Na feiloa’i Tyson Fury ma Anthony Joshua ‘a’o loma ai sa lā fusu’aga ‘ua leva ‘ona taumate pē taunu’u.  ‘O le aso 11 Tēsema ‘i le Principality Stadium ‘i Cardiff ‘o le ‘ā fa’ataunu’u ai le fusu’aga ‘i le vā ‘o nei ali’i fusu ‘e to’alua, ‘ae ‘āmata fa’atauina atu pepa ulufale ‘i le aso 9 ‘Oketopa. 

‘O ananafi lea na feiloa’i ai ‘i se fonotaga ma tusitala ‘i Lonetona.  Na fa’aalia ‘e ali’i fusu ‘uma ‘e to’alua le tāua ‘o le faia ‘o le fusu’aga ‘i Peretānia ‘ae le’o le Iunaite Setete po’o Saudi Arabia ‘ae fa’asalalau ‘e le Netflix ma ‘ua mafai fo’i ‘ona fa’ataunu’u ‘ona ‘o Turki Alalshikh, lē ona le Ring Magazine ma ia fa’alauiloaina fo’i fusu’aga ‘i Saudi Arabia.

Link to RNZ (Article): https://www.rnz.co.nz/news/sport/1667977/smiles-and-respect-as-tyson-fury-and-anthony-joshua-have-first-face-off-ahead-of-december-fight

IMAGE/ATA: Tyson Fury Facebook

‘O le asō ananafi lea na ‘āmata fa’amamaluina ai ‘i ‘Ausetālia le tapu ‘ona toe fa’aopoopo ‘o ni tau ‘i le fa’aaogāga ‘o cards, ma ‘ua fa’aalia ‘e le National, ‘o lo’o naunau pea ‘ina ‘ia tupu lea faiga ‘i totonu ‘o Niu Sila.  Na fa’asilasila ‘i le tausaga talu ai se fuafuaga fa’apea mō  Niu Sila ma sa iai le fuafuaga ‘e fa’atino ‘i le māsina ‘o Me.  Peita’i ‘o le lē lava ‘o le lagolago ‘a vāega fa’a’upufai na lē āga’i ai ‘i luma lea fuafuaga.

Na saunoa le Minisitā mō Matā’upu tau Pisinisi ma Tagata Fa’atau, Cameron Brewer, ‘e lē suia lava le fa’anaunauta’iga ‘o le National, ‘e fa’asā ai ‘ona toe iai ni tau fa’aopoopo (surcharges) ‘i pepa ‘e tala ma teu ai tupe.  ‘O lo’o fa’aauau pea gāluega ‘a’o iloilo finagalo ‘o lo’o fa’ao’o atu.  ‘Ae ‘o le ‘ā fa’ailoa pea ‘i le atunu’u ‘i nisi la’asaga ‘o le ‘ā āga’i ‘i ai. 

Na saunoa le so’o’upu ‘a le Consumer NZ Jessica Walker ‘e iai lava lona fa’amoemoega, ‘ia mafai ‘ona taunu’u lea fuafuaga.  ‘O lana su’esu’ega na fa’aalia ai, ‘o le 58 pasene ‘o tagata ‘e lagolagoina mālosi le fa’asā ‘ona iai ‘o ni tau fa’aopoopo pe ‘ā fa’aaogā cards. 

Link to RNZ (Article): https://www.rnz.co.nz/news/business/1665489/australia-bans-card-surcharges-will-we-follow-suit

IMAGE/ATA: SCR (file).

‘Ua tu’uina atu ‘e le Fa’amasinoga Sili le fa’atagaga ‘iā Kenny Leslie McMillan ‘o Uēligitone, ‘o se tagata na fa’amaonia solitūlāfono ‘i fefa’ataua’iga ‘o fuālā’au fa’asāina, ‘e fai ai lana ‘apili po’o se talosaga toe iloilo ‘e fa’asaga ‘i le poloa’iga ‘a le fa’amasinoga, ‘e tu’uina atu ai ana polōfiti ‘uma ‘e lata ‘i le $2.8 miliona.

‘E 18 tausaga na fa’asalaina ai le taule’ale’a ‘e le fa’amasinoga ‘i le falepuipui ‘i le 2021 ‘ina ‘ua fa’atino se su’esu’ega tele ‘a leoleo ‘e tā’ua ‘o le Superdry.  Na mōlia McMillan ‘i lona sapalaiina ‘o le silia ma le 10 kilokalama ‘o le methamphetamine.

Na fa’aalia ‘e leoleo, na o lātou ‘aveina fo’i ni galuega taulima ‘o le Ralph Hotere, ‘o ni ‘auro ‘e aofia ai se uati ‘e tusa ma le $50,000 le tau. 

‘O le vāiaso nei, na tu’uina atu ai ‘e le Fa’amasinoga Sili le avanoa ‘e fesiligia ai, pe na sa’o le Fa’amasinoga ‘o Talosaga toe iloilo ‘e fa’alēaogāina ai le talosaga muamua ‘a McMillan ‘e ‘apili ai le PFO po’o le poloa’iga ‘e fa’amatu’u atu ai ana meatōtino ‘i leoleo, lea na lē taliaina ‘i le māsina ‘o Mati ‘i le 2026.

Link to RNZ (Article): https://www.rnz.co.nz/news/crime-and-justice/1668263/convicted-drug-dealer-cleared-to-appeal-2-point-8-million-bill

IMAGE/ATA: RNZ / Cole Eastham-Farrelly

‘E $161,000 se tupe na taulimaina ‘e le NZ First, mai nisi ‘e lē ‘o fa’ailoaina po’o ai, ‘auā fa’atōsina ‘o le faigāpālota.  ‘O ia tupe na fōa’i ‘i totonu ‘o le tolu māsina talu ai. ‘O lo’o usita’ia lava aiaiga mō fōa’i tau tupe ‘i le faigāpālota, ma ‘o ia fo’i fa’amaumauga, na fa’alauiloaina ‘e le Komisi mō Faigāpālota ‘i le aoauli ananafi.

‘Ua ‘ātoa nei ‘i ai le $173,162 ni fōa’i tau tupe mō le NZ First ‘i lenei faigāpālota.  ‘O lo’o nūmera muamua pea le National ‘e $346,160.  ‘I fa’amaumauga pito lata mai na fa’aalia ai, ‘e $30,000 le isi tupe ‘a le National na maua, ma le $15,000 ‘a le ACT.  ‘A fa’aopoopo fa’atasi tupe ‘uma ‘ua maua ‘i le taimi nei ‘o fōa’i mō vāega fa’a’upufai mō le faigāpālota, ‘e kuata miliona ‘ua sili atu ai nai lō le tupe aofa’i na maua ‘i le faigāpālota ‘o le 2023.

‘E tatau ‘ona fa’amaonia ‘e ‘i lātou ‘o lo’o fōa’iina ia tupe, ‘o lātou ‘o lo’o aumau ‘i totonu ‘o Niu Sila, peita’i ‘e lē tau fa’amatalaina pe ‘aiseā ‘ua mānana’o ai ‘e fa’alilolilo a lātou fōa’i. 

‘E ui ‘e pito tele tupe ‘a le NZ First ‘e maua mai fōa’i ‘e lē fa’ailoaina po’o ai na fōa’iina, ‘e $173,162 ‘ae ‘o lo’o pito sili ‘ona tele fōa’i mō le National, ‘e maua mai lea ‘auala, ‘e tusa lea ma le $346,160. 

‘E fa’asāina ē na faia fōa’i, ‘ona ta’uina ‘i so’o se tasi ‘e aofia ai le vāega fa’a’upufai ‘o lo’o ‘ave ‘i ai le fōa’i.  ‘Ā solia lea aiaiga, ‘e fa’asalaina ‘i le $10,000. 

Talu ‘ona ‘āmataina lea faiga ‘i le 2008, ‘e le’i maua lava ‘e le Labour, Greens ma le Te Pāti Māori, ni fōa’i mai lea faiga.  ‘O le tausaga ‘e 2023, na folasia ai ‘e le Iloiloga Fa’atūmā’oti mō Faigāpālota, se fautuaga ‘e tāofi ai lea polokalame.  A fa’aalia ‘e Polōfesa Andrew Geddis ‘o le Iunivesitē ‘o Otako ‘i le itū tau ‘i a’oa’oga fa’alōia fa’apea fo’i Julie Haggie ‘o le Fa’atonu sili ‘o le Transparency International New Zealand, ‘e iai lo lā talitonuga, ‘e tatau ‘ona toe āsia ia fautuaga.  ‘E tele fa’afītāuli ‘i le ‘auala ‘o lo’o fa’atupeina ai vāega fa’a’upufai pei ‘ona lā fa’aalia ‘i le Leitiō Niu Sila.   

Link to RNZ (Article): https://www.rnz.co.nz/news/politics/1673623/nz-first-gets-161-000-boost-from-anonymous-donors-latest-electoral-commission-disclosure-shows

IMAGE/ATA: RNZ/Giles Dexter

‘Ua folafola ‘e le Vāega Fa’a’upufai ‘a le Labour le faia ‘o se tūlāfono ‘e tāofi ai pisinisi mai lo lātou fa’atogafiti ‘o ni ‘auala ‘e totogi ai ‘e tagata fa’atau ni tau ‘e lē mana’omia.  ‘O le tūlāfono ‘o le “fair go law”, ‘e fa’afeagai ai ma ni māliliega ‘o tau ‘e fa’ate’ia ai tagata fa’atau, ‘o ‘inisiua ‘e lē aogā ma saofaga po’o tau ‘e totogi mō ni ‘au’aunaga, ‘e faigatā tele ‘ona toe fa’alēaogāina pe tāofi.

Na saunoa le ta’ita’i Chris Hipkins,  ‘o se ‘avega mamafa mō ‘āiga ‘o lo’o feagai ‘i le taimi nei ‘i le tau ‘o le soifuaga, ma ‘o le ‘ā tāofi ‘e le Labour. 

‘O lea tūlāfono ‘o le ‘ā fa’apitoa lea mō ta’avale, masini ‘e fa’aaogā ai le ‘eletise, telefoni, subscriptions, fa’atauga ‘o pepa ulufale fa’apea ai ma fale toleni.

Fa’asā ai ‘inisiua ‘e lē aogā tele mō ta’avale, ‘e pei ‘o ‘inisiua ‘i le valiga ‘o ta’avale ma le ‘inisiua pe ‘ā fa’alētonu masini ‘o le ta’avale, ma nisi ‘o mea ‘e ono lē fa’aleagaina.

Tāofi le tauānau mālosi ‘o tagata ‘e totogi le taimi fa’aopoopo ‘e mafai ‘ona fa’aleleia ai ‘e le kamupanī se masini ‘e aunoa ma se totogi (extended warranties) mō masini ‘e pei ‘o pusa’aisa, masini tālavalava, ‘ōgāumu ma isi.

‘E tatau ‘ona aofia ‘uma totogi fa’atūlafonoina ‘i tau ‘o lo’o fa’aalia muamua, ‘ae ‘aua ne’i toe fa’aopoopoina ni totogi fa’afuase’i ‘i le taimi e totogi ai, pepa ulufale (tickets).  ‘Ia faigōfie fo’i ‘ona toe tāofi pe fa’alēaogāina se saofaga po’o se tupe ‘e totogi faifaipea mō ni ‘au’aunaga fa’apea ma fale toleni.  Fa’asā le totogi ‘o ni pili lē talafeagai pe ‘ā fa’amuta konekarate (exit fees), ma le lē manino ‘o le ‘otometi ‘o le toe fa’afo’u ‘o ni konekarate mō telefoni ma ‘initaneti ‘a  tagata fa’atau.

Link to RNZ (Article): https://www.rnz.co.nz/news/politics_election-2026/1667731/labour-promises-law-to-stop-businesses-tricking-customers-with-hidden-costs-and-surprise-fees

IMAGE/ATA: RNZ/Tu Natanahira

‘Ua ofi atu le ‘au soka ‘a ali’i Niu Sila ‘o le All Whites, ‘i le sā’iliga ‘o le siamupini ‘o le Kirin Cup ‘i Iāpani ‘ina ‘ua manumālō ‘i le ‘au ‘a Panama ‘i kiki ‘o sala.  ‘O le ‘ā malaga atu le All Whites ‘i Tokyo ‘i le su’ega ‘o le siamupini ‘i le Aso Gafua, 5 ‘Oketopa ‘i le National Stadium.

Link to RNZ (Article): https://www.rnz.co.nz/news/sport/1673283/all-whites-beat-panama-on-penalties-to-advance-to-kirin-cup-final

IMAGE/ATA: Adapted from All Whites Facebook.

‘Ua ‘avea Temukisa Auina Penehuro Hauma ma ulua’i tama’ita’i ‘ua filifilia ‘e ‘avea ma Kōvana Sili ‘o le mālō ‘o Tuvalu.  ‘Ua 71 tausaga ‘o lona soifua.  ‘E to’asefulu kōvana sili ‘o Tuvalu talu mai le tūto’atasi ‘i le aso 1 ‘Oketopa 1978, mā ‘o le ītūpā ‘uma ‘o ali’i.

‘O Hauma ‘o le ‘ā ‘avea ma sui ‘o le Tupu ‘o Sālesa le Tolu mō Tuvalu, na fa’atautōina ‘i Funafuti ‘i le afiafi ‘a’o lumana’i le fa’amanatuga ‘o le 48 tausaga ‘o le Tūto’atasi ‘o le atunu’u ‘i le Aso Lulu.

‘O Hauma ‘e mai Vaitupu ma Nanumaga ma ‘ua silia ma le tolusefulu tausaga ‘o ‘i totonu ‘o a’oa’oga.  Sā ‘avea ma peresetene ‘o le Fono ‘a Tinā ma Tama’ita’i ‘a le Mālō ‘o Tuvalu talu mai le tausaga ‘e 2016 ma sā iai lona sao ‘i ni polokalame fou tāua ‘a le mālō, ‘e aofia ai le iloiloga ‘o le Tūlāfono Fa’avae ma gāluega ‘i  le fauga ‘o le tusi vaogagana ‘a Tuvalu. 

Link to RNZ Pacific (Article): https://www.rnz.co.nz/news/pacific/1667715/tuvalu-appoints-first-woman-governor-general-ahead-of-48th-independence-day

IMAGE/ATA: Tuvalu Government Media / RNZ.

‘O Kapeteni Smit Machchhar na fa’afoeina le malaga ‘a le va’alele ‘o le Boeing 737 MAX 8 mai Dubai mō Tel Aviv ‘i le Aso Lulu, ‘ina ‘ua osofa’i ‘e le soa pailate, ma taumafai ‘e fa’apa’ū le va’alele ‘e tusa ai ma le saunoaga ‘a le Palemia ‘o ‘Isarā’elu Benjamin Netanyahu.  ‘I nisi ‘o molimau ‘a le pāsese, na tali atu le ali’i pailate ‘i le osofa’iga ‘e ui ‘i ona manu’aga, ma mafai ai  ‘ona ia tatalaina le faitoto’a ‘o le potu ‘o pailate, ma ulufale atu ai ‘i totonu se tasi ‘o le pāsese ma le ‘aufaigāluega ma tāofi le soa pailate. 

‘O ni pailate se to’alua ‘a le Flydubai na iai ‘i le faigāmalaga, na mafai ‘ona lā fa’aauauina le faigāmalaga ma tūlau’ele’ele ai ma le saogalēmū ‘i Tabu, Saudi Arabia.  ‘Ua fa’aalia ‘e le Palemia Narenda Modi le mitamita ‘o ‘Initia ‘i le ali’i pailate.  Na fa’apēnā fo’i ‘ona fa’ailoa le fa’afetai ‘a Netanyahu ‘i le ali’i pailate ‘Initia ‘ona ‘o lona lototele.  Na ia fa’asaoina soifua ‘o tagata ‘e to’a 174 ‘e aofia ai tagata ‘Isarā’elu ma isi tagātānu’u pei ‘ona fa’aalia ‘e Netanyahu.

‘O Kapeteni Machchhar ‘e mai Gujarat peita’i e aumau ona mātua ‘i Mumbai.  ‘Ua silia ma le 11 tausaga ‘o galue mō le SpiceJet Limited ‘a’o le’i galue mō le Flydubai mō tausaga ‘e fā.  ‘Na fa’ai’uina ana a’oa’oga fa’apailate ‘i le ‘āmataga ‘i totonu ‘o Niu Sila pei ‘ona tā’ua ai ‘e le Leitiō Niu Sila.

Link to RNZ (Article): https://www.rnz.co.nz/news/world/1676825/everything-we-know-about-the-pilot-stabbed-on-a-flight-to-tel-aviv-captain-smit-machchhar

IMAGE/ATA: ISRAEL’S FOREIGN MINISTRY / RNZ.

‘I tusitusiga ‘a Nick Campton mō le ABC, na ia tā’ua ai, ‘e lē na’o le su’ega ‘o le siamupini le taualugaga ‘o ta’amilosaga lakapī, ‘ae ‘o le taimi ‘e tāpena ai mō tufagā fa’ailoga, po’o ai le tagata pito sili ‘ona lelei le ta’alo, le tagata pito sili ‘ona alu alu ‘i luma lana ta’alo.

‘O isi fa’ailoga ‘e ‘ese mai fa’ailoga pito maualuga ‘o ia ta’amilosaga, ‘o le fa’ailoga ‘o tagata pito sili ‘ona lelei le ta’alo ‘i le laina ‘i luma po’o le laina ‘i tua, ma ‘i lona manatu, ‘e tatau ‘ona tu’uina atu ‘e fa’ailoga ‘i lima ‘o le ali’i ‘o Naufahu Whyte, mō le ta’amilosaga ‘ātoa ‘o le NRL ‘o le 2026, ‘o le tagata pito sili ‘ona maoa’e lana ta’alo ‘i le laina ‘i luma.

‘O lo’o tūlaga muamua Whyte ‘i so’o se tasi ‘i le laina ‘i luma ‘i mita na tamo’e ai, ma nisi ‘o vāega ‘o le ta’aloga na tūlaga maualuga ai lana ta’alo ‘i le 2026 ‘e tusa ai ma fa’amaumauga ‘a le ali’i tusitala.  ‘Ua 24 tausaga ‘o Naufahu, ma ‘o lo’o ta’alo ‘i le Roosters, lea ‘o le ‘ā su’eina ma Newcastle le siamupini ‘i le Aso Sā, ‘o le ta’amilosaga ‘o le Lakapī Liki ‘o le NRL ‘i lenei tausaga.  ‘O le ali’i ‘o Naufahu Whyte, ‘o le Tonga lona tamā, ‘a’o le Levī Sāle’imoa ma Leauva’a lona tinā.

‘Ae ‘o le ali’i ‘o Nathan Cleary ‘o le ‘au ‘a le Penrith lea ‘ua mauaina nei le fa’ailoga ‘o le Dally M Medal ‘i le ta’amilosaga ‘o le NRL, ‘ae ‘o le fulupeki ‘a Brisbane, Tamika Upton lea ua mauaina le fa’ailoga mo le taimi lona tolu ‘i le ta’amilosaga a tama’ita’i.

Link to RNZ (Article): https://www.rnz.co.nz/news/sport/1659755/why-roosters-kiwis-prop-naufahu-whyte-has-been-the-nrl-s-best-forward-in-2026

IMAGE/ATA: Darrian Traynor/RNZ.

‘Ua tāpena ‘Isarā’elu ‘e fa’aopoopoina ana siaki ‘o le puipuiga mō pailate ‘e fa’atautaia malaga āga’i atu ‘i totonu ‘o le atunu’u, pei ‘ona fa’aalia ‘e se so’o’upu mō le ‘ōfisa ‘o le palemia.  ‘Ua māfua lea, ‘ona ‘e fa’apea, na fa’ao’olima pe tatui (se’i tulou) ‘e se soapailate ‘o se faigāmalaga ‘a se va’alele ‘a le FlyDubai, le pailate ma taumafai ‘e fa’apa’ū le va’alele.

Na mafai ‘ona fō’ia le fa’afītāuli ‘ina ‘ua fesoasoani nisi ‘o le pāsese ‘e tāofi le soa pailate, ma mafai ai ‘e nisi ‘o pailate sa tiute na fa’afaigāluegaina ‘e le kamupanī va’alele, ‘ona fa’aauau ma tūlau’ele’ele ai ma le saogalēmū le va’alele ‘i Saudi Arabia.  ‘Ua lokaina ‘e leoleo ‘a Saudi le soa pailate ma su’esu’eina ‘e tusa ai ma līpoti.  ‘O le faigāmalaga lea ‘a le FlyDubai ‘o le FZ1073 mai le United Arab Emirates āga’i atu ‘i ‘Isarā’elu pei ‘ona fa’aalia ‘e le Palemia Benjamin Netanyahu.  Pe ā ma le 169 ‘o le pāsese ‘e to’a 172, ‘o ni tagātānu’u ‘o ‘Isarā’elu.

‘Ua toe lāgā ai ni fa’afesili po’o fa’apēfea ‘ona siaki pailate ‘o lo’o fa’atautaia malaga ‘a va’alele ‘i ‘Isara’elu ma atunu’u ‘i sasa’e tūtotonu ‘i vāega ‘o lo’o faia ai le taua, ‘a’o ā fo’i ta’iala mō le puipuiga ‘o lo’o faia mō ‘i lātou ‘e tusa ai ma līpoti.

Link to RNZ (Article): https://www.rnz.co.nz/news/world/1666049/israel-to-ramp-up-pilot-checks-after-flydubai-scare

IMAGE/ATA: Flydubai Facebook