‘O le ‘a toe fo’i ‘i le maea ‘o mea tau ‘i pesepesega ma fa’afiafiaga fa’a-Sāmoa, se tasi ‘o fetū pupula ‘o mea tau mūsika ‘a lo tatou atunu’u, Felise Mikaele ‘i se taimi ‘e lē ‘o toe mamao.

Na fa’ailoa lenei fuafuaga ‘e le Afioga iā Asuao Lealaitagomoa Felise Mikaele, ‘i se talanoaga fa’apitoa ma le Si’ufofoga ‘o le Laumua ‘i le vaiaso nei.

Saunoa Asuao, “o lea lava ‘e maua le mālosi … ‘ātonu lava pe ‘e lē ‘o toe mamao a se taimi ‘ae toe oso … ‘oute nofonofo a ma fatufatu nai pese … ‘e maua fo’i loa le avanoa, toe tu’u ‘i luga nai pese … talosia ‘i le alofa ‘o le Atua ‘ia fa’a’umi’umi ai pea le tūlaga lea ‘ua iai, ‘auā ‘o lea ‘ua savali le 75 ma le lua vaiaso le matua lea ‘ua iai”

‘O lenei tamāli’i ‘ua lausilafia ‘e lo tatou atunu’u ‘i le telē ‘o lona sao ‘i fātuga ma pesepesega ‘e aofia ai vi’ivi’iga ‘o nu’u ma āfio’aga.

Na fa’amāvae āloa’ia mai le faiva ‘o pese ma fa’afiafiaga ‘i nai tausaga ‘e le’i mamao atu, ‘ona ‘o tūlaga tau le soifua mālōlōina.

Peita’i sa ia fa’aālia, ‘o lea ‘ua alofagia ‘e le Ali’i lona mālosi ma ‘ua ‘amata ‘ona toe galue ai mō nisi ana fātuga fou.

Sa tā’ua fo’i ma fa’amamafaina ‘e le Afioga ‘iā Asuao ‘i lenei talanoaga, lona matuā lē fiafia ‘i tagata ‘o lo’o fa’aaogāina le atamai fa’afōliga po’o le AI, ‘e toe fa’atūlaga ai ana pese.

‘O lona manatu, ‘ua tele ana pese ‘ua fa’aleagaina ai, ‘ona ‘e pei ‘ua sui ai le fa’a’upuga ‘aemaise ‘o le gagana ‘ua ‘aumai ai ‘i le AI.

‘O le ‘atoāga ‘o le talanoaga lenei ma Asuao, ‘o le ‘a mafai ‘ona fa’afofoga iai ‘i se taimi lata mai ‘i le ‘au’aunaga ‘a le Si’ufofoga ‘o le Laumua.

IMAGE/ATA: Murray Faivalu / SCR (Audio: SCR)

‘O lo’o fesoasoani le Mālō Niu Sila, ‘i le fa’a’au’upegaina lelei ‘o Mālō ‘o le NATO fa’apea ai ma le Pasefika, ‘ina ‘ia talafeagai ma le fesuisuia’iga ‘o taua ma vevesi ‘i lenei vaitaimi.

Sā malaga ‘i Turkey le Minisitā ‘o le Puipuiga, ‘o Chris Penk ‘i le vāiaso ‘ua mavae, mō ni fonotaga ‘a mālō ‘o le NATO, ‘e aofia ai le fono mō matā’upu tau ‘i le puipuiga, le Defence Industry Forum.

‘O le ‘āuai ‘o le minisitā ‘i ia fonotaga, ‘ona ‘o Niu sila, ‘o se sui ‘āuai ‘o le mafutaga ‘a le Pasefika lea ‘e tā’ua ‘o le Indo-Pacific Four, po’o atunuu ‘e fā ia ‘o loo fai-pā’aga ma le NATO ‘i totonu ‘o le Pasefika, lea ‘e aofia ai ‘Ausetālia, ‘o Kōrea ‘i Saute, ma le Mālō Iāpani.

Sā fa’ailoa ai ‘i lea fonotaga le lagolagoina ‘e Niu Sila ‘o le gālulue felagolagoma’i ‘i le vā ‘o sui ‘āuai ‘o le Indo-Pacific Four, ma atunu’u ‘o le NATO, ‘i matā’upu tau ‘i ‘au’upega ma tēkonolosi ‘ua fa’aaogāina ‘i le gaosiga ‘o ‘au’upega ‘o taua.

Sā malaga ma le ali’i minisitā mō ia fonotaga ‘i Turkey, sui ‘o kamupanī ‘e lua ia ‘e a’afia ‘i pisinisi tau ‘i ‘au’upega ‘o le puipuiga ‘o ia kamupanī, ‘o le Starboard Maritime Intelligence, ma le kamupanī ‘e fausia masini felelei ia ‘e tā’ua ‘o drones, ‘e igoa ‘o le SYOS Aerospace..

Na tā’ua ‘e le minisitā, ‘o ia kamupani ‘e lua, ‘e tele ni gāluega ā’oga ‘o lo’o lā fa’atinoina ‘i le taimi nei mō le matāgāluega ‘o le Puipuiga ‘a Niu Sila, le Ministry of Defence.

‘O le SYOS Aerospace, ‘o lo’o fausia nisi ‘o drones ia ‘o lo’o fa’aaogā ‘e le fitafita ‘a le mālō Ukraine, mā ‘o lo’o fesoasoani fo’i ‘i le ātina’ega ‘o ni drones mō va’alele helicopters ‘a le mālō Peretānia Tele.

‘A’o tēkonolosi ‘a le kamupanī ‘o le Starboard Maritime Intelligence, ‘o lo’o fa’aaogāina ‘i le taimi nei ‘e puipuia ai uaea lāpopo’a po’o cables tau feso’ota’iga ia ‘o lo’o fa’ata’oto ‘i le alititai ‘o le sami.

‘E faia le fa’ata’ita’iga ‘o le mea tau alu mamao ‘a Saina ‘i le Pasefika ‘i le Aso Gafua talu ai, ‘ae ‘o lo’o fa’agāsolo fonotaga nei ‘a mālō ‘o le NATO ma le Pasefika ‘i Turkey mā ‘o se tasi ‘o matā’upu sā iloga ‘ona lagalagā ai manatu fa’aalia ‘o usugāfono sā ‘āuai.

Sā tā’ua mai lā ‘e Chris Penk, sā ia fa’aleoina ai ‘i ia fonotaga, le tūmau ‘o le lagolagosua ‘a le mālō Niu Sila ‘o tūlāfono fa’alevāomālō, ma ‘ia fa’amamafaina ai le tele ‘o āfāina ‘o Niu Sila ‘i taua ma vevesi ia ‘o lo’o tūla’i mai ‘i Sasa’e Tūtotonu.

Link to RNZ (Article) written by Lauren Crimp, Political reporter: https://www.rnz.co.nz/news/politics/706676/nz-supporting-indo-pacific-four-and-nato-countries-over-defence-technology-minister

IMAGE/ATA: RNZ / Samuel Rillstone

‘O le pō ‘o le Aso To’ona’i na toe tu’ua ai Niu Sila ‘e le palemia ‘o le mālō Initia, ‘o Narendra Modi, le ulua’i palemia ‘o lea atunu’u ‘ua malaga asiasi mai ‘i Niu Sila ‘i totonu ‘o le 40 tausaga ‘ua tuana’i.

‘A’o iai Modi ‘i ‘Aukilani mō le aso ‘e tasi, sā o lā’ua fa’ailoa mai ai  fa’alaua’itele fa’atasi ma le palemia ‘o Niu Sila, ‘iā Tuisinavemaulumot’ootua Christopher Luxon, le si’itia ai ‘o le vāfealoa’i ‘o mālō ‘e lua, ‘ua ‘avea ai nei ma (faigā pā’aga ‘autu)… “strategic partnership” , ‘e aofia ai le fa’amoemoe mō le fa’aluaina ‘o le aofa’i ‘o ‘oloa fefa’ataua’i ‘i le vā ‘o atunu’u ‘e lua, ma le fa’alolotoina ai ‘o lā so’otaga tau ‘i le puipuiga.

Sā iloga ‘ona fa’atumulia le Spark Arena ‘i ‘Aukilani, ‘i tagata ‘Initia ‘ua nonofo ma fa’amautū ‘i Niu Sia sā fa’atasi atu ‘i ai ‘i le fia feiloa’i ma fa’ailoa lo lātou lagolagoina ‘o le ali’i palemia ‘o le mālō tele ‘o ‘Initia, le atunu’u ‘e aupito ‘i to’atele le faitau aofa’i ‘o ona tagata ‘i le lalolagi ‘ātoa mā ‘o le Mālō Temokarasi aupito ‘i telē lea ‘o le lalolagi.

‘I lana saunoaga fa’afetai ‘i le Mālō Niu Sila ‘i le gagana Hindi, ‘e fa’alua ‘ona tā’ua ai ‘e Narendra Modi ‘e fa’apea ‘ua ‘ioe le mālō Niu Sila ‘i se vaegātupe ‘e o’o ‘i le $20-Piliona ‘e ‘inivesi ‘i ni ātina’e ‘i totonu ‘o ‘Initia ‘i le 15 tausaga ‘o lumana’i ma ‘ia fa’aalia ai ‘e tatau ‘ona a’afia le Mālō Niu Sila ‘i le fa’atupula’ia ‘o le ātina’e ‘o le mālō ‘Initia.

Peita’i lā, ‘o lea matā’upu, ‘e lē talia lelei ‘e le Ta’ita’i ‘o le Labour ‘iā Chris Hipkins ‘ae fa’apea le Ta’ita’i ‘o le NZ First, ‘iā Vaosamanaia Winston Peters.

Na fa’aalia ‘e Hipkins ‘i le ‘au fa’asalalau, ‘e tāua le faigā pā’aga ‘autū ‘i le vā ‘o mālō ‘e lua, ‘ae peita’i, ‘e iai a’afiaga pe ‘ā fai ‘o le ‘ā lē mafai ‘e Niu Sila ‘ona fa’atino lana pitolā’au, ‘e pei ‘ona mālilie ‘i ai.

‘E le’i ‘āuai le minisitā ‘o le  Vā ‘i Fafo ‘i sāuniga fa’alemālō mō le palemia ‘o ‘Initia, ‘ona ‘o lo’o malaga ‘i Singapore fa’apea ma Iāpani.

‘Ae pei ‘ona silafia, ‘e lē lagolagoina ‘e le ta’ita’i ‘o le NZ First le Feagaiga tau Fefa’ataua’iga ‘i le vā ‘o Niu Sila ma ‘Initia, ‘ona ‘o nisi ‘o aiāiga ‘o lea feagaiga ‘o lo’o tete’e ‘i ai lana pātī.

Na fesiligia le ali’i palemia ‘i le matā’upu lenei ‘e tusa ‘o le $20-Piliona mō ni ātīna’e ‘e fia fa’atino ‘i totonu ‘o ‘Initia, ‘ae na tā’ua ‘e Christopher Luxon, ‘o le uiga ‘o le matā’upu lea, ‘o le ‘ioega ‘e ātīna’e ai ma fa’ailoa ni mea tau ‘inivesi ‘i totonu ‘o ‘Initia, ‘ae fa’apea ai fo’i ma Niu Sila.

Link to RNZ (Article) written by Tuwhenuaroa Natanahira, Political reporter: https://www.rnz.co.nz/news/politics/700635/luxon-and-modi-agree-on-partnership-with-trade-and-maritime-security-ambitions

IMAGE/ATA: Pool/NZME/Dean Purcell (RNZ).

‘E lēai ni ta’aloga lakapī ‘e faia ‘a kalapu ‘o le Iuni Lakapī ‘a Ueligitone (Wellington Rugby) ‘i le fa’aī’uga ‘o le vaiaso nei ‘ona ‘o se matā’upu ‘o lo’o lē fiafia ai le ‘Asosi ‘a Laufalī ‘i le laumua.

‘O se fa’amatalaga tusitusia mai le ‘Asosi ‘o Laufalī ‘o Ta’aloga Lakapī ‘a Ueligitone, na tā’ua ai ‘e fa’apea, ‘ua fa’amālosia le fa’alāpotopotoga ‘e taōfia le fa’atinoina ‘o le latou ‘au’aunaga, ‘ona ‘o le fa’aauau pea ‘o faiga tau fa’amata’u ma isi uiga lē manuia fa’asaga ‘i laufalī ‘i le taimi ‘o ta’aloga.

Na fa’aālia mai ‘e le Ta’ita’ifono ‘o le ‘Asosi ‘a Laufalī, ‘o Ben van Berkel, ‘o le vaiaso ‘ua mavae sa fa’ailoa atu ai ‘i le Iuni Lakapī ‘a Ueligitone, ‘āfai ‘e toe aliali mai se isi matā’upu ‘e a’afia ai ni āmioga ma ni uiga pā’a’ā ‘e fa’aālia ‘i laufalī, ‘o le ‘a tāofia loa lō latou toe fa’afoeina ‘o ni ta’aloga.

Sa fa’ailoa mai ‘e le ali’i peresetene ‘o le ‘Asosi ‘a Laufalī, ‘e tolu nisi matā’upu fa’apea sa tūla’i mai ‘i le Aso To’ona’i ‘ua mavae, ma ‘o le ala lea ‘ua faia ai loa le fa’aī’uga, ‘e lēai ni laufalī ‘e gālulue ‘i ta’aloga ‘i le fa’aī’uga ‘o le vaiaso ‘o lumana’i nei mai le aso 10 ‘e o’o ‘i le aso 12 ‘o Iulai.

‘O matā’upu pei ‘ona lē fiafia ai le ‘Asosi ‘a Laufalī sa tutupu mai i ta’aloga lakapī ‘a le ‘au lāiti po’o le junior rugby, fa’apea fo’i lakapī ‘a ā’oga, ‘ātoa ai ma lakapī ‘a ‘au mātutua ‘a kalapu ‘i totonu ‘o le laumua.

Link to RNZ (Article) written by Joe Porter, Sports reporter: https://www.rnz.co.nz/news/sport/679241/referees-withdraw-from-wellington-club-rugby-over-ongoing-abuse

IMAGE/ATA: Wellington Rugby Referees Facebook

‘Ua fa’aālia le matuā lē fiafia ‘o le Minisita ‘o le Vā ‘i Fafo ‘a Niu Sila, Vaovasamānaia Winston Peters, ‘ona ‘o se fa’ata’ita’iga ‘o se meatau mālosi ‘a le Mālō Saina ‘i totonu ‘o le Vasa Pasefika.

Sa fa’aālia ai ‘e le ali’i minisita, ‘o lenei fa’ata’ita’iga, ‘o se gaiōiga ‘e lē talia ‘e tagata ma mālō ‘o lenei itūlagi ‘o le kelope.

‘O lea saunoaga ‘a Vaovasamānaia ‘i le Aso Gafua, na ia fa’amamafaina ai, ‘o le faia ‘o lenei fa’ata’ita’iga, ‘o se gaiōiga ‘e lē ō gatusa ma le tūlaga nofolelei ma le tausia ‘o le filemū ‘i lenei vāega ‘o le lalolagi.

‘E na ‘o ni nai itulā talu ‘ona fa’ailoa mai ‘e le Mālō Saina ‘i le Mālō Niu Sila, lea fa’amoemoe, ‘ae fa’ataunu’u loa le latou fa’ata’ita’iga, ‘i le fanaina a’e lea ‘o se meatau fa’atonutonu alumamao mai  se va’amaulu niukilia ‘o Saina ‘i totonu ‘o le Vasa Pasefika.

Sa tā’ua fo’i ‘e le Minisita ‘o le Vā ‘i Fafo ‘a Niu Sila, ‘o lo’o iloa lelei ‘e le Mālō Saina atugaluga ‘o Niu Sila ‘i lea itu’aiga ‘o fa’ata’ita’iga, a’o lea lava ‘ua fa’ataunu’uina, ‘ae le’i ‘umi se taimi talu ‘ona logoina mai āloa’ia le Mālō Niu Sila.

‘O se lipoti mai le nusipepa ‘o le The Australian, ‘i le Aso Gafua na tā’ua ai, ‘e fōliga mai, ‘o le fa’ata’ita’iga lenei ‘a le mālō Saina, ‘ua faia, ‘e fa’aālia ai lō latou lē fiafia, ‘i le sainia ‘o se māliega ‘e gālulue fa’atasi ai le mālō ‘Ausetālia ma le Mālō Fiti, mō se filemū ‘o le Vasa Pasefika.

‘O lea feagaiga ‘e tā’ua ‘o le Ocean Peace Alliance, na sainia ‘i Fiti ‘i le fa’aī’uga ‘o le vaiaso, ma ‘ua fa’amatalaina ‘e minisita ‘o le mālō ‘Ausetālia, ‘o se feagaiga tāua tau ‘i le puipuiga.

‘Ae pei la ‘ona fa’ailoa mai ‘e Vaovasamānaia Winston Peters, le minisita ‘o le vā ‘i fafo ‘a Niu Sila, ‘o le faia ‘o se fa’ata’ita’iga ‘o se meatau fa’atonutonu ‘i totonu ‘o le Pasefika, ‘e fete’ena’i ma le fa’amoemoe ‘e ‘avea ai le Vasa Pasefika ma Vasa ‘o le Filemū.

Link to RNZ (Article) written by Lilian Hanly, Political Reporter: https://www.rnz.co.nz/news/politics/680418/winston-peters-deeply-concerned-after-china-conducts-missile-test-in-south-pacific

IMAGE/ATA: RNZ / Louis Dunham

‘E 5 maka ‘ua pa’ū ai le lagolago mō le Labour ‘i le sā’iliga ‘o finagalo ‘a le Verian poll ‘a le 1News peita’i ‘o lo’o mafai lava ‘ona fau se faigāmālō so’ofa’atasi ma le Greens ma le Te Pati Māori, ‘i nofoa ‘e 64. 

Pa’ū la’itiiti le National, mā ‘o se lagolago pito sili lea ‘ona maualalo mō vāega fa’a’upufai talu mai le faigāpālota muamua ‘o le MMP ‘i le 1996, ‘ae ‘o le lagolago pito maualalo fo’i lea ‘i lalo o le ta’ita’iga ‘a Christopher Luxon.  Labour 32 pasene, 5 ‘ua pa’ū ai, National 29 pasene, 1 ‘ua pa’ū ai, Greens 13 pasene, 2 ‘ua si’itia ai, NZ First 11 pasene, 1 ‘ua si’itia ai, Act 6 pasene, 1 ‘ua pa’ū ai ma le Te Pati Māori ‘e 1.8 pasene, 0.3 pasene ‘ua si’itia ai.

Sui faiple ‘e pito lilifa ‘i ai le lagolago ‘e ‘avea ma palemia:

• Christopher Luxon: 18 percent – up 2 points
• Chris Hipkins: 16 percent – down 3 points
• Winston Peters: 10 percent, down 2
• Chlöe Swarbrick: 6 percent, steady
• David Seymour: 4 percent, steady
• Chris Bishop: 1 percent, down 1

Link to RNZ (Article): https://www.rnz.co.nz/news/politics/617657/left-bloc-leads-in-latest-poll-despite-labour-slump

IMAGE/ATA: RNZ

‘O le filifilia ai ‘o le ali’i ‘o Ardie Savea ‘e ‘avea ma Kapeteni ‘o le ‘Olopeleki ‘ua to’alua iai alo ‘o Sāmoa ‘ua ‘ausia lea tūlaga ‘i le tala fa’asolopito ‘o le ‘au lakapī ‘a Niu Sila.

‘E pei ‘ona silafia, ‘o Fa’alogo Tana Umaga lea na muamua, a’o lea ‘ua soso’o atu iai Ardie Savea, ‘o lā’ua ‘uma ‘o ni tama fanau ‘a le laumua ‘i Ueligitone.

‘E pei ‘ona silasila iai ‘i le TV, ‘o le Aso Gafua lea na fa’ailoa mai ai ‘e le ali’i faiā’oga ulu ‘o Dave Rennie le ‘au ‘a le ‘Olopeleki ‘ua filifilia mō ta’aloga ‘e tolu ‘i le māsina fou.

Sa fa’ailoa mai ai ma lē ‘ua filifilia ‘i le tofi kapeteni ‘o le ‘au ‘i lenei tausaga ma na fa’aalia ai ‘e Ardie Savea ‘i se talanoaga ma le ‘au fa’asalalau ‘o lenei tōfiga, ‘o se fa’aeaea aupito ‘i mauāluga lea ‘i mea tau ta’aloga ma sa ia ta’utino ai ‘o le ‘a ia taumafai ‘e gālulue fa’atasi ma ‘i latou ‘uma ‘o lo’o a’afia ‘i le ‘au ‘ua filifilia nei, ‘ae fa’apea ai ma isi na muamua atu ‘ina ‘ia fa’aauau ai pea ma fa’amālosia le tūlaga lelei ‘o le ‘Olopeleki.

‘O isi alo ‘o Sāmoa ma le Pasefika ‘o lo’o aofia ‘i le ‘au ‘a le ‘Olopeleki na fa’ailoa mai ‘ananafi, ‘o Asafo Aumua, Patrick Tuipulotu, Wallace Sititi, Anton Lienert Brown, George Bower, Pasilio Tosi, Tupou Vaa’i, Xavier Numia, Fehi Fineanganofo, ma Quinn Tupaea.

‘O le aso 4 ‘o Iulai le ta’aloga muamua ‘a le ‘Olopeleki ‘i lenei tausaga, lea ‘o le ‘a tā’a’alo ai ma le ‘au ‘a Falani ‘i Kalaiesetete.

‘O le Aso To’ona’i 11 ‘o Iulai le ta’aloga ‘e lua, ‘o le ‘a tā’a’alo ai ma le ‘au ‘a ‘Italia ‘i le malae ‘o le HNRY Stadium ‘i Ueligitone, ‘ona fa’ai’u lea ‘i le ta’aloga ma ‘Aiālani ‘e faia ‘i le Eden Park ‘i le Aso To’ona’i 18 ‘o Iulai.

‘O le māsina ‘o Nōvema lea ‘e malaga ai le ‘Olopeleki ‘i Europa ma ‘o le latou ta’aloga muamua ‘e fetaui ai ma Sikotilani ‘i le malae ‘i Murrayfield ‘i le Aso Sā le aso 8 ‘o Nōvema.

IMAGE/ATA: Ardie Savea Facebook