esu’ega ‘a malu ‘o le mālō ‘e sā’ilia ai le tagata na ulufale fa’asolitūlāfono ‘i le ‘ōfisa ‘o le matāgaluega, ma tō’esea fa’agaoi le laptop ma le hard drive ‘o lo’o ‘i ai fa’amaumauga ‘ātoa ‘o le polōketi miliona talā mai lava ‘i lona ‘amataga, ‘e ‘ese mai ‘i faila ‘o fa’amaumauga ‘o le polōketi, ‘e fa’asesē atu ia ‘e fa’aauau le gāluega, ‘ua leai ‘uma mai lona ‘ōfisa.

‘O le vāega muamua ‘o su’esu’ega ‘a leoleo ‘ua maua ai, ‘e lē ‘o ni taimi faigāluega lea na tō’esea ai, ‘ona ‘o le fa’ai’uga ‘o le vaiaso na fa’atino ai le gaiōiga, pei ‘ona fa’amaonia mai ‘e le afioga ‘iā Lagaai’a. ‘E lē ‘o mafai fo’i ‘ona tali mai le afioga ‘i le tama’ita’i faipule Mulipola Anarosa Molio’o ‘i le ‘au tusitala ‘i lea matā’upu, ‘ona ‘o ia sā gafa ma le polōketi mai ‘i le ‘amataga.

ATA: MWCSD

‘O lea ‘ua sāvalia atu ‘i le 2 māsina ‘e le’i maua lava le ali’i ‘iā Lauititi Tualima talu ‘ona sola ‘ese mai ‘i le falepuipui ‘i Tamumalala. Fa’amaonia mai ‘e le Sui Komesina ‘o Leoleo Leiataua Samuelu Afamasaga, ‘o lo’o ‘ua gafa nei ma se vāega fa’apitoa ‘o leoleo ‘ua tōfia, ‘e sā’ilia Lauititi.

Saunoa Leiataua, ‘o lo’o laumanu’ia solo mai ‘i tua ane ‘o afio’aga ‘o Faleatui ma Satapuala lea ali’i, ma ‘ua talosagaina ai fo’i ‘e le matāagaluega le pule māmalu ‘a ali’i ma matai ‘o ia afio’aga, ‘ina ‘ia fesoasoani mai ‘i le latou galuega.

Pei ‘ona silafia, ‘ua ofo atu ‘e le matāgaluega se taui tau sēleni mō so’o se tasi na te fa’ailoa mai ‘i le matāgaluega, se nofoāga ‘o lo’o lafi ai Lauititi.

ATA: Samoa Police, Prisons & Corrections Services.

‘O lo’o taumafai le afioga ‘i le minisitā ‘o le Matāgāluega ‘o Tinā ma Tama’ita’i, Ātīna’e ‘o afio’aga ma aga feso’ota’i, Lagaaia Tiaituau Tufuga, ‘e fa’anatinati le tufatufaina atu ‘o sēleni ‘o le polōketi miliona tālā ‘a itūmālō pei ‘ona fa’aauau ai ‘i lenei vāiaso.

‘E 3 itūmālō ‘ua saini le feagaiga ma le komiti fa’afoe ‘e fa’amatu’u ai le $160,000 po’o le 16 pasene ‘o le miliona tālā lona 3.  ‘Ua māe’a pāsia fo’i ‘e le Komiti Fa’apitoa ia Ta’iala ‘o Ātīna’e ‘a le Itūmālō mō le fa’amatu’uina atu vaegā tupe $540,000.00 mō le fa’atinoina ‘o polōketi ‘o ātina’e ma fa’amuamua ‘a Itūmālō.  ‘E tusa lea ma le 70% po’o le $700,000.00 vaegā tupe ‘ātoa (1st Tranche) ‘o le ‘ā fa’amatu’uina ‘i le vāega muamua ‘ua aofia ai ma le vaegā tupe mō le fa’agaioiina ‘o le ‘Ōfisa Fono Fa’avae.

‘I le māe’a ai ‘o le fa’aaogāina ‘o vaega tupe muamua ($540,000), ‘ona tu’uina mai lea ‘e Fono Fa’avae Itūmālō ia rīpoti ‘o le fa’aaogāina ‘o nei vaega tupe (acquittal report 1st tranche) mō le fa’amaoniga ‘a le Kōmiti Fa’afoe ‘o Ātīna’e Itūmālō. ‘Ona fa’amatu’uina ai lea ‘o vaegā tupe lona lua ($300,000) ‘e ‘ātoa ai le 1 Miliona Tālā ‘e fa’amāe’a ai ātīna’e ‘a Itūmālō.

‘O le māe’a ai ‘o le fa’aaogāina ‘o vaegā tupe ‘ātoa 1Miliona Tālā, ‘ona tu’uina mai lea ‘e Fono Fa’avae Itūmālō ‘ia le rīpoti ‘a le su’etusi (Audit Report) mō le fa’amaoniga ‘a le Komiti Fa’apitoa ‘o Ātīna’e Itūmālō, ma agava’a ai loa Itūmālō ‘e saini isi maliega tau tupe (Funding Agreement FY2025-2026) ‘o vāega mulimuli ‘e ‘ātoa ‘i ai le $5Miliona ‘o lenei paea’iga.

‘Ua fitu(7) Itūmālō ‘ua māe’a sainia maliega tau tupe mō le Miliona Lona Tolu (TF2024-2025) mō le fa’amatu’uina atu ‘o le $700,000 mō le fa’atinoina ‘o fa’amuamua ‘i ātīna’e ‘a Itūmālō.  ‘O afioga ‘i Ta’ita’ifono, Sui Ta’ita’ifono ma Failautusi ‘o le Komiti ‘o Fono Fa’avae, sā fai ma sui ‘o Komiti ‘o Fono Fa’avae itūmālō ‘i lenei sainigālima.

ATA: MWCSD

‘E $500.000.00 se vaegā tupe ‘ua fa’amatu’u atu ‘e le mālō ‘i lalo ‘o ana polokalame fesoasoani ‘iā ‘i lātou ‘e vaivai le tamao’āiga ‘o le atunu’u, ‘e fa’aaogāina ai le ‘au’aunaga ‘a le fa’alāpotopotoga ‘a le ADRA Sāmoa ‘a le ‘Ekālēsia Aso Fitu ‘o le Toe Afio Mai.

‘O le fesoasoani ‘o lo’o tauala mai ‘i le matāgāluega ‘a Tinā ma tama’ita’i, Ātīna’e ‘o āfio’aga ma aga feso’ota’i. ‘O le fa’amoemoe ‘o lea sēleni, ‘e fausia ai ni maota se 26 ‘e aofia ai ma fale lē tā’ua, ‘ae ‘e agava’a ‘i ai ‘āiga na talosaga, ‘ua ‘uma na pāsia ‘i āsiasiga ‘a sui ‘o le fa’alāpotoptoga.

‘O se fesoasoani ‘ua māe’a pāsia ‘i le talafa’atatau ‘autū ‘o le tupe, 2025/2026.

ATA: MWCSD

‘O le ‘itūlā ‘e 11 ‘i le taeao ‘i le Aso 11 ‘o le māsina 11 ‘o tausaga ta’itasi na tula’i fa’aaloalo ai le Afioga ‘i le Sui Pālemia Afioga Tuala Iosefo Ponifasio ma sui ‘o vāega’au mai Niu Sila ma ‘Ausetālia ma fitafita ‘o le atunu’u ‘ua mālōlō litaea mai ‘a’o lo’o soifua ‘e o’o mai ‘i le asō ‘i lalo ‘o le uati ‘i le ‘ogātotōnu ‘o le taulaga ‘i Apia ‘e toe tō mānatu ai ‘i le 106 tausaga talu ai ‘ina ‘ua ola le taua muamua ‘a le lalolagi na ma’umau ai le soifua ‘o le 8.5 miliona ‘o fitafita sā o lātou sā’ilia le filemu ‘i le taua ‘i le 1918.

‘I fa’amaumauga ‘i le faletusi ‘i Kālaisetete ‘o lo’o fa’amauina ai le 122 ‘o tagata Sāmoa na ofoina atu lō latou soifua ‘i le taua muamua ‘o le lalolagi mā ‘o Sāmoa ‘o lo’o ‘avea le falekālapu ‘a le RSA ‘i le taulaga fa’atasi ai ma le uati tele ‘i Apia ‘e fa’amanatu ai le soifua ‘o fitafita na māliliu ‘i le taua.

Mā ‘o le sauniga lea sa fa’atautaia ‘i lalo ‘o le uati ‘i le ‘amataga ‘o lenei vaiaso.

ATA: Leota Marc Membrere. Sāvali Newspaper