‘O lea ‘ua o’o ‘i se tau aupito ‘i maoa’e le penisini ‘i totonu ‘o Niu Sila, talu ‘ona ‘āmata le taua ‘i le vā ‘o ‘Amerika ma Iran.

‘O le tau ‘evalesi ‘o le penisini 91, ‘o lea ‘ua o’o ‘i le $3.50.5 sene ‘i le lita ‘i le taimi nei ‘e pei ‘ona lipotia mai ‘e le fa’alāpotopotoga ‘o le Gaspy, lea ‘e māta’itūina le tau ‘o le penisini ma le suāu’u.

Na fa’aālia mai ‘e le ali’i fa’atonu ‘o Mike Newton, ‘ua mauāluga atu le tau ‘i le taimi nei, nai lō le $3.50.2 sene ‘i le lita, lea sa iai ‘i le taimi na vevela ai le taua ia ‘Aperila.

Na ia tā’ua, ‘o le si’itaga ‘ua iai nei, ‘ua soso’o ma le fa’aauau pea ‘ona sili atu ‘i le selau tālā ‘Amerika, le tau ‘o le paelo, ‘o le suāu’u ‘o le Brent Crude, lea ‘ua o’o nei ‘i le $101.5 sene tupe ‘Amerika.

‘Ae lē gata ‘i lea, ‘ae ‘o a’afiaga mai le pa’ū ai ‘o le aogā ‘o le tālā Niu Sila ‘i nai māsina ‘ua mavae atu nei, lea ‘ua tūla’i mai ai nei ‘i le tasi le tālā Niu Sila ‘ ‘i le 55.8 sene tupe ‘Amerika.

‘O le pa’ū ‘i lalo ‘o le aogā ‘o le tālā Niu Sila ‘i fefa’atauā’iga ma isi atunu’u, ‘e māfua ai ‘ona taugata suāu’u ma penisini ia ‘e fa’atauina mai atunu’u ‘i fafo.

Link to RNZ (Article): https://www.rnz.co.nz/news/business/1745943/petrol-price-hits-highest-level-since-start-of-iran-war

IMAGE/ATA: RNZ / Unsplash

‘O lea ‘ua fa’ailoa mai fa’alaua’itele le Fuafuaga tau tupe ‘a le pātī ‘o le Labour, ‘e pei ‘ona sa fa’atalitali iai le to’atele ‘aemaise ‘o le ‘au pālota ‘o Niu Sila.

‘O le fa’ailoaina mai ‘o lenei Fuafuaga ‘Autū ‘a le Labour, ‘e lona Sui So’o’upu mō mea tau tupe ma le tamā’o’āiga, le afioga Pesetātamalelagi Barbara Edmonds, na ia tā’ua ai, ‘o pōlisi ma faiga fa’avae ‘uma pei ‘ona folafola ma pōlōmisi mai ‘e le Labour, ‘o lea ‘ua ‘uma ‘ona fa’atūlaga ma fa’avasega vāegatupe ‘e tatau ‘ona fa’aalu ai.

‘O lo’o aofia ‘i lenei Fuafuaga ‘a le Labour ia se si’itaga ‘o totogi mo le aofa’iga ‘e 65,000 afe ‘o tagata faigaluega ‘i le va’aiga ma le tausiga ‘o isi tagata, ma le ‘aufaigaluega lagolago po’o support workers, ‘o le ‘a tatau ‘ona fa’aalu ai le vāegatupe ‘e tusa ma le $2.5 piliona tālā ‘i totonu ‘o tausaga ‘e fā ma telē ai le avanoa ‘e fetu’una’i ai seleni ma vāegatupe mana’omia mō le tūlaga aoao tetele ‘o totogi tutusa, mo tagata faigaluega.

Sa fa’amanino mai ai fo’i e Pesetā, ‘e leai se suiga ‘e faia ‘e le Labour ‘i le $2.4 piliona tālā ‘o tupe fa’aalu mo galuega fai ‘a le mālō, ‘e pei ‘ona fa’atūlagaina mai ‘e le Faigāmālō So’ofaatasi ‘i le latou Tala ‘o le Tupe ‘o le tausaga nei, 2026.

Sa ia fa’amamafaina ai, ‘e lē ‘o iai se fa’amoemoe ‘o le Labour ‘e fa’alagolago atu ‘i se vāegatupe ‘e maualuga atu mo galuega fa’atino, ‘ona ‘o le manatu ‘o so’o se ‘inivesi fou ‘e fia faia, ‘e tatau ‘ona talafeagai ma vāegatupe fa’atatauina ‘ātoa ma isi vāega ‘e pei ‘o tūlaga ‘e tatau ‘ona ‘ave iai le fa’amuamua.

Na ia tā’ua, ‘o le tau ‘ātoa ‘o galuega ma fuafuaga fa’ata’atitia, ‘e pei ‘ona folafola mai fa’alaua’itele ‘e le Labour, ‘a’o fa’agāsolo fa’atōsina ‘o le pālota, ‘o lo’o fetaui lelei ma talafeagai ma le $12 piliona tālā ‘o tupe fa’aalu fa’atatauina ‘a le Mālō mo ana galuega fa’atino.

‘Ae lē gata ‘i lea, ‘ae iai fo’i le vāegatupe ‘e lata ‘i le $10.5 piliona tālā, ‘e le’i fa’apolokalameina ni atina’e ma ni galuega ‘e fa’atino ai ma ‘o lea sēleni ‘e mafai ‘ona fa’atino ai le tele ‘o polokalame sa pōlōmisi mai ‘e le Labour, ‘e aunoa ma le si’itia ai ‘o vāegatupe fa’aāgaga mō galuega fa’atino ‘a le Mālō. 

‘O vāega ‘o le pōlisi tau tupe ‘a le Labour, ‘e aofia ai le:

• $200 milliona tālā fa’aopoopo ‘i le sao ‘o le Mālō mo le Fa’aputugātupe ‘o le Lumana’i le New Zealand Future Fund,
• $420 milliona tālā ‘e ‘āmata ‘ona soloia ai ‘aitālafu ‘a tama ma teine ā’oga po’o student loans,
• $200 milliona tālā mō falema’i ‘uma ‘o le atunu’u,
• $400 milliona tālā mo ā’oga ‘uma,
• $2.9 pilliona tālā mo Fale ‘o le Mālō le Kāinga Ora housing, ‘i totonu ‘o le fā tausaga ‘o lumana’i,
• $7 milliona tālā ‘e fesoasoani ai ‘i le ‘au totogi lāfoga mo le polokalame lea e tā’ua for Ratepayer Assistance Scheme (RAS) ‘i le tau ‘o le ‘eletise ‘e maua mai ‘i le mālosi ‘o le lā (solar power).

Link to RNZ (Article): https://www.rnz.co.nz/news/politics_election-2026/1718141/labour-releases-its-fiscal-plan-promises-pay-rise-for-care-and-support-workers

IMAGE/ATA: RNZ/Baz Macdonald

‘Ua folafola mai ‘e le vāega fa’a’upufai ‘a le Greens, ‘o le ‘a o latou u’una’ia le tatau lea ‘ona fesoota’i ‘o ‘a’ai tetele ‘o Niu Sila ‘i malaga ‘a nofoaafi po’o trains, pe ‘āfai ‘e a’afia ‘i lātou ‘i le isi faigāmālō ‘e soso’o ai nei ‘a le atunu’u.

‘O se vāega ‘o lea fuafuaga ‘a le Greens, ‘e aofia ai le toe faia ‘o ni malaga fa’atūlagaina mō pāsese femalagaa’i ‘i nofoaafi ‘i le vā ‘o ‘Aukilani ma Ueligitone ‘i le pō, ‘ae lē gata ‘i lea ‘o le vā ‘o Kalaiesetete ma Dunedin ‘i le motu ‘i saute ‘ātoa ai ma le fa’alauteleina atu ‘o le ‘auala lea ‘e fa’aigoaina ‘o le Te Huia mō nofoaafi aga’i ‘i le ‘a’ai ‘o Tauranga.

Na fa’ailoa mai ‘e le tasi ‘o ta’ita’i ‘o le Greens, ‘o Marama Davidson, ‘o le agaga ‘autū ‘o ia fuafuaga, ‘ina ‘ia taugōfie ai le tau ‘o femalaga’iga ‘a le atunu’u ma maua ai feso’ota’iga lelei ‘i le vā ‘o nu’u ma itūmālō.

Link to RNZ (Article): https://www.rnz.co.nz/news/politics_election-2026/1701879/green-party-announces-plan-for-passenger-rail-between-major-nz-cities

IMAGE/ATA: Tess Brunton / RNZ

‘Ua pōlōmisi mai ‘e le pātī ‘a le National, le ‘āmatalia ‘o le galuega ‘o le ‘auala tele lea ‘e fa’aigoaina ‘o le Mill Road, ‘o se tasi ‘o ‘auala ‘o lo’o i lalo ‘o lana polokalame ‘o ‘Auala Tetele ma le Tāua ‘a le Mālō, pe ‘āfai ‘e toe tūla’i mai ‘i lātou ‘e ta’ita’i le isi faigāmālō ‘e soso’o ai nei.

‘O le folafolaga ‘ua tu’uina mai ‘a le National ‘e tusa ‘o lea matā’upu, ‘e fa’apea, ‘o le ‘a o latou fa’atūlagaina ‘i le Tala ‘o le Tupe mō le tausaga ‘e 2028, se vāegatupe ‘e tusa ma le $1.75 miliona tālā, ‘ina ‘ia mafaia ‘ona ‘āmata lea galuega tele ‘i le fa’aī’uga ‘o le 2028, ‘ae ‘o le vāega lua ma le vāega tolu ‘o lea lava galuega, ‘o le ‘a fa’atatauina ai se sēleni ‘e tusa ma le selau miliona tālā.

‘O le ‘auala lenei, le Mill Road, na toe fa’ata’atia’ese ‘e le faigāmālō so’ofa’atsai ia Iulai mai le polokalame ‘e ta’ua ‘o le Roads of National Significance, ‘ona ‘o le mau fesili na tūla’i mai ai ‘e uiga ‘i le tau ‘e fausia ai.

Peita’i lā, ‘o le Aso Sā, lea na fa’aīloa mai ai fa’alaua’itele ‘e le palemia ia Tuisinavemaulumoto’otua Christopher Luxon ma le Minisitā ‘o Galuega Tetele, ‘o Chris Bishop, ‘i le ‘auala ‘o le Redoubt Road ‘i ‘Aukilani, le ‘avea ‘o lenei matā’upu, ma se tasi ‘o folafolaga ‘autū a’ le National mō le finauina ‘o le pālota ia Nōvema.

Sa tā’ua ai ‘o le vāega muamua ‘o lenei galuega ‘e aofia ai le vā ‘o Manukau ma Alfriston, a’o le vāega ‘e lua ma le vāega tolu ‘e a’afia ai le ‘auala ‘i le vā ‘o Alfriston ma Drury.

‘O le fa’amoemoe ‘o lenei ‘auala fou pe ‘a mā’ea, ‘e 21.5kilomita le umi, ‘o le tā’otolua ma le ‘auala tele nūmera tasi po’o le State Highway 1 ‘i le vā ‘o Manukau ma Drury, ‘ina ‘ia fō’ia ai le tuai ‘o le fegāsoloa’i ‘o ta’avale.

Link to RNZ (Article): https://www.rnz.co.nz/news/politics_election-2026/1714113/national-promises-1-point-75b-to-build-mill-road-as-part-of-roads-of-national-significance

IMAGE/ATA: RNZ/Lillian Hanly

‘O le taunu’uga, ‘ole su’esu’ega aupito lata mai nei ‘i manatu ma lagona ‘o le ‘au pālota, ‘ua manino ai le mauāluga ‘o le tūlaga ‘ua o’o iai le pātī ‘o le Greens, ma atagia ai le mafai lea ‘e le itū tauagavale ‘o le maota, ‘ona latou fa’avaeina lesi faigāmālō fou, pe ‘afai lea ‘e fa’aauau pea ‘ona musu le National ‘e gālulue fa’atasi ma le vāegafa’a’upufai ‘o le Opportunity Party.

‘O le sā’ili’iliga lenei, ‘a le 1News-Verian Poll ‘o lo’o tūtusa ai le National ma le Labour ‘i le ta’i 28 pasene, ‘e tusa lea ma le tasi le pasene ‘ua pa’ū ai le National, ‘ae lua pasene na pa’ū ai le Labour.

‘A fa’aliliu ia pasene ‘i nofoa ‘o le Palemene, ‘ona tūla’i mai lea ‘e ta’i 34 nofoa ‘o pātī ‘autū nei ‘e lua.

‘Ae ‘o le pātī ‘a le Greens, ‘o lea ‘ua o’o ‘i le 16 pasene le tūlaga lagolagoina ‘e le ‘au pālota sa fesiligia ‘i lenei sā’ili’iliga, ‘e tusa lea ma le 4 pasene ‘ua fa’aopoopo ‘i le tūlaga sa iai ‘i le su’esu’ega talu ai. ‘O lea aofa’iga ‘e maua ai ‘e le Greens nofoa ‘e 19 ‘o le Palemene.

‘E soso’o atu iai le pātī ‘a le ACT lea ‘ua tūla’i mai ‘i le 11 pasene, ‘e lua pasene ‘ua fa’aopoopo ‘a’o le pātī ‘o le NZ First, ‘e tasi le pasene na fa’aopoopo, lea ‘ua o’o ai ‘i le 9 pasene lona tūlaga lagolagoina ‘i le taimi nei.

‘O le pātī ‘o le Opportunituy Party, ‘e lua pasene na pa’ū ai ma tūla’i mai ai nei ‘i le 6 pasene po’o lona uiga ‘e tatau ‘ona maua ai ‘o latou nofoa ‘e fitu (7), ‘i totonu ‘o le Palemene.

‘E leai se suiga tele ‘i le pātī ‘a Māori, lea ‘e tasi le pasene ‘o lo’o tūla’i mai ai nei po’o le fā le aofa’i ‘o nofoa latou te maua ai.

‘Ae ‘o le pātī fou ‘o le Te Tai Tokerau Party, ‘e tasi lona nofoa ‘o lo’o iai nei ‘i le Palemene.

‘O le Ta’ita’i ‘e aupito agava’a mō le tofi Palemia, ‘o Tuisinavemaulumoto’otua Christopher Luxon, ‘e 19 pasene le tūlaga lagolagoina ‘e le ‘au pālota sa fesiligia.

‘O Chris Hipkins, ‘e 14 pasene, soso’o atu ai Chloe Swarbrick ‘o le Greens ‘i le 8 pasene, ‘ae tūtusa David Seymour ma Vaovasamānaia Winston Peters, ‘e ta’i 7 pasene.

E 1004 le aofa’i ‘o tagata pālota, sa fesiligia ‘i le su’esu’ega lenei sa faia ‘i le vā ‘ole aso 23 ma le aso 27 ‘o Setema.

‘O le agaga ‘o su’esu’ega nei, ‘ia maua ai sina ata fa’atusatusa ‘o le tūlaga ‘o iai lagona ma manatu ‘o tagata pālota mai lea taimi ‘i lea taimi, ‘ae lē ‘o se valo’aga lea ‘e tusa ‘o le taunu’uga ‘e ono o’o iai le faigāpālota ‘o lo’o loma nei.

Link to 1News (Article): https://www.1news.co.nz/2026/09/28/poll-greens-surge-to-best-result-ever-as-national-labour-slide-further/

IMAGE/ATA: SCR (file). Treasury logo, screengrab from Treasury Website.

‘O le asō, ‘e fa’ailoa mai ai fa’alaua’itele ‘e le Matāgaluega ‘o Tupe ‘a le Mālō, le Treasury, le tūlaga ‘o iai tusi ‘a le Mālō, ma le tamao’āiga ‘o le atunu’u ‘a’o lumana’i ai le pālota tele ia Nōvema.

‘O le lipoti lenei, ‘e tā’ua ‘o le Pre-election Economic and Fiscal Update, ‘o se lipoti ‘e māsani ‘ona tu’uina mai ‘i le taimi nei, ‘a’o tāpena ma sauni ai le atunu’u mō se faigāpālota tele.

‘O le lipoti aupito lata mai nei, ‘o le tūlaga ‘o tupe fa’aalu ma tupe maua ‘a le Mālō, sa atagia ai le iai ‘o se pa’ū ‘i le aofa’iga ‘o tupe fa’aalu ‘a le Mālō Niu Sila.

Sa maitauina fo’i ‘i lea lipoti le iai ‘o se si’itaga ‘o tupe maua ‘a le Mālō mai lafoga.

‘E manatu le ‘au fai tōfā ‘o matā’upu tau le tamao’āiga ‘i faletupe ‘o le Westpac, fa’apea le ANZ ma le ASB, ‘e fōliga mai ‘i le fa’ai’ui’u ai ‘o le nofoā’iga ‘o lo’o iai nei, ‘ua tau iai sina suiga lelei ‘o le tamao’āiga ‘o le atunu’u.

‘O lo’o masalomia ‘e ‘i latou ia, ‘o le lipoti ‘o le ‘a fa’alaua’iteleina mai ‘e le Treasury ‘i le asō, ‘ātonu ‘o le ‘a tūtusa ma le valo’aga sa faia ‘e le faigāmālō ‘i le tūlaga ‘e ono o’o iai le tamao’āiga ‘o Niu Sila ‘i lana Tala ‘Autū ‘o le Tupe mō le tausaga lenei 2026.

‘O lona uiga ‘e ono ātagia ai le fa’aitiitia ‘o ‘aitālafu ‘a le mālō ma pa’ū ai ‘i lalo le mauāluga ‘o le tūlaga pa’ū ‘i le aofa’i ‘o tupe maua ma tupe fa’aalu ‘a le Mālō Niu Sila.

‘E to’atele fo’i ‘o lo’o manatu, ‘ailoga ‘o le a iai se suiga ‘i le valo’aga na tu’uina mai muamua ‘e le ‘Ofisa ‘o Tuoe, ‘e tusa ai ‘o le toe maua ‘o se tupe fa’asili ‘i galuega fai ‘a le Mālō ‘i le tausaga ‘e 2028/29.

IMAGE/ATA: SCR (file). Treasury logo, screengrab from Treasury Website.

‘I lakapī fa’alevā’omālō na mata’ina le mālō ai ‘o le Wallabies ‘a ‘Ausetālia ‘i le Springboks ‘a ‘Aferika ‘i Saute ‘i le la ta’aloga faitauina ‘i le ‘a’ai ‘o Perth ‘i le Aso Sā ananafi.

‘O ‘ai ‘o lea ta’aloga ‘e 42 le Wallabies ‘i le 38 ‘a ‘Aferika ‘i Saute.

‘E toe 15 minute ‘uma lea ta’aloga ‘ae ‘ua 42 ‘ai ‘o ‘Ausetālia ‘i le 17 ‘a le Springboks peita’i ‘o vāega fa’ai’u ‘o le ta’aloga ‘ina ‘ua tutuli ‘i tua le to’afā ‘o tama tā’a’alo ‘a ‘Ausetālia na yellow card, lea na toe maua ai sīkoa ‘e tolu ‘a ‘Aferika ‘i Saute, ma vāvā lalata ai ‘ai ‘i le fa’aī’uga ‘o lea ta’aloga ‘i Perth.

’E 13 suiga sa faia ‘e le faiā’oga ‘o le Springboks ‘i lana ‘au mai le ‘au lea na faiā’ina ai le ‘Olopeleki ‘i le ‘a’ai ‘o Baltimore ‘i ‘Amerika talu ai nei.

IMAGE/ATA: Wallabies Facebook.

‘Ua folafola ‘e le Labour le soloia ‘o le 10 pasene ‘o ‘aitālafu ‘a tama ma teine ā’oga, po’o student loans, pe ‘a tūla’i mai ‘i le ta’ita’iga ‘o le isi faigāmālō ‘e soso’o ai ‘a Niu Sila.

‘O se tasi lenei ‘o pōlisi ‘autū na fa’ailoa ‘e le ta’ita’i ‘o le Labour ia Chris Hipkins, ‘i lana saunoaga na tatala ai āloa’ia le polokalame ‘o fa’atōsina ‘a le Labour mo le pālota ia Novema.

‘O ‘aitālafu ‘a tama ma teine ā’oga, po’o student loans, ‘ua ‘I lalo ifo ‘o le $2,000 afe tālā le pāleni, ‘o lo’o totoe, ‘o le ‘a fa’amāgalo ‘i lalo ‘o lea faiga fa’avae ‘a le Labour.

Na fa’ailoa ‘e le ta’ita’i ‘o le Labour ‘o le tau ‘o lenei pōlisi ‘e tusa ma le $583.4 miliona tālā ‘i totonu ‘o le lima tausaga ‘o lumana’i, ‘ae ‘o le vāega tele ‘o lona tausaga muamua lea ‘e ‘amata fa’amamalu ‘i le aso muamua ‘o ‘Aperila ‘o le tausaga fou 2027.

Sa fa’amamafaina fo’i ‘e Hipkins, ‘o le fa’amoemoe ‘autū ‘o lenei faiga fa’avae ‘a le Labour, ‘ina ‘ia fa’aosofia ai tama ma teine ‘e i’u mai iunivesite, ‘ina ‘ia ‘aua le malaga ‘i fafo, ‘e su’e galuega iai, ‘ae nonofo ‘e faigaluega ‘i totonu ‘o Niu Sila.

Link to RNZ (Article): https://www.rnz.co.nz/news/politics_election-2026/1612259/labour-promises-to-write-off-10-percent-of-some-student-loan-balances

IMAGE/ATA: Chris Hipkins says the policy is designed to help young people ‘get ahead’.Photo credit:NZME / Supplied

‘O le Aso Sā ananafi, lea na tatala ai āloa’ia ‘i ‘Aukilani, fa’atōsina ‘a patī ‘autū ‘e lua ‘a Niu Sila, ‘o le National ma le Labour, mō le pālota tele ‘e pei ‘ona ‘atofaina mo le aso 7 ‘o Nōvema.

Sa muamua ‘i le ‘afa ‘o le tasi (1.30pm), ‘i le aoāuli, le saunoaga ‘a le ali’i palemia ia Tuisinavemaulumoto’otua Christopher Luxon, le ta’ita’i ‘o le National, ‘a’o le saunoaga ‘a le ta’ita’i ‘o le Labour ia Chris Hipkins, ‘o le 20 minute ‘e te’a ai le itulā ‘e 3.00 ‘i le afiafi ‘o le Aso Sā.

Sa folasia ai ‘e le ali’i palemia, ia nisi ‘o mea sa mafai ‘ona fa’atino ‘e le faigāmālō so’ofa’atasi ‘i le tolu tausaga lea ‘ua fa’ai’ui’uina nei ma fa’ailoa mai nisi ‘o fuafuaga ma faiga fa’avae ‘e manatu le National, ‘e manuia ai le atunu’u ‘i le lumana’i.

‘Ae ‘o le saunoaga ‘a le ta’ita’i ‘o le Labour ia Hipkins, na ia tā’ua ai, ‘o le mafua’aga ‘o le mau fa’afītāuli ‘ua pagātia ai nei le atunu’u, ‘ona ‘o le fa’alētonu ‘o le ta’ita’iga ‘a Luxon ma le pātī ‘o le National, o le ta’ita’i ‘o le faigāmālō so’ofa’atasi, pei ‘ona gālulue ai ma le ACT fa’apea le pātī ‘a le NZ First.

‘E ui ‘ina ‘ua tele le mau fa’alauiloa ma fa’asalalauga fa’alaua’itele ‘a pātī ‘uma ‘e tusa ‘o le finauina ‘o le pālota ia Nōvema, ‘ae ‘o lea faato’a tatala lelei ia polokalame ‘o fa’atōsina ‘a pātī nei ‘o le National  ma le Labour ‘i le Aso Sā ma ‘ua āloa’ia ai le vaitaimi ‘o fa’atōsina mo le pālota tele ‘o lo’o loma nei.

‘Ua soso’o lea tulaga ma le tauāofiaga fa’ai’u ‘a le Palemene ‘i le Aso Lulu na te’a nei lea ‘ua avanoa ai nei faipule ‘uma ‘e fo’i atu ‘i ō latou itūmālō mō le fa’afoeina ‘o ā latou fa’atōsina mo le palota ‘i le aso 7 ‘o Nōvema.

Link to RNZ (Article): https://www.rnz.co.nz/news/politics_election-2026/1603176/as-it-happened-election-campaign-27-september

IMAGE/ATA: Christopher Luxon and Chris Hipkins at their respective election campaign launches in Auckland.Photo credit:RNZ/NZME