‘Ua folafola e le Vāega Fa’aupufai ‘a le Greens ‘e toe fa’afo’i le polokalame ‘o taumafa ‘a fānau ā’oga ‘i lona fa’atūlagaga na iai muamua, ma fa’alaua’itele atu mō isi ā’oga. ‘Ua tā’ua e le Greens, ‘afai ‘ae manumālō mai le faigāpālota, ‘o le ‘ā lātou fa’amautinoa fo’i se fa’atupega tūmau mō le polokalame Ka Ora, Ka Ako, lea na toe fa’aigoaina iā ‘Oketopa ‘o le Health School Lunches.

Na faia ‘e le faigāmālō ‘o lo’o iai nei ni suiga ‘o le poloakalme ‘ina ‘ia fa’aitiitia ai tupe fa’aalu. Sa iai ni fa’afītāuli ‘i le amataga ‘o le polokalame fou, ‘e aofia ai le lē lelei ‘o nisi ‘o taumafa, fa’apea le tāpunia ‘o sē tasi ‘o kamupanī sa tāpenaina taumafa.

Peita’i na saunoa le Minisitā Lagolago o A’oga David Seumour iā Mē, ua toetiti ‘atoa le 100 pasene o taumafa ua taunu’u ‘i le taimi ‘atofaina ‘i aso ta’itasi, ma ‘ua fa’aitiitia faitioga ‘i le silia ma le 92 pasene.

‘Ua fa’aitiita nei le tau māsani ‘o se taumafataga ‘i le $3.58 peita’i ‘e finagalo le Greens, ‘e toe si’itia le fa’atupega ‘i le $6.50 mō le taumafataga e tasi. Na saunoa le ta’ita’i ‘o le Vāega Fa’a’upufai Marama Davidson, ‘o le ‘ā fa’alautele atu fo’i le polokalame  ‘i le tusa ma le 400 isi ā’oga, ma maua ai ‘e le isi 150,000 fānau se taumafataga ‘i aso ta’itasi.

 Na tā’ua ‘e Davidson, ‘o le ‘ave’esega o le fa’atupega ma koenkarate mai Kamupanī i totonu o nu’u na māfua ai ona ‘ave’esea ‘o le faitau selau o gāluega.

‘E tusa ma le ‘afa ‘o taumafataga ‘e le’i ‘ausia tūlaga maualalo mō taumafa pāleni, ua fa’ateleina otaota ‘o taumafa, ma e lē ‘o mautinoa fo’i se fa’atupega ‘o le polokalame ‘o lo’o iai nei pe ‘ā mavae le 2028. ‘Ua fuafua le Greens ‘e toe fa’afo’i le tāpenaina o taumafa ‘i totonu o nu’u, ‘e ono toe maua ai le o’oi atu ‘i le 2000 ‘o avanoa faigāluega, ‘ae o le fa’alauteleina ‘o le polokalame ‘e ono maua ai fo’i le isi 1900 o gāluega fou.

‘Ua fuafuaina le tau ‘e fa’atupe ai lea faiga fa’avae ‘i le $472mīliona tālā ‘i le tausaga 2027/28, ma ‘o le ‘ā si’itia atu ‘i le $602 mīliona tālā ‘i le 2030/31.

Link to RNZ (Article): https://www.rnz.co.nz/news/politics_election-2026/1066090/greens-vow-to-restore-original-school-lunch-programme-include-more-schools

IMAGE/ATA: RNZ / Marika Khabazi

‘Ua fa’amāonia le aga’ia tu ‘o Richie Mo’unga ‘i Aferika i Saute, ‘e ‘auai atu ‘i le ‘au a le Olopeleki. Ina ua mavae ni vaiaso ‘o fa’atalanoa lona agava’a ‘e ta’alo ai mō le ta’amilosaga. ‘Ua fa’amāonia mai e le Lakapī Niu Sila, na malaga Mo’unga ‘i Johannesburg ‘i le Aso Tofi, ‘e fa’atasi atu ‘i le ‘Olopeleki mō le lātou ta’aloga lona valu o le lātou malaga ta’amilo ‘i Aferika i Saute.

‘O le vala’auina o Mo’unga na tula’i mai ina ua fa’amanu’alia Billy Proctor i le pōgāivi o lona taua’u. ‘O lo’o iai fo’i popōlega ‘i manu’aga o Damien McKenzie pei ona saunoa le faiā’oga o le ‘au.

IMAGE/ATA: All Blacks Facebook

‘Ua salalau solo ‘i luga o le ‘initaneti tala a’o sā’afiafiga mō le teineititi Sāmoa iā Leneah Taeaoalii 10 tausaga, lea na fa’ata’otolia ‘i le falema’i ‘i Utah ma fa’amānāva ‘i le masini fa’aola, ‘ina ua malemo ‘i se vai ‘i Willow Pond ‘i le aso 31 o Iūlai. ‘Ua fa’amāonia mai ‘i līpoti a le ‘aufa’asalalau ‘a le ABC, ‘o le vaiaso nei ‘o le ‘ā ‘ave’ese ai le masini fa’aola, ma fa’amāvae atu ona ‘āiga, ma le to’atele ‘o ona ‘āiga na malaga mai ‘i Sāmoa.

‘O Leneah ma lona uso la’ititi na i le paka ma le lā tamā iā Fotu Taeaoalii, ma na mo’omia ‘e le tamā ona fa’aaogā le faleui ‘a ali’i, ma fa’atonu tēneiti ‘e fa’atali i fafo ane o le faleui. Peita’i, na aga’i atu Leneah ma lona uso la’ititi 9 tausaga ma ta’a’alo lata i le vai, ma tau’ai ‘iai ō lā se’evae. Na mamau vae ‘o teneiti ‘i le palapala ma gōgōto ai ‘i lalo i le vai.

Na va’aia Leneah o tago tūlei ‘i luga lona uso la’ititi, ma fa’asao mai ai, peita’i na māgoto ‘i le vai, ‘e tusa ai ma līpoti. Na viliina e tagata leoleo, ma sa taumafai le tamā ‘e lavea’i mai Leneah, peita’i ‘e lē ‘ato’atoa lona mālosi, ma e maua Taeaoalii ‘i le fa’ama’i o le Parkinsons disease.

‘E tusa ma le 10 ‘i le 15 mīnute ‘o ‘i lalo le vai Leneah, ma ‘ua fuafua lona ‘āiga ‘e ‘ave’ese ma le masini fa’aola. ‘O lo’o momoli mai se fautuaga ‘a le ‘āiga ‘o Leneah ‘i mātua, ina ‘ia ‘avea le fa’alavelave na tupu ‘iā Leneah ma fe’au tāua mō tagata ‘uma, ‘aemaise ‘o le sēkone ‘e mafai ‘ona malemo ai se tamaititi.

Link to ABC4 (Article): https://www.abc4.com/news/wasatch-front/family-speaks-10-year-old-drowning-willow-pond/

IMAGE/ATA: Leneah (left) and her sister. Courtesy: Connie Bradshaw

‘Ua māta’itū e le Consumer NZ le si’itaga fou ‘i tau o ‘oloa o taumafa ‘a le Hellow Fresh. ‘Ua tā’ua e nisi o tagata fa’atau, e le’i lava pe ‘umi se taimi na fa’ailoa atu ai le si’itaga fou ‘i tau o taumafa mai le kamupani. Na fa’atūlaga e le kamupanī le tau o ana ‘oloa ‘i le amataga o le māsina nei. ‘O le pusa ‘e iai mea’ai e lima mō tagata e to’aono, na si’itia le $24.90 po’o le 9% o le si’itaga i le vaiaso. ‘O le pusa ‘e iai mea’ai e lima mō tagata e toafā, na si’itia le $24 po’o le 12.6 pasene le si’itaga ‘i le vaiaso.

Fa’ailoa e le ta’ita’i o le Consumer NZ, ‘e le’i lelei le feso’ota’iga i le vā o le kamupani ma ana tagata fa’atau, ‘e uiga ‘i ia si’itaga fou. Na maua ‘i fa’amatalaga, na lafo ‘e le Hellow Fresh se ‘imeli i tagata ‘i le lua vaiaso ‘a’o lumana’i lea suiga. Ma ‘o le to’atele o tagata lātou tele le’i faitauina ia ‘imeli. Fa’ailoa e le Hellow Fresh, ‘o le latou si’itaga, ‘e itiiti ifo ma le fua fa’atatau o le si’itaga ‘o le tau o le soifuaga ua iai nei, talu mai le 2022.

Link to RNZ (Article): https://www.rnz.co.nz/news/business/915755/consumer-nz-calls-foul-on-hello-fresh-price-increases

IMAGE/ATA: Supplied / Hello Fresh (RNZ).

‘Ua silia ma le fa’atoluina nūmera fa’aopoopo ‘o tagata ua fa’amāonia ‘i le Autism po’o le ‘Otisi i totonu o Niu Sila, talu mai le 2009, pei ona maua ‘i su’esu’ega a le Iunivesetē a Otago. Na ta’ita’iina e le polōfesa lagolago mō le Vāega o le Soifua Mālōlōina o le mafaufau i Otago, Ben Beaglehole lea su’esu’ega, ma na iloilo ai fa’amaumauga ‘e tolu o le Soifua Mālōlōina mai le vā o le 2009 ma le 2023.

‘E silia ma le 30,800 tagata ‘e maua i le Otisi, na fa’ailoa ‘i le taimi o le su’esu’ega. ‘E o’o mai i le 2023, ‘o le 1.3% o tamaiti ma le .14% o tagata mātutua i Niu Sila, ‘e maua i le Otisi. Fa’ailoa e Beaglehole, ‘e ui ina lātou silafia o lo’o fa’atapula’a le fua fa’atatau o le ‘otisi ‘i tamaiti, ‘ae o le lātou su’esu’ega o lo’o fa’aalia ai le mamanu lava lea ‘i tagata matutua.  

Link to 1News (Article): https://www.1news.co.nz/2026/08/07/autism-diagnoses-in-nz-have-more-than-tripled-since-2009/

IMAGE/ATA: SCR (file).

‘Ua fa’alauiloa mai nisi fa’amatalaga ‘i le matā’upu lea na fa’amāonia ai le maua o pauta ‘o’ona o le cocaine ‘i le ali’i fusu ‘o Laauliolemalietoa Lupesoliai Joseph Parker, lea na fa’amāonia ‘iā Oketopa o le tausaga talu ai. ‘E tolu māsina na fa’amālōlō ai Parker mai le maea, ‘ina ua fa’amāonia ‘i su’esu’ega na faia ‘i le aso o le lā ta’aloga ma Fabio Wardley.

Fa’ailoa ‘e le ‘au su’esu’e i Peretānia, na tē’ena lava ‘e Parker e nate le’i tagofia ni pauta ‘o’ona, ma o lo’o tu’ua’ia ai lana nutritionist po’o lana tagata faufautua ‘i taumafa, lea na fa’afaigāluega ‘e Parker ‘a’o tāpena mō le lā fusu’aga ma Wardley.

‘I fa’amatalaga mai le United Kingdom Anti-Doping e fa’apea, ua lātou taulimaina fa’amāoniga mai iā Parker e fa’ailoa ai e nate le’i tagofia le pauta o le cocaine, ua ta’utino fo’i e lē na faufautua ia Parker i taumafa e fa’apea, na ia fa’aaogāina pauta o’ona mō ia lava ‘i aso a’o tāpena le fusu’aga a Parker i le aso 25 o Oketopa 2025. Ua fa’asilasila e Parker ua ‘ave’esea le sā na tu’uina mai mō ia, ma ua sāuni ‘e toe alu i le maea i se taimi lata mai.

Link to RNZ (Article): https://www.rnz.co.nz/news/sport/916221/doping-body-says-joseph-parker-s-positive-cocaine-test-caused-by-nutritionist

IMAGE/ATA: Joseph Parker Facebook

‘Ua pāsia i le Palemene le faitauga lona tolu ‘o le teuteuga ‘o le Crimes ACT po’o le tūlāfono mō soligātulāfono ‘i Niu Sila, ‘e mafai ai ‘e le tagatā nu’u Niu Sila ona pu’e se tagata ‘o faia ni gaoiga fa’asolitūlāfono ‘i nofoaga lautele.

Fa’ailoa e le Minisitā o Fa’amasinoga o Paul Goldsmiths, ‘o le ‘ā ‘amata fa’amamaluina ‘i le vaiaso fou. ‘E aofia ‘i ia teuteuga le fa’alautele ‘o le mālosi’aga, ‘e mafai ai e tagatanu’u Niu Sila, ona pu’eina, pē fa’alavelave ‘i so’o se tagata ‘o solia se tūlāfono ‘i so’o se taimi o le aso. ‘O le ‘ā fa’ataga ona tāofia e tagata lautele se tagata solitūlāfono, pe ‘ā talafegai ma saogālemū, ‘ae mana’omia fo’i ona fa’afeso’ota’i leoleo ma mulimuli ‘i ā lātou fa’atonuga.

‘O lea tūlāfono ua fa’amoemoe ‘e tāofia ai solitūgalāfono ‘i fale’oloa ma supamāketi ‘e ala ‘i le fa’atagaina ‘o sikūlātī ‘e tāofi tagata gāoi. ‘O lo’o feagai tagata faigāluega ‘i fale’oloa ma sauaga ma tau fa’amata’u mai ‘i tagata gāoi. Ma e faitau pīliona tāla tupe gau ‘a fale’oloa ‘i le tausaga mai le ‘au solitūlāfono pei ona tā’ua ‘e Goldsmith. ‘O le toe teuteuga fo’i o lea tūlāfono, ua fa’ama’oti mai ai moliaga fou ua fa’aopoopo, mōliaga mō le tagata solitūlāfono ‘e muamua fa’ao’olima ‘i tagata lautele, ma mōliaga ‘e tolu pe ‘ā tu’iina se tagata.

Link to RNZ (Article): https://www.rnz.co.nz/news/politics/906322/expansion-of-citizen-s-arrest-powers-to-take-effect-within-a-week

IMAGE/ATA: RNZ / Mark Papalii

‘Ua lagalagā manatu ‘o le fōma’i fa’apitoa mō tamaiti, ‘e fa’apea ‘e telē se āfāina ‘i pāpātua po tamaiti mai ‘i le amoga ‘o ‘ato ā’oga mamafa ‘i aso nei. Fa’ailoa ‘e le American Academy of Paediatrics, ‘o nisi ‘o fōliga va’aia ‘e iloa ai ua mamafa tele le ‘ato ā’oga o le tamaititi, ‘o le va’aia lea ‘a savali ma le ‘ato, ‘e punou pei ‘e fa’ano’uno’u, ma loga le ‘au ‘o le ‘ato ‘i tau’au.

‘O lenei vaitaimi ua tele ‘ina fa’aopoopo le mamafa ‘o ‘ato ā’oga a tamaiti ona ‘o masini komepiuta ‘e fa’aaogā ‘e iai chromebooks ma labtops. Fa’aopoopo atu ai ma ‘ofu sui mō ta’aloga ma ‘api. ‘E ogaoga a’afiaga ‘i le tamaititi mai le mamafa ‘o ‘ato ā’oga, ‘aemaise pe ‘ā sulu ‘a ‘o amo se ‘ato mamafa. ‘O lo’o fautuaina mātua ‘e ‘aua ne’i fa’atali se’i tīgā le tua o le tamaititi, ‘ae siaki po’o talafeagai le mamafa ‘o le ‘ato ā’oga ma le tino o le tamaititi.

‘O lo’o fautuaina fo’i e faiā’oga mātua, ‘e tāua le siaki e le matua ‘o le ‘ato a lana tama ‘i aso ta’itasi, ona ‘e le’o meaā’oga ‘uma e mo’omia ‘i aso ‘uma. ‘O le tele o api ‘e lē mo’omia, ‘ae tatau ona tu’u i le fale.

Link to 1News (Article): https://www.1news.co.nz/2026/08/07/school-backpack-overload-heavy-bags-can-strain-kids-bodies/

IMAGE/ATA: SCR (file).

‘O le afiafi ananafi na pu’eina ai se fa’atalanoaga ‘a Sui ‘o le ‘Ofisa o Sulufa’iga mai Sāmoa ma nisi ‘o sui o le ‘Ofisa o Niu Sila ‘i luga o le Siufofoga o le Laumua. Na faia ai e le Afioga iā Lauano Ati Ilaoa o le Siufofoga o le Laumua, le fa’atalanoaga ma le tama’ita’i iā Lei Mikaele ‘o le sui mai le ‘Ofisa o le Sulufa’iga a Niu Sila, fa’apea le tama’ita’i iā Nepa Papāli’i ma le ali’i o Fagalilo Murphy Siupolu, ‘o lā’ua ‘o sui mai le ‘Ofisa o le Komesina o Sulufa’iga ‘a Sāmoa, na malaga mai Sāmoa ‘i lalo ‘o se polokalame ‘a le Matāgāluega o le vāi Fafo a Niu Sila.

Na fa’asoa Lei ‘i matāfaioi ‘a le lātou ‘Ofisa, ma fa’amatalaina ;e uiga tonu o le ‘upu Ombudsman. ‘O lea ‘upu ‘o se ‘upu mai le atunu’u o Suatena, ‘e iloga ‘i pūlega lelei. ‘O Suatena na fa’avaeina le ‘Ofisa ‘o Sulufa’iga muamua ‘i le lalolagi ‘i le tausaga e 1809, ona o le to’atele o tagata fia fa’aseā ‘i ‘au’aunaga ma Matāgāluega a le mālō, ‘ae lēai se ‘au’auanaga e mafai ona ‘ave ‘iai fa’aseā.

‘Ae o le 1962 fa’atūina le ‘Ofisa o le Ombudsman ‘i Niu Sila. Na fa’amanino ‘e Lei, ‘o la lātou ‘au’aunaga, ‘o le ‘Ofisa fa’apālemene, ‘e lātou te līpoti sa’o lava ‘i le Palemene. ‘E mafai ona sulufa’i ‘iai tagata ‘e ave iai fa’aseā fa’asaga ‘i Matagāluega ma fa’alāpotopotoga a le mālō.

‘O matāfaioi ‘a le Ofisa ‘i Niu Sila ‘e tutusa ma matāfaioi ‘a le Ofisa o Sulufa’iga i Sāmoa, ‘e lātou te su’esu’eina fa’aseā fa’asaga ‘i Matāgāluega a le Mālō. ‘O nisi ‘o matāfaioi, ‘e aofia ai ā lātou asiasiga ‘i to’ese, ‘ofisa ‘o faigā malaga, ‘au’aunaga ‘a le Soifua Mālōlōina mō le mafaufau,’ona ‘o lo’o iai lō lātou mālosi’aga, ‘e fa’amautinoa ai ‘o saogālēmū tagata o lo’o iai ‘i ia ‘au’aunaga pei ona saunoa Lei.

Na saunoa fo’i le ‘aumalaga mai Sāmoa, Nepa Papāli’i ma Fagalilo Murphy Siupolu. Fa’amatalatala nisi o matāfaioi ‘a le Ofisa o Sulufa’iga ‘i Sāmoa, ‘e vaevaeina ‘i vāega ‘e lua. ‘O le isi vāega ‘e su’esu’eina ni fa’aseā ‘e fa’asaga ‘i Matāgāluega a le mālō. Ma le Vaega o su’esu’ega fa’apitoa ‘e su’esu’eina matā’upu e fa’asaga i leoleo, ‘ofisa o tiute, ‘ofisa o tinei mū ma isi, pei ona saunoa Siupolu.

‘O le ‘Ofisa o Sulufa’iga na fa’atūina ‘i Sāmoa ‘i le 1990, ma sā tasi lava le matāfaioi na iai ‘o le faiga ‘o pūlega lelei. Peita’i o le 2013, sa fa’aaopoopo ai le isi matāfaioi mō aiā tatau o tagata ‘i Sāmoa, ‘ina ‘ia ō gatusa ma le tūlāfono, pei ona saunoa Papāli’i. ‘O nisi ‘o matā’upu ta’atele ‘e fa’ao’o atu ‘i le Ofisa, ‘e aofia ai fa’aseā fa’asaga ‘i fale faigāluega, ‘e pei o le fa’amālōlō tūmau o se tagata faigāluega ‘e aunoa ma se māfua’aga tatau.’E lē fa’apea ‘o fa’aseā ‘uma ‘e su’esu’eina ‘e le Ofisa, ‘o lo’o iai lava tūlāfono ‘e lima ta’ita’iina ai lā lātou gāluega. ‘O gāluega fa’apūlega ‘o lo’o a’afia ai se tagata, ‘o lalo o le tūlāfono o lo’o iai ‘auala ‘e uia muamua, ‘ae le’i ui atu ‘i le Ofisa.

‘O lea ‘au’aunaga ‘e leai se totogi ‘i Sāmoa fa’apea Niu Sila nei, ma ‘o le ‘a maua le ‘atoaga ‘o lea fa’atalanoaga ‘i luga o le tautua a le Siufofoga  o le Laumua ‘i se taimi lata mai.

IMAGE/ATA: SCR / Murray Faivalu

‘Ua faitioina ‘e le Palemia Tuisinavemaulumoto’otua Christopher Luxon ni fa’amatalaga ‘a le ta’ita’i a le Minisitā o le Vā i Fafo Vaovasamanaia Winston Peters, na fai ‘e fa’asaga i le Sui Faipule a le Greens, lea na ia saunoa ai ‘i se faipule Saina na soifua a’e ‘i Niu Sila, ‘ia toe fo’i i lona atunu’u.

Na fa’aaogā ‘e Tuisinavemauluimoto’otua lea avanoa ma lea matā’upu, e talosagaina ai tagata lautele ‘ina ‘ia fa’aali la lātou lagolago ‘i le Pātī ‘a le National ma ‘e nate lagolagoina tagata Saina. Na fa’amatalaina ‘e le taita’ifono ‘o le Komiti mō fa’alauiloa a le National fa’amatalaga ‘a Peters na lafo, ‘e fa’ailoga lanu. ‘O lo’o vala’au faipule a le Leipa ma le Greens ‘i le Palemia ‘ina ‘ia fa’amālōlō Peters mai ona tofiga fa’aminisitā mō le Vā i Fafo.

Na lafo ‘e Peters ia fa’amatalaga ‘i se felafolafoa’iga na faia i le Palemene ‘i le Aso Lulu, na ia saunoa ai ‘i le faipule a le Greens Lawrence Xu-Nan, ‘e toe fo’i i lona atunu’u, ma ‘o le atunu’u lenei o le atunu’u fa’atemokalasi ma ‘o Saina ‘o se atunuu pepelo e pei ‘o se i’a māfolafola. ‘O Xu-Nan na fānau ‘i Saina ‘ae na malaga mai ‘i Niu Sila o la’ititi ‘i le 1994. ‘E manatu Luxon, ‘o le māsani lava lea ‘a Peters, ‘e fiafia ‘e lafo ana fa’amatalaga lē talafeagai ‘e fa’atōsina mai ai tagata ma le ‘au fa’asalalau iā te ia. ‘Ua tu’uina atu ni popōlega o le amepasa ‘a Saina ‘i Niu Sila ‘i le Matāgāluega o le Vā i Fafo, ‘e fa’atatau i lafoga ‘a Peters.

Link to RNZ (Article): https://www.rnz.co.nz/news/political/842204/luxon-criticises-winston-peters-for-inappropriate-attention-seeking-comments-towards-green-mp

IMAGE/ATA: RNZ